ក្រុមប្រឹក្សាសន្តិសុខអ.ស.ប. កាលពីថ្ងៃសុក្រម្សិលមិញ បានពិភាក្សាអំពីស្ថានការណ៍សិទ្ធិមនុស្សនៅប្រទេសកូរ៉េខាងជើង ទោះជាប្រទេសចិនបានព្យាយាមរារាំងក៏ដោយ។
នេះជាលើកទី៣ហើយដែលក្រុមប្រឹក្សាមានសមាជិក១៥ប្រទេសនេះពិភាក្សាអំពីបញ្ហានេះ ដែលជាធម្មតាត្រូវឲ្យគណៈកម្មការផ្សេតទៀតដោះស្រាយ ដូចជាក្រុមប្រឹក្សាសិទ្ធិមនុស្ស និងមហាសន្និបាតអ.ស.ប.។ ក្រុមប្រឹក្សានេះបានធ្វើកិច្ចប្រជុំបញ្ហានេះប្រចាំឆ្នាំកាលពីខែធ្នូឆ្នាំ២០១៤។
ប្រទេសចិនធ្វើមិនបានសម្រេចក្នុងការព្យាយាមរកសំឡេងចំនួន៩ដើម្បីផ្អាកការពិភាក្សានេះ។ មានតែប្រទេសរុស្ស៊ី វ៉េណាស៊ុយអេឡា អង់ហ្គោឡា និង អេហ្ស៊ីប ប៉ុណ្ណោះបានប្រឆាំងសម័យប្រជុំនេះ។
ថ្វីបើប្រទេសចិនជំទាស់នឹងការពិភាក្សាអំពីការរំលោភសិទ្ធិមនុស្សដោយរដ្ឋាភិបាលក្រុងព្យុងយ៉ាងក៏ដោយ ក៏រដ្ឋាភិបាលចិនមិនជំទាស់នឹងទណ្ឌកម្មបន្ថែមប្រឆាំងកូរ៉េខាងជើងទេ ដោយសារប្រទេសកុម្មុយនិស្តនេះសាកល្បងមីស៊ីលនិងធ្វើអាវុធនុយក្លេអ៊ែររបស់ខ្លួន។
កាលពីសប្តាហ៍មុន រដ្ឋាភិបាលក្រុងប៉េកាំងបានចូលរួមជាមួយសមាជិកផ្សេងទៀតរបស់ក្រុមប្រឹក្សានេះក្នុងការសម្រេចជាឯកឆ្ឆន្ទដើម្បីចាត់វិធានការតឹងរ៉ឹងចុងក្រោយបំផុតបង្ខំឲ្យកូរ៉េខាងជើងបំពេញកាតព្វកិច្ចអន្តរជាតិរបស់ខ្លួន៕
