ប៉េកាំង៖ កាសែតចិនបានចុះផ្សាយរូបថតប្រធានាធិបតី ហ៊ូ ជាមួយប្រធានាធិបតីអូបាម៉ា នៅសេតវិមាននៅទំព័រមុខកាលពីថ្ងៃព្រហស្បតិ៍ម្សិលមិញ។ ចំណងជើងកាសែតបានអបអរទំព័រប្រវត្តិសាស្រ្តថ្មីក្នុងទំនាក់ទំនងរវាងប្រទេសទាំងពីរ ហើយរាយការណ៍ឲ្យឃើញច្បាស់ពីព័ត៌មានវិជ្ជមានពីជំនួបនេះ។
កាសែតជាភាសាអង់គ្លេសដែលចេញផ្សាយយ៉ាងរហ័សដោយទីភ្នាក់ងារព័ត៌មាន ស៊ីនហ៊ួ ចាត់ទុកដំណើរបំពេញទស្សនៈកិច្ចរបស់លោកហ៊ូមកកាន់រដ្ឋធានីវ៉ាស៊ីនតោនថា ជាព្រិត្តិការណ៍ប្រវត្តិសាស្រ្តដ៍សំខាន់បំផុតនៃវិស័យការទូតរវាងសហរដ្ឋអាមេរិក និងចិន។
អ្នកនាំពាក្យក្រសួងការបរទេស លោកហុង លីបានគាំទ្រពាក្យសម្តីដ៏មានសង្ឃឹមនេះ។ លោក ហុង មានប្រសាសន៍ថា ប្រធានាធិបតីហ៊ូ បានចចារប្រកបដោយជោគជ័យជាមួយប្រធានាធិបតីអូបាម៉ា។ លោកនិយាយថា ភាគីទាំងពីរបានព្រមព្រៀងធ្វើការលើការស្ថាបនាភាពជាដៃគូរវាងសហរដ្ឋអាមេរិក និងចិនដើម្បីផលប្រយោជន៍ និងការគោរពគ្នាទៅវិញទៅមក ដែលលោកបានហៅថា ពេលវេលាបានមកដល់ហើយ ។ លោកនិយាយទៀតថា ភាគីទាំងពីរបានឈានដល់មតិរួមដ៏សំខាន់លើបញ្ហាជាច្រើន រួមមានទំនាក់ទំនងខាងយោធា បញ្ហាកូរ៉េខាងជើង អ៊ីរ៉ង់ ស៊ូដង់ អាវកាស បច្ចេកវិទ្យា និងការផ្លាស់ប្តូរកម្រិតខ្ពស់។ លោកមិននិយាយលំអិតលើបញ្ហាទាំងនេះទេ។
អ្នកនាំពាក្យក្រសួងការបរទេសចិនបាននិយាយឡើងវិញនូវការពន្យល់លើបញ្ហាសិទ្ធិមនុស្សរបស់ប្រធានាធិបតីហ៊ូ។ លោកបានទទួលស្គាល់ថា ចិន និងសហរដ្ឋអាមេរិកមានការខ្វែងគំនិតគ្នាយ៉ាងខ្លាំងលើបញ្ហាសិទ្ធិមនុស្ស ក៍ប៉ុន្តែប្រទេសទាំងពីរកំពុងធ្វើឲ្យស្ថានភាពប្រសើរឡើង។
ទោះបីរដ្ឋាភិបាលចិនមានភាពស្មោះត្រង់លើបញ្ហាសិទ្ធិមនុស្សក៏ដោយ ក៏អ្នកពិនិត្យចាប់ពិរុទ្ធនៅក្នុងប្រទេសនៅតែមានការព្រួយបារម្ភចំពោះការយកបញ្ហាសិទ្ធិមនុស្សមកវែកញែកជាសាធារណៈដែរ។ សេចក្តីរាយការណ៍ព័ត៌មានអន្តរជាតិលើទូរទស្សន៍ស្តីពីដំណើរបំពេញទស្សនៈកិច្ចរបស់លោកហ៊ូ បានផ្តាច់ការផ្សាយនៅពេលដែលប្រធានបទសិទ្ធិមនុស្សត្រូវបានលើកមកនិយាយ។
ប្រែសម្រួលដោយ ជឹង ប៉ូជិន
