ប្រទេសចិនប្រាប់ឲ្យដឹងថា ខ្លួនមានទំនុកចិត្តថា ប្រទេសជិតខាងនិងសម្ពន្ធមិត្តភូមារបស់ខ្លួននឹងបន្តអ្វីដែលរដ្ឋាភិបាលទីក្រុងប៉េកាំងព៌ណនាថាជាដំណើរការសន្តិភាពនិងការផ្សះផ្សារជាតិជនភាគតិច បន្ទាប់ពីការដោះលែងលោកស្រីអោង សានស៊ូជី មេដឹកនាំនិយមលទ្ធិប្រជាធិបតេយ្យ។ ក៍ប៉ុន្តែមន្រ្តីម្នាក់បានបដិសេធពុំព្រមនិយាយថាតើការមានសេរីភាពរបស់លោកស្រីនឹងមានប៉ះពាល់ទៅលើជោគវាសនារបស់លោក Liu Xiaobo ជ័យលាភីរង្វាន់ណូបែលសន្តិភាពដែលជាប់ពន្ធនាគារក្នុងប្រទេសចិនដែរឬទេ។ ប្រទេសចិនប្រាប់ឲ្យដឹងថា ខ្លួនមានជំនឿទាំងស្រុងក្នុងអ្វីដែលហៅថា ផែនទីផ្លូវឆ្ពោះទៅរកលទ្ធិប្រជាធិបតេយ្យរបស់ភូមា បន្ទាប់ពីការដោះលែងលោកស្រីអោង សានស៊ូជី។
លោកហុង លី អ្នកនាំពាក្យក្រសួងការបរទេស និយាយកាលពីថ្ងៃអង្គារថា រដ្ឋាភិបាលទីក្រុងប៉េកាំង ជឿជាក់ថា នយោបាយភូមាដើម្បីស្ថេរភាពនិងការអភិវឌ្ឍន៍សេដ្ឋកិច្ចនឹងបន្ត។
លោកហុង និយាយថា ចិនមានទំនុកចិត្តថា ភូមានឹងបន្តធ្វើឲ្យមានការជឿនលឿនដល់ផែនទីផ្លូវមាន៧ចំណុចរបស់ខ្លួន។
លោកនិយាយទៀតថា ចិនមានការទុកចិត្តលើភូមា ដើម្បីរក្សាសន្តិភាពនិងស្ថេរភាព នៅពេលដែលខ្លួនធ្វើឲ្យមានការផ្សះផ្សាជាមួយជនជាតិភាគតិច ហើយនឹងការអភិវឌ្ឍន៍សេដ្ឋកិច្ចនិងសង្គមកិច្ចដែរ។
លោកមិនបាននិយាយសំដៅចំៗដល់លោកស្រីអោង សានស៊ូជី ទេ។ រដ្ឋាភិបាលយោធាភូមា បានដោះលែងជ័យលាភីរង្វាន់ណូបែលសន្តិភាពកាលពីថ្ងៃសៅរ៍ បន្ទាប់ពីការឃុំឃាំងក្នុងផ្ទះអស់រយៈពេល៧ឆ្នាំ។
សកម្មជនសិទ្ធិមនុស្សជាច្រើននៅជុំវិញពិភពលោក សង្ឃឹមថា ការដោះលែងលោកស្រី នឹងដាក់ការគាបសង្កត់កាន់តែច្រើនឡើងទៀត លើប្រទេសចិនឲ្យដោះលែងលោក Liu Xiaobo ជ័យលាភីរង្វាន់ណូបែលសន្តិភាពនៅឆ្នាំនេះ។
លោក Liu បានត្រូវកាត់ទោសជាប់គុក១១ឆ្នាំកាលពីឆ្នាំទៅចំពោះការជួយបង្កើតធម្មនុញ្ញ ០៨ ដែលគាំទ្រការធ្វើកំណែទម្រង់ខាងនយោបាយក្នុងប្រទេសចិន។
លោក Shang Baojun មេធាវីរបស់លោក Liu និយាយថា លោកក៏សង្ឃឹមដែរថា ការដោះលែងលោកស្រីអោង សានស៊ូជី នឹងបន្ថែមទម្ងន់លើការអំពាវនាវដើម្បី ឲ្យកូនក្តីរបស់លោកមានសេរីភាព។
លោក Shang និយាយថា លោកនិងពួកអ្នកគាំទ្រលោក Liu សង្ឃឹមថា រដ្ឋាភិបាលចិន អាចដើរតាមគំរូ នឹងធ្វើដូចរដ្ឋាភិបាលភូមា ហើយដោះលែងលោក Liu Xiaobo។
ក៍ប៉ុន្តែ លោកនិយាយថា លោកមិនមានសុទុដ្ឋិនិយមទេ។
អ្នកនាំពាក្យក្រសួងការបរទេស បានបដិសេធពុំព្រមឆ្លើយសំនួរច្រើនថែមទៀតពីអ្នកយកព័ត៌មានបរទេស អំពីជ័យលាភីរង្វាន់ណូបែលសន្តិភាព Liu ទេ។ ចិន មានការខឹងសម្បារខ្លាំងអំពីរង្វាន់នេះ ហើយបានព្រមានអ្នកការទូតប្រទេសផ្សេងៗទៀត កុំឲ្យចូលរួមពិធីទទួលរង្វាន់នេះ នៅថ្ងៃទី១០ ខែធ្នូ ក្នុងប្រទេសណ័រវែ។
រដ្ឋាភិបាល ក៏កំពុងរារាំងពលរដ្ឋដទៃទៀត កុំឲ្យទទួលរង្វាន់នោះជំនួសលោក Liu ដែរ។ រដ្ឋាភិបាល បានហាមឃាត់ភរិយារបស់លោក ហើយនឹងហត្ថលេខី ផ្សេងៗទៀតនៃធម្មនុញ្ញ ០៨ មិនឲ្យធ្វើដំណើរ។
ចិនមានការយកចិត្តទុកដាក់ចង់រក្សាស្ថេរភាពក្នុងប្រទេសជិតខាងភាគខាងត្បូងរបស់ខ្លួន គឺប្រទេសភូមានេះ ជាពិសេសតាមបណ្តាយព្រំដែនដែលជាទីកន្លែងមានការឈ្លោះប្រកែកគ្នារវាងស្តេចក្រាញ់ជួញដូរថ្នាំញៀន កងទ័ពឧទ្ទាមនិងរដ្ឋាភិបាលកណ្តាលភូមា ដែលបានហូរចូលក្នុងប្រទេសចិនកាលពីអតីតកាល។
ចិនបានបណ្តាក់ទុនយ៉ាងច្រើនក្នុងប្រទេសភូមា ទិញធនធានធម្មជាតិដូចជាឧស្ម័ននិងឈើហុប។ ប្រទេសលោកខាងលិចជាច្រើន រួមបញ្ចូលទាំងសហរដ្ឋអាមេរិក បានដាក់ទ័ណ្ឌកម្មសេដ្ឋកិច្ចលើរដ្ឋាភិបាលយោធាភូមា ដែលគេចាត់ទុកជាប្រទេស ធ្វើការសង្កត់សង្កិនខ្លាំងបំផុតមួយនៅក្នុងពិភពលោក៕
ប្រែសម្រួលដោយជឹង ប៉ូជីន
