ខ្មាន់កាំភ្លើងម្នាក់បានសម្លាប់យ៉ាងហោចណាស់កុមារ១៩នាក់និងមនុស្សពេញវ័យ២នាក់នៅក្នុងការវាយប្រហារមួយកាលពីថ្ងៃអង្គារម្សិលមិញនៅក្នុងសាលាបឋមសិក្សាមួយកន្លែងនៅក្នុងរដ្ឋ Texas (តិចសាស់) ភាគនិរតីសហរដ្ឋអាមេរិក ដែលនេះជាការបាញ់សម្លាប់ដ៏ប្រល័យធំបំផុតមួយ នៅក្នុងប្រវត្តិសាស្ត្រដែលបានកើតនៅក្នុងសាលារៀនរបស់សហរដ្ឋអាមេរិកនោះ។
ការបាញ់ប្រហារនោះបានកើតមានឡើងនៅក្នុងទីក្រុង Uvalde រដ្ឋ Texas ហើយអាជ្ញាធរនិយាយថា ខ្មាន់កំាភ្លើងដែលមានអាយុ១៨ឆ្នាំនោះមុន ដំបូងបានបាញ់ទៅលើជីដូនរបស់ខ្លួន ហើយបន្ទាប់មកបានបើករថយន្តទៅបុករថយន្តមួយទៀតហើយបានចូលទៅក្នុងសាលារៀន និងធ្វើការបាញ់រះតែម្តង។ ជនដៃដល់រូបនេះ ត្រូវបានប៉ូលិសបាញ់សម្លាប់នៅកន្លែងកើត ហេតុ។
ពលបាលត្រីនៃនាយកដ្ឋានសុវត្ថិភាពសាធារណៈរបស់រដ្ឋ Texas លោក Erick Estrada បានថ្លែងប្រាប់ទូរទស្សន៍ CNN ថា មន្ត្រីប៉ូលិសអាមេរិកបានឃើញជនដៃដល់រូបនោះពាក់អាវការពារគ្រាប់ដើរចេញពីរថយន្តដែលបុករបស់ខ្លួននោះ ដោយមានកាន់កាំភ្លើងវែងក្នុងដៃផងដែរ។ មន្តី្រប៉ូលិសបានតាមពីក្រោយជនសង្ស័យនោះ ប៉ុន្តែជននេះនៅតែមានលទ្ធភាពរត់ចូលទៅក្នុងសាលារៀនមួយកន្លែងនោះ។
ក្នុងពេលមានស្ថានភាពជ្រួលច្របល់និងបន្ទាប់ពីការបាញ់ប្រហាររួចភ្លាមៗមក គេនៅមិនទាន់ដឹងពីទំហំនៃការបាញ់សម្លាប់នោះនៅឡើយ ដោយជនរងគ្រោះត្រូវបាននាំទៅកាន់មន្ទីរពេទ្យហើយចំនួនអ្នកដែលស្លាប់និងរងរបួសក៏មានការលំបាកក្នុងការបញ្ជាក់ផងដែរ។
លោកស្រី Lydia Martinez Delgado បានសរសេរនៅលើហ្វេសប៊ុកថា ក្មួយស្រីរបស់លោក ស្រីឈ្មោះ Eva Mireles ជាគ្រូបង្រៀននៅក្នុងសាលានោះ ហើយក៏ស្ថិតនៅក្នុងចំណោមអ្នកស្លាប់ផងដែរ។
លោកស្រីបានថ្លែងក្នុងសារបង្ហោះនោះថា៖ «ខ្ញុំខឹងខ្លាំងណាស់ដែលរឿងបាញ់ប្រហារនេះនៅតែបន្តកើតមានឡើង។ ក្មេងៗទាំងអស់នេះមិនដឹងអ្វីនោះឡើយ។ ការប្រើកាំភ្លើងមិនត្រូវឱ្យកើតមានឡើងដោយងាយៗសម្រាប់មនុស្សទាំងអស់នោះទេ។ នេះជាទីប្រជុំជនរបស់ខ្ញុំដែលជាសហគមន៍ដ៏តូចមួយដែលមានពលរដ្ឋរស់នៅមិនដល់២ម៉ឺននាក់ផង។ ខ្ញុំមិនអាចគិតដល់ទេថា រឿងនេះវាបានកើតឡើងទៅលើអ្នកជាទីស្រឡាញ់របស់ខ្លួននោះ»។
ប្រធានាធិបតីសហរដ្ឋអាមេរិកលោក Joe Biden បានថ្លែងទៅ កាន់ប្រជាជាតិនៅយប់ថ្ងៃអង្គារដោយសម្តែងនូវការចូលរួមមរណទុក្ខជាមួយក្រុមគ្រួសារជនរងគ្រោះហើយបានលើកជាសំណួរថា តើហេតុអ្វីបានជារឿងបាញ់ប្រហារនៅតាមសាលារៀននៅក្នុងសហរដ្ឋអាមេរិក តែងតែកើតឡើងទូទៅនិងញឹកញាប់យ៉ាងដូចនេះ។ លោកក៏បានជំរុញឱ្យសមាជិកសភា គាំទ្រនូវអ្វីដែលលោកហៅថា «ច្បាប់គ្រប់គ្រងអាវុធ»មួយ។
លោក Biden បានបន្ថែមទៀតថា៖ «ខ្ញុំនឿយណាយនិងធុញទ្រាន់ចំពោះរឿងនេះណាស់។ យើងត្រូវតែធ្វើសកម្មភាពទៅលើបញ្ហានេះ»។
លោក Biden បាននិយាយថា លោកបានដឹងពីការបាញ់ប្រហារនេះ ខណៈពេលលោកកំពុងធ្វើដំណើរវិលត្រឡប់មកពីទ្វីបអាស៊ីវិញ។
អ្នកនាំពាក្យអគ្គលេខាធិការអង្គការសហប្រជាជាតិលោក Antonio Guterres បានសម្តែងនូវការរន្ធត់ចិត្តនិងសោកស្តាយចំពោះការបាញ់ប្រហារដ៏ព្រៃផ្សៃនេះ ហើយដែលជាពិសេសនោះ គឺជនរងគ្រោះភាគច្រើនបំផុតជាកុមារផងនោះ៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារព័ត៌មាន AP និង Reuters។
