អតីតអភិបាលក្រុងបាវិតលោក ឈូក បណ្ឌិត ដែលធ្លាប់បង្កអំពើហិង្សាលើកម្មករក្នុងការតវ៉ាមួយកាលពី១២ឆ្នាំមុន ត្រូវបានតែងតាំងជាអគ្គនាយករងរដ្ឋបាលនៅក្រសួងមហាផ្ទៃ។ នេះបើតាមអនុក្រឹត្យចុះថ្ងៃទី៣០ ខែមករា ឆ្នាំ២០២៤ ក្នុងសៀវភៅរាជកិច្ច ដែលចេញផ្សាយកាលពីថ្ងៃពុធ។
លោក ឈូក បណ្ឌិត អតីតអភិបាលក្រុងបាវិតនៃខេត្តស្វាយរៀងដែលមកពីកូតាគណបក្សប្រជាជនកម្ពុជា ត្រូវបានតុលាការខេត្តស្វាយរៀង កាត់ទោសនៅថ្ងៃទី២៥ ខែមិថុនា ឆ្នាំ២០១៣ ឱ្យជាប់ពន្ធនាគាររយៈពេល១៨ខែ ដោយសារបានបាញ់កម្មការិនីចំនួន ៣ នាក់ឱ្យរបួសក្នុងពេលដែលពួកគេតវ៉ាសុំដំឡើងប្រាក់ខែកាលពីឆ្នាំ២០១២។
ប៉ុន្តែលោកមិនបានចូលខ្លួនទទួលទោសរហូតដល់ឆ្នាំ ២០១៥ បន្ទាប់ពីអតីតនាយករដ្ឋមន្ត្រី ហ៊ុន សែន ចេញបញ្ជាឱ្យចាប់ខ្លួន ហើយលោកត្រូវបានជាប់ក្នុងពន្ធនាគាររហូតដល់ឆ្នាំ ២០១៧ ។
មន្ត្រីកម្មវិធីការងាររបស់មជ្ឈមណ្ឌលសម្ពន្ធភាពការងារនិងសិទ្ធិមនុស្សហៅកាត់ថា សង់ត្រាល់ លោក ឃុន ថារ៉ូ ប្រាប់វីអូអេថា អតីតអភិបាលក្រុងបាវិត ស្ទើរតែមិនបានទទួលទោសនៅក្នុងពន្ធនាគារនោះទេ ព្រោះលោកបានចំណាយពេលភាគច្រើននៅក្នុងមន្ទីរពេទ្យ បន្ទាប់ពីតុលាការខេត្តស្វាយរៀងរកឃើញថា មានទោសពីបទបាញ់ប្រហារទៅលើកម្មការិនីឱ្យរងរបួស។
លោកបន្ថែមថា និទណ្ឌភាពគឺជាបញ្ហាដ៏រសើបមួយដែលកំពុងតែញាំញីនៅក្នុងសង្គមកម្ពុជា និងថាការបញ្ចប់និទណ្ឌភាពគឺជាកាតព្វកិច្ចដ៏សំខាន់មួយរបស់រដ្ឋក្នុងការលើកកម្ពស់នីតិរដ្ឋ និងការគោរពសិទ្ធិមនុស្ស។
បើតាមលោក ឃុន ថារ៉ូ បញ្ហានិទណ្ឌភាពនេះធ្វើឱ្យមានការកើនឡើងនូវការរំលោភអំណាច និងអំពើពុករលួយ ហើយជាលទ្ធផលភាពអយុត្តិធម៌សង្គមបន្តកើតមានកាន់តែធ្ងន់ធ្ងរ ហើយប្រជាពលរដ្ឋកាន់តែបន្តរងគ្រោះជាបន្តបន្ទាប់ និងបាត់បង់ទំនុកចិត្តលើប្រព័ន្ធយុត្តិធម៌នៅកម្ពុជា និងលើកទឹកចិត្តបុគ្គលទាំងនោះបន្តប្រព្រឹត្តបទល្មើស៕
