មជ្ឈមណ្ឌលសិទ្ធិមនុស្សកម្ពុជា បានហៅបម្រាមរបស់រដ្ឋាភិបាល ដែលហាមមិនឲ្យមន្ត្រីបក្សប្រឆាំង ចូលសួរសុខទុក្ខសមាជិករបស់ខ្លួនក្នុងពន្ធនាគារតទៅទៀត ថាធ្វើឡើងដោយមិនបានផ្អែកលើមូលដ្ឋានច្បាប់ណាមួយជាក់លាក់។ នេះបើយោងតាមសេចក្ដីប្រកាសព័ត៌មានមួយរបស់អង្គការក្រៅរដ្ឋាភិបាលមួយនេះ ដែលបានចេញផ្សាយកាលពីថ្ងៃពុធ ទី២៦ ខែមេសា។
ការលើកឡើងនេះ កើតឡើង ក្រោយពីក្រសួងមហាផ្ទៃ បានប្រកាសកាលពីថ្ងៃទី១៩ ខែមេសាថា សមាជិករបស់គណបក្សសង្គ្រោះជាតិ អាចនឹងត្រូវបានហាមប្រាម មិនឲ្យចូលទៅសួរសុខទុក្ខសមាជិករបស់ខ្លួនដែលកំពុងជាប់ឃុំនៅពេលខាងមុខ។
ការប្រកាសនេះ ធ្វើឡើង បន្ទាប់ពីក្រសួងមហាផ្ទៃ បានអះអាងថា អ្នកសារព័ត៌មានវិទ្យុអាស៊ីសេរីម្នាក់ គឺលោក ហួត ឃិនវុទ្ធី ហៅជុន ច័ន្ទបុត្រ បានចូលរួមជាមួយប្រតិភូគណបក្សសង្គ្រោះជាតិ ដើម្បីចូលទៅក្នុងពន្ធនាគារដោយធ្វើសេចក្ដីប្រកាសអត្តសញ្ញាណមិនត្រឹមត្រូវ ក្នុងអំឡុងពេលដែលក្រុមប្រតិភូគណបក្សប្រឆាំងចូលសួរសុខទុក្ខសមាជិករបស់ខ្លួននោះ។
មជ្ឈមណ្ឌលសិទ្ធិមនុស្សកម្ពុជា បានហៅបម្រាមរបស់អាជ្ញាធរនេះថា «ពុំមានមូលដ្ឋានផ្លូវច្បាប់»នោះទេ ទោះបីជា ក្រសួងយុត្តិធម៌ បានថ្លែងថា បម្រាមនេះ ធ្វើឡើង«ដើម្បីរក្សាសន្តិសុខសង្គមនិងសណ្ដាប់ធ្នាប់សាធារណៈ» ដោយផ្អែកតាម«គោលការណ៍នៃគោលនយោបាយរដ្ឋបាលសាធារណៈ» ក៏ដោយ។
អង្គការក្រៅរដ្ឋាភិបាលមួយនេះ បានលើកឡើងថា រដ្ឋាភិបាល មិនអាចប្រើវិធានការរដ្ឋបាល ដែលផ្ទុយនឹងច្បាប់ជាធរមានបានឡើយ ដោយបានលើកយកមាត្រា ៥៥ នៃច្បាប់ស្ដីពីពន្ធនាគារមកសំអាង។
មាត្រា ៥៥ នៃច្បាប់ស្ដីពីពន្ធនាគារនេះ ចែងថា «ជនជាប់ឃុំ ត្រូវបានអនុញ្ញាតឲ្យគ្រួសារ ឬញាតិមិត្ត មកសួរសុខទុក្ខ តាមការកំណត់ លើកលែងតែមានការហាមឃាត់ពីអាជ្ញាធរតុលាការ»។
ដូច្នេះ អង្គការសង្គមស៊ីវិលនេះ សង្កត់បញ្ជាក់ថា «ក្រសួងមហាផ្ទៃ ពុំមានសិទ្ធិអំណាចក្នុងការហាមប្រាមការចូលទៅសួរសុខទុក្ខជនជាប់ឃុំតាមរយៈសេចក្ដីសម្រេចផ្នែករដ្ឋបាលរបស់ខ្លួន ដោយពុំមានការសម្រេចពីអាជ្ញាធរតុលាការនោះឡើយ»៕
