ជុំវិញករណីអធិការរងនគរបាលខណ្ឌចំការមនម្នាក់ ដែលត្រូវបានបណ្តាញព័ត៌មានក្នុងស្រុករាយការណ៍ថា បានប្រើប្រាស់ហិង្សាវាយពលរដ្ឋក្នុងទំនាស់ពាក្យសម្តីមួយ នាយប់ថ្ងៃអាទិត្យឈានចូលថ្ងៃចន្ទនាពេលថ្មីៗនេះ អ្នកតាមដានសង្គមជំរុញឱ្យអាជ្ញាធរពាក់ព័ន្ធអនុវត្តច្បាប់ឱ្យបានតឹងរ៉ឹងលើមន្ត្រីដែលប្រើប្រាស់ហិង្សាលើពលរដ្ឋនោះ។
ពួកគេស្នើឱ្យមានការផ្តន្ទាទោសតាមផ្លូវតុលាការ ដើម្បីបញ្ចៀសកុំឱ្យមានរូបភាពបែបនេះកើតឡើងក្នុងសង្គមញឹកញាប់ និងដើម្បីធ្វើឱ្យពលរដ្ឋជឿជាក់លើការអនុវត្តការងាររបស់មន្ត្រីសាធារណៈ ក្នុងករណីមានការដោះស្រាយវិវាទចរាចរណ៍ ឬការបង្កការខូចខាតទ្រព្យសម្បត្តិឯកជន។
ប្រធានវិទ្យាស្ថានប្រជាធិបតេយ្យកម្ពុជា លោក ប៉ា ចន្ទរឿន ថ្លែងថា បើក្នុងករណីអ្នកណាម្នាក់ បង្កគ្រោះថ្នាក់ចរាចរណ៍ ឬធ្វើឱ្យខូតខាតទ្រព្យសម្បត្តិអ្នកដទៃ គឺអាជ្ញាធរមិនត្រូវប្រើប្រាស់ហិង្សាលើពលរដ្ឋនោះទេ។ ដូច្នេះក្នុងករណីប្រើប្រាស់អំពើហិង្សាបែបនេះ លោកថា អាជ្ញាធរពាព័ន្ធ ត្រូវយកចិត្តទុកដាក់អនុវត្តច្បាប់ឱ្យបានត្រឹមត្រូវ និងផ្តន្ទាទោសមន្ត្រីនគរបាលដែលប្រើប្រាស់ហិង្សាវាយដំប្រជាពលរដ្ឋ។
លោកថ្លែងប្រាប់វីអូអេថា៖ «ក្នុងនាមជាអាជ្ញាធរ គឺត្រូវយកច្បាប់មកដោះស្រាយ។ ដូច្នេះ ដើម្បីឱ្យមានភាពយុត្តិធម៌សម្រាប់ប្រជាពលរដ្ឋ និងដើម្បីកុំឱ្យវាបង្កើតនូវគំរូអាក្រក់ដល់ប៉ូលិសដទៃទៀត»។
លោកបន្ថែមថា អាជ្ញាធរពាក់ព័ន្ធដែលចូលរួមដោះស្រាយករណីខាងលើត្រូវតែផ្តោតលើការអនុវត្តច្បាប់ឱ្យបានហ្មត់ចត់ ជាពិសេសទាក់ទងមន្ត្រី និងអាជ្ញាធរមានសមត្ថកិច្ចជាប៉ូលិស ដែលមានការបំពានច្បាប់ និងសិទ្ធិអំណាច ឬការបំពេញការងារក្រោមឥទ្ធិពលនៃគ្រឿងស្រវឹង។
ក្នុងហេតុការណ៍ប៉ះទង្គិចពាក្យសម្តីកាលពីពាក់កណ្តាលអធ្រាត្រថ្ងៃអាទិត្យឈានចូលថ្ងៃចន្ទ នាវេលាម៉ោងជាង១ នៅចំណុចផ្លូវបំបែកជាបួន ស្ថិតក្នុងសង្កាត់ផ្សារដើមថ្កូវ ព្រំប្រទល់សង្កាត់បឹងត្របែក ខណ្ឌចម្ការមន រាជធានីភ្នំពេញ បុរសម្នាក់បានបើករថយន្ត PRIUS ទៅបុកខឿនផ្ទះប្រជាពលរដ្ឋបណ្តាលឱ្យខូចខាតបន្តិចបន្តួច។
ប៉ុន្តែក្រោយឧប្បតិ្តហេតុនោះ បុរសម្នាក់ទៀត ដែលជាអធិការរងនគរបាលខណ្ឌចំការមន បានលេចមុខមក ដោយជិះម៉ូតូម៉ាក PCX មកឃាត់រថយន្ត និងបានប្រើពាក្យសម្ដីមិនសមរម្យ រហូតដល់ប្រើអំពើហិង្សា វាយម្ចាស់រថយន្តនោះ។ នេះបើតាមសេចក្តីប្រកាសព័ត៌មានរបស់ស្នងការដ្ឋាននគរបាលរាជធានីភ្នំពេញបង្ហោះក្នុងបណ្តាញសង្គមហ្វេសប៊ុកកាលពីថ្ងៃចន្ទ។
អធិការរងរូបនោះ ឈ្មោះ ហ៊ួត គង់ ទទួលផែនបច្ចេកទេសកោសល្យវិច្ច័យនៃអធិការដ្ឋាននគរបាលខណ្ឌចំការមន ហើយនៅពេលដែលប្រើប្រាស់ហិង្សាលើបុរសម្ចាស់រថយន្ត គឺអធិការរងរូបនោះ ស្ថិតក្នុងស្ថានភាពស្រវឹងជោគជាំ។ នេះបើតាមសារព័ត៌មាន Fresh News ដែលស្និទ្ធនឹងរដ្ឋាភិបាល។
វីអូអេមិនទាន់អាចសុំការបញ្ជាក់ពី អ្នកនាំពាក្យស្នងការនគរបាលរាជធានីភ្នំពេញ លោក សាន សុខសីហា និង អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បាននៅឡើយទេ នៅថ្ងៃអង្គារនេះ ទាំងតាមប្រព័ន្ធទូរស័ព្ទ និងតាមបណ្តាញទំនាក់ទំនងតេឡេក្រាម។
វីអូអេក៏មិនទាន់អាចសុំការអត្ថាធិប្បាយពីលោក ហ៊ួត គង់ បានដែរ នៅថ្ងៃអង្គារនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា យល់ថា មន្ត្រីនគរបាលដែលប្រើប្រាស់ហិង្សាលើពលរដ្ឋដូចការរាយការណ៍របស់ប្រព័ន្ធផ្សព្វផ្សាយ គួរតែមានការដាក់ទោសទណ្ឌឱ្យធ្ងន់ធ្ងរ ដូចជាការដកហូតតួនាទី និងការផ្តន្ទាទោសឱ្យស្របតាមនីតិវិធីច្បាប់ព្រហ្មទណ្ឌឱ្យបានតឹងរ៉ឹង ព្រោះមន្ត្រីជាអ្នកអនុវត្តច្បាប់ និងយល់ដឹងពីច្បាប់ ហើយម្យ៉ាងទៀតដើម្បីបញ្ចៀសកុំឱ្យមានរូបភាពអាក្រក់បែបនេះ កើតឡើងក្នុងសង្គមបន្តទៀត។
បើតាមលោក ស៊ឹង សែនករុណា ការដែលមន្ត្រីនគរបាលរូបនោះ ហ៊ានប្រើប្រាស់ហិង្សាវាយពលរដ្ឋគឺអាចមកពីអាងលើអំណាចរបស់ខ្លួន ឬអាងលើអ្នកមានឥទ្ធិពលនៅពីក្រោយផងដែរ។
លោកថ្លែងថា៖ «ករណីនេះ ដើម្បីកុំឱ្យរងការរិះគន់ និងប៉ះពាល់ទៅដល់កិត្តិយស និងសេចក្តីថ្លៃថ្នូររបស់មន្ត្រី សមត្ថកិច្ចផ្សេងទៀត គួរមានវិធានការច្បាស់លាស់ណាមួយ មិនត្រូវគ្រាន់តែមានការលើកឡើង ហើយមិនឃើញមានចំណាត់ការនោះទេ។ អ៊ីចឹងគួរតែមានការដាក់ទោសទណ្ឌទៅតាមនីតិវិធីច្បាប់ឱ្យធ្ងន់ធ្ងរជាងពលរដ្ឋសាមញ្ញ ដែលមិនយល់មិនដឹងច្បាប់»។
ក្រៅពីនេះ អ្នកការពារសិទ្ធិមនុស្សរូបនេះ កត់សម្គាល់ថា កន្លងមក ក្នុងករណីវិវាទការងារនៅក្រុមហ៊ុនណាហ្គាវើលដ៏ គឺលោកក៏ឃើញរូបភាពហិង្សាលើក្រុមកូដករ ដោយសកម្មភាពវាយដំ ធាក់ពីសំណាក់កងសន្តិសុខចម្រុះ រហូតដល់មានករណីស្ត្រីក្នុងក្រុមកូដករនោះរលូតកូនជាដើម ដោយករណីទាំងនោះ ក៏មិនឃើញចាប់មន្ត្រី ឬជនបង្ក យកមកផ្តន្ទាទោសផងដែរ។ ដូច្នេះលោកថា មន្ត្រីទាំងអស់ ត្រូវតែអនុវត្តទៅតាមក្រមសីលធម៌ ប្រកបដោយការទទួលខុសត្រូវខ្ពស់ ដោយមិនត្រូវប្រើប្រាស់សិទ្ធិអំណាចរបស់ផងខ្លួន តាមតែអំពើចិត្ត ដែលផ្ទុយពីច្បាប់ និងក្រមសីលធម៌នោះទេ៕
ករណីអធិការរងនគរបាលខណ្ឌចំការមនវាយពលរដ្ឋនាំឱ្យមានការរិះគន់អំពីឥរិយាបថរបស់មន្ត្រីអនុវត្តច្បាប់
ភ្នំពេញ —
