គេរំពឹងថា ថាមពលនុយក្លេអ៊ែររបស់ប្រទេសចិននឹងជារបៀបវារៈមួយនៅក្នុងការពិភាក្សារបស់ប្រទេសនានាអំពីអន្តរកាលថាមពលនៅក្នុងសន្និសីទអាកាសធាតុ COP28 នៅទីក្រុង Dubai ពីព្រោះវាជាប្រភពថាមពលមិនមែនផូស៊ីលធំទីពីរក្នុងពិភពលោកនៃអគ្គិសនី។
ថាមពលនុយក្លេអ៊ែរជាប្រភពមួយលូតលាស់លឿនបំផុតនៅក្នុងប្រទេសចិន ដែលនៅពេលនេះឈ្នះប្រទេសបារាំងដែលជាប្រទេសផលិតថាមពលនុយក្លេអ៊ែរធំទីពីរក្នុងពិភពលោក ដោយនៅពីក្រោយតែសហរដ្ឋអាមេរិកមួយប៉ុណ្ណោះ។
ចិនចង់ផលិតថាមពលនុយក្លេអ៊ែរឱ្យបាន១០%នៃថាមពលចម្រុះរបស់ខ្លួនត្រឹមឆ្នាំ២០២៥ ក្នុងចំនួនទ្វេដងពីកម្រិតបច្ចុប្បន្ន។ ប៉ុន្តែកង្វល់អំពីសុវត្ថិភាពក្រោយឧប្បត្តិហេតុ Fukushima កាលពីឆ្នាំ២០១១បានបង្អាក់ការលូតលាស់នុយក្លេអ៊ែររបស់ប្រទេសចិន។ នេះបើតាមលោក Philip Andrews-Speed អ្នកស្រាវជ្រាវជាន់ខ្ពស់នៅវិទ្យាស្ថាន Oxford Institute of Energy Studies ក្នុងចក្រភពអង់គ្លេស។
លោកថ្លែងថា៖ «ឧប្បត្តិហេតុធ្ងន់ធ្ងរណាមួយនៅខាងក្នុងឬនៅជិតប្រទសចិនឬនៅកន្លែងណាមួយក្នុងពិភពលោកធ្វើឱ្យអន្តរាយដល់ភាពគួរឱ្យទុកចិត្តបានលើថាមពលនុយក្លេអ៊ែរ។ អ្វីដែលបានកើតមាននៅក្រោយឧប្បត្តិហេតុ Fukushima គឺចិនបានផ្អាកការកសាងរោងចក្រនុយក្លេអ៊ែរថ្មីៗទាំងអស់។ ពួកគេបាននិយាយដូច្នេះ ហើយពួកគេធ្វើតាមគោលនយោបាយនេះ គឺមិនឱ្យមានរោងចក្រនុយក្លេអ៊ែរនៅឆ្ងាយពីមាត់សមុទ្រទេ»។
ក្ដីកង្វល់អំពីសុវត្ថិភាពទាំងនេះបានពន្យឺតការលូតលាស់នុយក្លេអ៊ែរក្នុងប្រទេសចិន។ ទោះជាចិនបានស្ថាបនារោងចក្រនុយក្លេអ៊ែរទីមួយរបស់ខ្លួនកាលពីពាក់កណ្តាលទសវត្សរ៍១៩៨០ក៏ដោយ ក៏ថាមពលនុយក្លេអ៊ែរមានតែប្រមាណ៥%នៃថាមពលអគ្គិសនីចិននៅពេលសព្វថ្ងៃនេះតែប៉ុណ្ណោះ។
ទោះជាថាមពលនុយក្លេអ៊ែរស្អាតជាងការបង្កើតអគ្គិសនីដោយដុតធ្យូងថ្មហើយមានប្រសិទ្ធភាពជាងថាមពលខ្យល់និងថាមពលសូឡាពីព្រះអាទិត្យក៏ដោយ ក៏កង្វល់ខាងសុវត្ថិភាព កង្វល់អំពីកង្វះអ្នកធ្វើការមានការប៉ិនប្រសប់និងការខ្វះកន្លែងសម្រាប់កសាងរោងចក្រថ្មីៗសុទ្ធតែជាឧបសគ្គ។
លោក Andrews-Speed ថ្លែងទៀតថា៖ «ពិតណាស់ ថាមពលសូឡាពីព្រះអាទិត្យនិងថាមពលខ្យល់អាស្រ័យលើអាកាសធាតុ ហើយពេលខ្លះមិនមានពន្លឺថ្ងៃ មិនមានខ្យល់ ហើយមិនទៀងទាត់ជារៀងរាល់ថ្ងៃ។ ថាមពលនុយក្លេអ៊ែរអាចពឹងពាក់បានច្រើនជាងថាមពលឯទៀតៗ។ លោកអ្នកបើកម៉ាស៊ីន វាក៏មានដំណើរការ។ ថាមពលសូឡាពីព្រះអាទិត្យគ្មានការប្រថុយប្រថានខាងសុវត្ថិភាពដែលយើងបាននិយាយទេ។ ចំពោះថាមពលខ្យល់វិញ កង្ហារអាចធ្លាក់ហើយអាចនាំឱ្យមានមនុស្សត្រូវរបួស តែមិនមែនជាគ្រោះថ្នាក់ធំដុំទេ»។
តែទោះជាយ៉ាងណាក៏ដោយ ក៏ពួកអ្នកជំនាញនិយាយថា ការមានបច្ចេកទេសថ្មីៗធ្វើឱ្យថាមពលនុយក្លេអ៊ែរមានសុវត្ថិភាពជាងមុនច្រើន។
សន្និសីទ COP28 នឹងចាប់ផ្តើមនៅទីក្រុង Dubai នៅថ្ងៃទី៣០ ខែវិច្ឆិកា៕
ប្រែសម្រួលដោយលោក ឈឹម សុមេធ
