វ៉ាស៊ីនតោន៖ មន្ត្រីគណបក្សកាន់អំណាចបានបញ្ជាក់ថា គណបក្សប្រជាជនកម្ពុជាត្រៀមខ្លួនជាស្រេចដើម្បីសហការជាមួយគណបក្សសង្គ្រោះជាតិដើម្បីធ្វើកិច្ចការរួមគ្នា «ដោយស្មោះត្រង់»ក្នុងការដោះស្រាយបញ្ហាជាតិធំៗ និងការពង្រឹងលទ្ធិប្រជាធិបតេយ្យ។ នេះជាការអះអាងរបស់លោកឈាង វ៉ុន ប្រធានគណៈកម្មការកិច្ចការបរទេសសភា និងជាមន្ត្រីជាន់ខ្ពស់គណបក្សប្រជាជនកម្ពុជាដែលបានបញ្ជាក់ក្នុងកម្មវិធីហេឡូវីអូអេពិសេសកាលពីយប់ថ្ងៃសុក្រទី២៥ខែកក្កដាឆ្នាំ២០១៤។
«គណបក្សប្រជាជនត្រូវការចាំបាច់គណបក្សដៃគូ។ បើសិនជាគ្មានគណបក្សដៃគូទេ គ្មានលទ្ធិប្រជាធិបតេយ្យនៅកម្ពុជាទេ។ អញ្ចឹងហើយលទ្ធិប្រជាធិបតេយ្យតម្រូវឲ្យមានគូប្រជែង។ តែសួរថា តើគណបក្សប្រជាជនកម្ពុជាដូចគណបក្សសង្គ្រោះជាតិទេ? ចង់កាន់អំណាចទេ? ថាចង់។ យើងនឹងខំប្រឹងធ្វើការ ធ្វើម៉េចកុំឲ្យគណបក្សសង្គ្រោះជាតិផ្តួលយើងបាន។ យើងនឹងខំប្រឹងធ្វើការ។ ហើយយើងនឹងស្មោះត្រង់ក្នុងកិច្ចសហប្រតិបត្តិការហ្នឹង ព្រោះយើងបានចុះកិច្ចព្រមព្រៀងជាមួយគ្នារួចហើយ»។
ទោះជាយ៉ាងណាក៏ដោយ ក្រុមមន្ត្រីសង្គមស៊ីវិលនៅព្រួយបារម្ភខ្លាចថា គណបក្សកាន់អំណាចនឹងនៅតែនៅក្តោបអំណាច មិនធ្វើឲ្យស្ថាប័នជាតិមានភាពឯករាជ្យ ពលរដ្ឋមិនអាចបញ្ចេញមតិបាន ហើយព្យាយាមបង្កឧបសគ្គដល់ក្រុមជំទាស់។
តែលោកឈាង វ៉ុនបានអះអាងថា គណបក្សទាំងពីរបានសម្រេចក្នុងកិច្ចព្រមព្រៀងរួចហើយថា នឹងបម្រើពលរដ្ឋ និងរួមគ្នាដោះស្រាយបញ្ហាទុក្ខកង្វល់របស់ពលរដ្ឋ ហើយក៏បានអំពាវនាវឲ្យពលរដ្ឋទុកពេលវេលាឲ្យគណបក្សទាំងពីរធ្វើកិច្ចការសិន និងកុំឲ្យមានវប្បធម៌ភ័យខ្លាចឡើយ។
លោកបានបន្ថែមថា គណបក្សទាំងពីរនឹងបន្តធ្វើកំណែទម្រង់ជាច្រើន រួមគ្នាដើម្បីអាចឲ្យគណបក្សទាំងពីរធ្វើការជាមួយគ្នាបាន រាប់ទាំងបទបញ្ជាផ្ទៃក្នុងរដ្ឋសភាផងដែរ។ ហើយលោកថា គណបក្សប្រជាជនកម្ពុជានឹងបើកចំហរឿងធ្វើកិច្ចការជាមួយគណបក្សសង្គ្រោះជាតិតាមកិច្ចព្រមព្រៀង៕
