ភ្ជាប់​ទៅ​គេហទំព័រ​ទាក់ទង

កាកបាទក្រហម​បើក​ដំណើរការ​សណ្ឋាគារ​ប្រណិត​នៅ​ព្រះវិហារ


រូបឯកសារ៖ អ្នកភូមិ​មក​ពី​តំបន់​ជនបទ​នៅ​ប្រទេស​កម្ពុជា​អំពាវនាវ​សុំ​ស្បៀង​អាហារ​ និង​ថ្នាំពេទ្យ​នៅ​ខាងមុខ​ការិយាល័យ​កាកបាទក្រហម​កម្ពុជា ក្នុង​ទីក្រុង​ភ្នំពេញ។ (រូបថត៖ Reuters)

សណ្ឋាគារ ​ហ្រ្គីន តែល​ ផាលេស (​Green Tel Palace)​ដែល​មាន​៨០បន្ទប់​នេះ ​​ត្រូវ​បាន​សាងសង់​អស់​រយៈពេល​៣​ឆ្នាំ​ ក្រោម​ការ​ជួយ​ឧបត្ថម្ភ​​ផ្នែកហិរញ្ញ​វត្ថុ​ ពី​កាកបាទ​ក្រហម​​​សាខា​រាជធានី​ភ្នំពេញ។​

សាខា​កាកបាទ​ក្រហម​នៅ​ក្នុង​ខេត្ត​ព្រះ​វិហារ​សហការ​ជាមួយ​នឹង​សាខា​កាកបាទ​ក្រហម​រាជ​ធានីភ្នំពេញ​បាន​ដាក់​ឲ្យ​ដំណើរ​ការ​សណ្ឋាគារ​ដ៏​ប្រណិត​កម្ពស់​៦​ជាន់​មួយ​នៅ​ថ្ងៃ​នេះ ​ដើម្បី​ស្វែង​រក​ប្រាក់​ចំណូល​ឧបត្ថម្ភ​ដល់​កិច្ចការ​ងារ​សប្បុរសធម៌​របស់​ខ្លួន។

សណ្ឋាគារ ​ហ្រ្គីន តែល​ ផាលេស (​Green Tel Palace)​ដែល​មាន​៨០បន្ទប់​នេះ ត្រូវ​បាន​សាងសង់​អស់​រយៈពេល​៣​ឆ្នាំ​ ក្រោម​ការ​ជួយ​ឧបត្ថម្ភផ្នែកហិរញ្ញ​វត្ថុ​ ពី​កាកបាទ​ក្រហម​សាខា​រាជធានី​ភ្នំពេញ។​

លោក​រ័ត្ន សុភាប្រធាន​មន្ទីរ​ព័ត៌មាន​ខេត្ត​ព្រះ​វិហារ​ មាន​ប្រសាសន៍​ប្រាប់​វីអូអេ​ថា​៖

«យើង​សង្ឃឹម​ថា​ ដល់​មាន​ទៅ​ អាចរក​ចំណូល​ជួយ​ ការងារ​មនុស្ស​ធម៌​យើង​បាន ​ព្រោះ​កន្លង​មក​យើង​មាន​សង្ឃឹម​អី​ យើង​សង្ឃឹម​តែ​សប្បុរស​ជន​គេ​ជួយ។​ បើសិន​ជាយើង​មាន​អាហ្នឹង​ទៅ​ យើង​អាច​សង្ឃឹម​ ក្នុង​ការ​ជួយ​បងប្អូន​ប្រជាពលរដ្ឋ​ក្រី​ក្រ»។

លោក​បញ្ជាក់​ថា​ ការ​ដាក់​ឲ្យ​ដំណើរ​ការ​សាខា​នេះ​នឹង​មិន​ធ្វើ​ឲ្យ​ប៉ះពាល់​ដល់​គោលការណ៍​គ្រឹៈ​នៃ​កាក​បាទ​ក្រហម​កម្ពុជា​ នៅ​ក្នុង​ការ​ជួយប្រជា​ពលរដ្ឋ​ខ្មែរ​នោះ​ឡើយ។

«ដូចមិន​ខុស​អ្វី​ទេ​ ព្រោះ​អាហ្នឹង​ វាការ​ងារ​មនុស្ស​ធម៌​ បើសិន​ជាយើង​យក​ទៅ​ចាយ​វាយ​ ទិញ​អំណោចចែក​ជូន​ទៅ​ក៏​វាអស់​ ហើយ​បើយើង​យក​មក​រក​ស៊ី​អញ្ចឹង​ទៅ​ ក្រែង​លោ​មាន​ចំណេញ​ទៅ​ ក៏​យើង​ជួយ​បាន​យូរ​អង្វែង​»។​

លោក​រ័ត្ន​ សុភា ​ដែល​ក៏​ជា​ប្រធាន​ស្តី​ទី​នៃ​សាខា​កាកបាទ​ក្រហម​ខេត្តព្រះ​វិហារ​ មិន​អាច​បញ្ជាក់​បាន​ទេ​លើ​ការ​ចំណាយ​នៃ​ការ​សាងសង់​នេះ​ ពីព្រោះ​លោក​ថា​សាខា​កាកបាទ​ក្រហម​រាជធានី​ភ្នំពេញ​ ជា​ជំហរ​ពី​ក្រោយ​នៃ​ការ​សាង​សង់នេះ។​ លោក​ឲ្យ​ដឹង​ទៀត​ថា​ រូបលោក​ផ្ទាល់​ក៏​មិន​បាន​ដឹង​ថា​ សណ្ឋាគារ​នេះ​ ទទួល​បាន​ការបណ្តាក់​ទុន​ពី​ភាគី​ខាង​ណា​ខ្លះនោះ​ដែរ។​

គោល​ការណ៍​គ្រឹៈ​របស់​ចលនា​កាកបាទ​ក្រហម​ អឌ្ឍចន្ទ​ក្រហម​មាន​ចំនួន​ប្រាំពីរ​ ដែល​ត្រូវ​បាន​ប្រកាសនៅ​ទីក្រុង​វីយ៉ែនកាលពីឆ្នាំ​១៩៦៥។​ គោល​ការណ៍​ទាំងប្រាំពីរ​នោះ​ រួម​មាន​គោល​ការណ៍​មនុស្ស​ធម៌​ផងដែរ។ គោល​បំណង​របស់​គោលការណ៍​មនុស្ស​ធម៌​នេះ​ សំដៅ​ដល់​ការ​ការ​ពារ​ជីវិត​ និង​សុខភាព​ ការធានា​ការ​គោរពមនុស្ស។​ គោលការណ៍​នេះ​ ​លើក​កម្ពស់ ​ការ​យោគ​យល់​គ្នា​ទៅ​វិញ​ទៅ​មក​ ​សហ​ប្រតិបត្ដិ​ការ មិ​ត្ដ​ភាព ​និង​ស​ន្ដិ​ភាព​ស្ថិត​ស្ថិរ​ក្នុង​ចំណោម​ជន​គ្រប់​រូ​ប​។

វីអូអេ​បាន​ព្យាយាម​ទាក់​ទង​ លោក​ស្រី​ផុំ ច័ន្ទទីនី​ អគ្គលេខា​ធិការ​នៃ​កាកបាទក្រហម​កម្ពុជា​ ដើម្បី​សុំ​ការ​អធិប្បាយ​បន្ថែម​លើ​ការ​សាងសង់​និង​ដាក់​ឲ្យ​ដំណើរ​ការ​សណ្ឋាគារ​ដ៏ប្រណិតមួយនេះ​ តែ​អ្នក​ស្រី​បដិ​សេធ​មិន​ធ្វើ​ការ​អធិប្បាយ​ ហើយ​បង្វែរ​សំណួរ​ទៅ​សាខា​កាកបាទ​ក្រហម​ខេត្ត​ព្រះវិហារ​ និង​រាជធានី​ភ្នំពេញ​វិញ។ លោក​ប៉ា សុជាតិវង្ស​ អភិបាល​រាជធានី​ភ្នំពេញ​ និង​ជាប្រធាន​សាខា​កាកបាទ​ក្រហម​រាជធានី​ភ្នំពេញ​ បដិសេធ​មិន​ធ្វើ​ការ​អធិប្បាយ​ផង​ដែរ។

លោកឡោ ច័ន្ទ​អ្នក​សម្រប​សម្រួល​សិទ្ធិ​មនុស្ស​នៃ​សមាគម​អាដហុក​ប្រចាំ​នៅ​ខេត្ត​ព្រះ​វិហារ​ចង់​ឱ្យ​ផល​ដែល​បាន​មក​ពី​សណ្ឋាគារ​នេះ​បម្រើ​ដល់​ប្រយោជន៍​ពិត​ប្រាកដ​ដោយលោក​សម្តែង​ក្តី​មន្ទិល​ទៅ​លើ​តម្លា​ភាព​នៃ​ចំណូល​និង​ចំណាយ​របស់សណ្ឋាគារ​មួយនេះ​៖ ​

«បើ​តាម​ទស្សនៈ​របស់​ខ្ញុំ​ គឺ​យល់​ឃើញ​ថា​ ទោះ​បី​សណ្ឋាគារ​ហ្នឹង​ វាមាន​ភាព​ល្អប្រសើរ​ខាង​ក្រៅ​ក៏ដោយ​ ប៉ុន្តែ​ភាព​ក្នុង​ ឬក៏​ពាក់​ព័ន្ធ​ថវិការ​ប្រហែល​មិន​អាច​ ជួយ​ទៅ​ទ្រទ្រង់​ប្រជាពលរដ្ឋ​ក្រី​ក្រ​ ឬ​ក៏​ពាក់​ព័ន្ធ​គេ​ហៅ​ថា​ អ្នក​ដែល​មាន​បញ្ហា​ពិតប្រាកដ​នោះនៅ​ឡើយ​បាន​ទេ»​។

កាកបាទ​ក្រហ​ម​កម្ពុជា​កំពុង​ស្ថិត​ក្រោម​ការ​ដឹកនាំ​ដោយ​ភរិយា​លោក​នាយករដ្ឋមន្ត្រី​ហ៊ុន សែន​ គឺ​លោក​ស្រី​ប៊ុន រ៉ានី។​ ស្ថាប័ន​មនុស្ស​ធម៌​មួយ​នេះ​ ត្រូវ​បាន​គេមើល​ឃើញ​ថា​ ជាប់​ពាក់​ព័ន្ធ​នឹង​កិច្ចការ​នយោបាយ​ដោយ​សារ​តែ​មាន​ចំណង​ជាមួយ​នឹង​គណបក្ស​កាន់​អំណាច​ ដែល​កាន់​កាប់​ប្រទេស​កម្ពុជា​អស់​រយៈពេល​ជាង៣០​ឆ្នាំ​មក​ហើយ​នោះ៕

XS
SM
MD
LG