មន្ត្រីនគរបាលជាន់ខ្ពស់កម្ពុជា នៅថ្ងៃព្រហស្បតិ៍នេះ បានបដិសេធថាគ្មាន«ការិយាល័យ»របស់ទីភ្នាក់ងារស៊ើបអង្កេតសហព័ន្ធ ហៅកាត់ថា FBI (Federal Bureau of Investigation) របស់សហរដ្ឋអាមេរិកក្នុងអគ្គស្នងការដ្ឋាននគរបាលជាតិកម្ពុជាទេ។
ការបដិសេធនេះ ធ្វើឡើងពីរថ្ងៃក្រោយពីទីភ្នាក់ងារសារព័ត៌មានReuters បានចុះផ្សាយកាលពីថ្ងៃអង្គារថាទីភ្នាក់ងារ FBI នឹងបើកការិយាល័យរបស់ខ្លួននៅអគ្គស្នងការដ្ឋាននគរបាលជាតិកម្ពុជាដើម្បីជួយតាមដានរកឧក្រិដ្ឋជនអាមេរិកាំងដែលរត់គេចខ្លួនទៅកម្ពុជា។
អ្នកនាំពាក្យនគរបាលជាតិកម្ពុជា លោកឧត្តមសេនីយ៍ឯក ឆាយ គឹមឃឿន បានថ្លែងប្រាប់វីអូអេក្នុងបទសម្ភាសន៍មួយនៅថ្ងៃទី១៥ខែតុលាឆ្នាំ២០២០ថារហូតមកដល់ពេលនេះ នរគបាលកម្ពុជាមានតែកិច្ចសហប្រតិបត្តិការរួមគ្នាជាមួយសហរដ្ឋអាមេរិកក្នុងក្របខណ្ឌជាក្រុមការងាររួមមួយ (Joint Task Force) ដែលមានតែមន្ត្រីនៃទីភ្នាក់ងារ FBI និងមន្ត្រីនគរបាលកម្ពុជាប៉ុណ្ណោះ ដោយគ្មាន«ការិយាល័យ»ជាក់ស្តែងក្នុងអគ្គស្នងការដ្ឋាននគរបាលជាតិកម្ពុជាទេ។
លោកឧត្តមសេនីយ៍ឯក ឆាយ គឹមឃឿន បានថ្លែងថា៖ «ក្រុម Task Force នេះគឺជាក្រុមការងាររវាងអាមេរិកនិងអគ្គស្នងការដ្ឋាននគរបាលជាតិដែលភាគីអាមេរិកមានតំណាងពីFBIពីរបីរូប ឯខាងកម្ពុជា មានក្រុមការងារមួយដែលជាតំណាងអគ្គស្នងការដ្ឋាននគរបាលជាតិជាមួយនឹងអគ្គនាយកដ្ឋានអន្តោប្រវេសន៍។ ភាគីទាំងពីរនេះគឺជាក្រុមការងារធ្វើការជាមួយគ្នា......គាត់[ភាគីអាមេរិក]ជាដៃគូពិភាក្សាពិគ្រោះយោបល់។ ដោយឡែកប្រតិបត្តិការជាក់ស្តែងក្នុងការបង្ក្រាបគឺនគរបាលជាតិកម្ពុជា»។
ទំនាក់ទំនងទ្វេភាគីរវាងកម្ពុជានិងសហរដ្ឋអាមេរិក មានភាពរកាំរកូសក្នុងរយៈពេលប៉ុន្មានឆ្នាំថ្មីៗនេះដោយសារការរិះគន់របស់សហរដ្ឋអាមេរិកទៅលើការរំលាយគណបក្សប្រឆាំងដ៏សំខាន់នៅកម្ពុជានិងការចាប់ខ្លួនអ្នកនយោបាយនិងសកម្មជនប្រឆាំងដោយរដ្ឋាភិបាលក្រុងភ្នំពេញ ខណៈកម្ពុជាត្រូវបានមើលឃើញថាបានងាកកាន់តែស្និទ្ធទៅរកប្រទេសចិន៕
