មេដឹកនាំនៃប្រទេសកម្ពុជាបានចូលរួមជាមួយមេដឹកនាំពិភពលោកក្នុងការរំលែកទុក្ខសម្រាប់ជនរងគ្រោះដែលរងការវាយប្រហារដោយអំពើភេរវកម្មនៅស្ថានទូតបារាំងក្នុងរាជធានីភ្នំពេញ។ ការចូលរួមរំលែកទុក្ខនេះធ្វើឡើងប៉ុន្មានថ្ងៃប៉ុណ្ណោះក្រោយមានការវាយប្រហារក្នុងប្រទេសបារាំង ដែលមានមនុស្ស ស្លាប់ និងរបួសជាច្រើន។
ក្រោយពីមានការវាយប្រហារដោយអំពើភេរវកម្ម ដែលបណ្តាលឲ្យមនុស្សស្លាប់ជាង១២០នាក់ និងរបួសជាង៣០០នាក់ នៅទីក្រុងប៉ារីសកាលពីចុងសប្តាហ៍កន្លងទៅនេះ លោកនាយករដ្ឋមន្ត្រី ហ៊ុន សែន នៃប្រទេសកម្ពុជាបានដឹកនាំគណៈប្រតិភូដែលមានសមាជិកជាមន្ត្រីរដ្ឋាភិបាលជាន់ខ្ពស់ទៅចូលរួមរំលែកទុក្ខ នៅស្ថានទូតបារាំងប្រចាំរាជធានីភ្នំពេញ។
នៅក្នុងគេហទំព័ររបស់លោក លោកនាយករដ្ឋមន្ត្រី ហ៊ុន សែន បានសរសេរនៅថ្ងៃនេះថា អំពើភេរវកម្មសម្លាប់មនុស្សអស់១២៩នាក់ និងរបួសជាង៣០០នាក់នេះគឺជាអំពើឧក្រិដ្ឋកម្ម មិនមែនតែសម្រាប់ពលរដ្ឋបារាំងទេ ប៉ុន្តែជាអំពើឧក្រិដ្ឋកម្មប្រឆាំងនឹងមនុស្សជាតិទូទៅ ដែលត្រូវតែទប់ស្កាត់ឲ្យបាន។
«កម្ពុជាគឺឈរជាមួយពលរដ្ឋ និងរដ្ឋាភិបាលបារាំងព្រមទាំងជាមួយប្រទេសដទៃៗទៀត ដើម្បីទប់ស្កាត់ និងឈានទៅបំបាត់ទាំងស្រុងនូវអំពើភេរវកម្មគ្រប់ប្រភេទដែលប្រឆាំងនឹងមនុស្សជាតិ»។
លោក ហ៊ុន សែន ដែលទើបវិលត្រឡប់មកពីបំពេញទស្សនកិច្ចនៅប្រទេសបារាំងថ្មីៗនេះ បានថ្លែងថា កម្ពុជាសូមចូលរួមរំលែកទុក្ខយ៉ាងក្រៀមក្រំបំផុត ជាមួយក្រុមគ្រួសារ អ្នករងគ្រោះទាំងអស់ និងជាមួយរដ្ឋាភិបាលប្រទេសបារាំង។
ក្រុមមន្ត្រីគណបក្សជំទាស់គឺគណបក្សសង្គ្រោះជាតិក៏បានទៅស្ថានទូតបារាំង ចូលរួមក្នុងការរំលែកទុក្ខចំពោះជនរងគ្រោះ ដែលត្រូវគេវាយប្រហារដ៏ឃោរឃៅ គ្មានគិតពីសិទ្ធិមនុស្សនេះដែរ។ នេះបើតាមការអះអាងរបស់លោក ម៉ែន ថាវរិន្រ្ទ តំណាងរាស្ត្រមួយរូបនៃគណបក្សសង្គ្រោះជាតិ ដែលមានសញ្ជាតិបារាំង។
លោកបានរៀបរាប់ថា លោកមានការរន្ធត់ដែរ ពេលកើតព្រឹត្តិការណ៍វាយប្រហារនៅទីក្រុងប៉ារីស ដែលមានបងប្អូន និងញាតិមិត្តរបស់លោករស់នៅច្រើននោះ។
«រន្ធត់ភ្លាមៗបាទ ព្រោះទោះជាក្រុមគ្រួសារខ្ញុំវ៉ាកង មកលែងនៅស្រុកខ្មែរយើង ទាំងអស់គ្នាមែន តែយើងមានបងប្អូននៅទីនោះ។ យើងវ៉ៃសារទាក់ទងគ្នាព្រោះមានខ្លះបាត់។ ដូចជាក្មួយស្រីខ្ញុំបាត់តាំងពីម៉ោងបីជាង ព្រោះគេបិទមិនឲ្យមានការចេញចូលទៅណាមកណា»។
ក្រុមមេដឹកនាំពិភពលោកបានចូលរួមបង្ហាញពីក្តីរន្ធត់ និងថ្កោលទោសលាយឡំ និងការប្តេជ្ញាចិត្តថា នឹងប្រយុទ្ធប្រឆាំងនឹងអំពើភេរវកម្ម ដែលបានប្រព្រឹត្តដោយក្រុមជ្រុលនិយម។
សេចក្តីរាយការណ៍ពីទីក្រុងក្រុងឡុងដ៍ដែល VOA បានទទួល បានឲ្យដឹងថា លោកនាយករដ្ឋមន្ត្រីអង់គ្លេស David Cameron បានរិះគន់ពួកជនសកម្មប្រយុទ្ធរដ្ឋឥស្លាមថា ជា «ពួកឃាតករឃោរឃៅ និងគ្មានចិត្តមេត្តា» ហើយលោកបានមានប្រសាសន៍ថា ប្រទេសអង់គ្លេសនឹងបង្កើនការខិតខំប្រឹងប្រែងរបស់ខ្លួនដើម្បីកម្ចាត់ «មនោគមវិជ្ជាប្រកបដោយពិសពុល និងជ្រុលនិយមនេះ»។
លោកប្រធានាធិបតីស.រ.អា.បារ៉ាក់ អូបាម៉ា បានប្តេជ្ញាជួយប្រទេសបារាំងក្នុង«ការតាមប្រមាញ់ពួកឧក្រិដ្ឋជន» ដែលបានធ្វើការវាយប្រហារនៅក្នុងទីក្រុងប៉ារីសកាលពីថ្ងៃសុក្រ ហើយលោកបានមានប្រសាសន៍ថា លោកគ្រោងនឹង«បង្កើន»នូវកិច្ចខិតខំប្រឹងប្រែងដើម្បីកម្ចាត់ក្រុមរដ្ឋឥស្លាម។
ពួកជនសកម្មប្រយុទ្ធរដ្ឋឥស្លាមបានអះអាងប្រកាសទទួលខុសត្រូវការវាយប្រហារដ៏ប្រល័យនៅក្នុងក្រុងប៉ារីស ដែលនៅទីនោះក្រុមទាហានបានចេញបំពេញកាតព្វកិច្ចកាលពីថ្ងៃសៅរ៍ដើម្បីយាមល្បាតប្រឆាំងនឹងការវាយប្រហារថែមទៀត។
កាលពីថ្ងៃសៅរ៍ ពួកភេរវជននេះប្រកាសថា ការវាយប្រហារ៦លើកដែលកើតឡើងដំណាលគ្នាដែលបានបណ្តាលឱ្យមនុស្សយ៉ាងតិចណាស់១២៧នាក់ស្លាប់នៅក្នុងក្រុងប៉ារីសនោះគឺជាការឆ្លើយតបនឹងការវាយប្រហារតាមអាកាសប្រឆាំងនឹងពួកយុទ្ធជនរដ្ឋឥស្លាមនៅក្នុងប្រទេសអ៊ីរ៉ាក់ និងប្រទេសស៊ីរី។ សារនេះបាននិយាយថា ប្រទេសបារាំង និងក្រុមអ្នកគាំទ្របារាំង«នឹងនៅតែឋិតក្នុងលំដាប់លើគេក្នុងបញ្ជីនៃគោលដៅវាយប្រហាររបស់ពួករដ្ឋឥស្លាម»។
លោកប្រធានាធិបតី Franscois Hollande បានប្រកាសការកាន់ទុក្ខថ្នាក់ជាតិចំនួនបីថ្ងៃនៅទូទាំងប្រទេស។ លោកបានបន្ទោសជាពិសេសលើពួករដ្ឋឥស្លាមចំពោះយប់នៃសេចក្តីរន្ធត់នោះ ហើយលោកបានហៅការវាយប្រហារទាំងនោះថាជា«សកម្មភាពសង្គ្រាមមួយ»៕
