ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មេដឹកនាំ​កម្ពុជា​បញ្ចប់​ទស្សនកិច្ច​នៅ​ឥណ្ឌា​ជាមួយ​ការ​ព្រមព្រៀង​លើ​ឥណទាន​សម្បទាន​⁣ថ្មី​​រាប់​សិប​លាន​ដុល្លារ


នាយករដ្ឋមន្ត្រីឥណ្ឌាលោក Narendra Modi ទៅចូលរួម​ក្នុង​ទិវាសាធារណរដ្ឋ នៅ​ក្នុងទីក្រុង ញូវ ដេលី ប្រទេស​ឥណ្ឌា កាលពីថ្ងៃទី២៦ ខែមករា ឆ្នាំ២០១៨។ (រូបភាព៖ Reuters)

នាយករដ្ឋមន្ត្រី​កម្ពុជា​ លោក​ ហ៊ុន សែន​ បាន​វិលត្រឡប់​មក​កាន់​ប្រទេស​វិញ​នៅ​ថ្ងៃ​អាទិត្យ​ម្សិល​មិញ​នេះ ក្រោយពី⁣​បាន​ចូលរួម​ក្នុង​កិច្ច​ប្រជុំ​ជាច្រើន​និង⁣​បាន​ជួប​ជាមួយ​⁣ក្រុម⁣​មេដឹកនាំ​កំពូលៗ​របស់​ឥណ្ឌា។ ក្នុង​⁣ដំណើរ​ទស្សនកិច្ច​រយៈពេល​បីថ្ងៃ​ លោក​⁣ហ៊ុន សែន និង⁣ក្រុម​គណៈ​ប្រតិភូ​របស់​លោក​បាន​ចុះ​កិច្ច​ព្រម​ព្រៀង​ចំនួន​បួន​ ដែលផ្តោត​លើ​ការ​ប្រឆាំង​សកម្មភាពឧក្រិដ្ឋ​ ការ​ផ្លាស់​ប្តូរ​វិស័យវប្បធម៌​ និង​ការ​ផ្តល់​ឥណទាន​សម្បទាន​រាប់សិប​លានដុល្លារ​ដើម្បីអភិវឌ្ឍន៍​​វិស័យ​ថាមពល​​ និងធនធានទឹក។

នាយករដ្ឋមន្ត្រី​ខ្មែរ​លោក​ ហ៊ុន សែន​ បាន​បញ្ចប់​ទស្សនកិច្ច​រយៈពេល​បី​ថ្ងៃ​ នៅ​ប្រទេស​ឥណ្ឌា​ ជា​ទី​⁣ដែល​លោក​បានស្នើ​ឲ្យ​អ្នក⁣វិនិយោគ⁣​ឥណ្ឌា​មក⁣​បោះទុន​ធ្វើ​ពាណិជ្ជកម្ម​នៅ​ប្រទេស​កម្ពុជា​ និង​បាន​ស្នើ​ដល់​រដ្ឋាភិបាល​ឥណ្ឌា​ឲ្យ​ជួយ⁣កម្ពុជា​⁣ ក្នុង​ការ​ធ្វើ​ឲ្យ⁣ជឿនលឿន​ទៅមុខ​នៃ​វិស័យ​កសិកម្ម​តាម​ប្រព័ន្ធ​ព័ត៌មាន​វិទ្យា។ ភាគី​កម្ពុជា​ និង​⁣ឥណ្ឌា​⁣ក៏​បាន​ចុះ​កិច្ច​ព្រមព្រៀង​ជា​ច្រើន​ ដែល​ផ្តោត​លើ​កិច្ច​សហ​ប្រតិបត្តិការ​រវាង​ប្រទេស​ទាំងពីរ​និង​ការ​ផ្តល់​ឥណទាន​សម្បទាន​រាប់​សិបលាន​ដុល្លារ​ផងដែរ។ នេះ​បើ​យោង​តាម​ព័ត៌មាន​នានា​ដែល⁣បាន​បង្ហោះ​លើ​ទំព័រ​ហ្វេសប៊ុក​របស់​លោក​ ហ៊ុន សែន​ និង​សេចក្តី⁣ថ្លែងការណ៍រួម​របស់​ក្រសួង​ការបរទេស​ និង​សហ​ប្រតិបត្តិការ​ដែល​បាន​ចេញ​ផ្សាយ​ជា​សាធារណៈកាល​ពី​ថ្ងៃ​អាទិត្យ។​

ក្នុង​ដំណើរ⁣​ទស្សនកិច្ច​ផ្លូវការ​របស់​លោក​នាយក⁣រដ្ឋមន្ត្រី⁣ ហ៊ុន សែន​ ទៅកាន់​ប្រទេស​ឥណ្ឌា​ចាប់​ពីថ្ងៃ​ទី​២៤​ ដល់​ថ្ងៃ​ទី​ ២៧​ ខែមករា​ ឆ្នាំ​ ២០១៨​ លោក​ ហ៊ុន សែន​ ដែល⁣ស្ថិត​ក្នុង⁣អំណាច​ជាង​បីទសវត្សរ៍ បាន​ដឹកនាំ​គណៈប្រតិភូ​កម្ពុជា​ទៅ​ទស្សន​កិច្ច​ក្រសួង​អេឡិច​ត្រូនិច និង​បច្ចេកវិទ្យាឥ​ណ្ឌា​និង​ចូលរួម⁣ពិធី​បើក​កិច្ច​ប្រជុំ​កំពូល​រំឭក​អនុស្សាវរីយ៍​២៥ឆ្នាំ អាស៊ាន- ឥណ្ឌា (ASEAN-India Commemorative Summit) និង​ចូលរួម​ទស្សនា​ក្បួន​ព្យុហយាត្រា​នៃ​ទិវា​សាធារណរដ្ឋ⁣​លើក​ទី៦៩ របស់​⁣សាធារណរដ្ឋ​ឥណ្ឌា (69th Republic Day)។​

លោក​ ហ៊ុន សែន​ ក៏​បាន​ជួប​ពិភាក្សា​ជាមួយ​ក្រុម​មេដឹកនាំ​ឥណ្ឌា​ជាច្រើន​ ក្នុងនោះ​រួមមាន​លោក ​រ៉ាម​ ណាតកូវីន (RamNat Kovind) ប្រធានាធិបតីឥណ្ឌា​ លោក​ វ៉េន​កៃ​អា​ ណៃឌូ (Venkaiah Nai du)​ អនុប្រធានាធិបតី​ឥណ្ឌា​ លោក​ ណារិនដ្រា​ ម៉ូឌី​ (Narendra Modi) នាយរដ្ឋមន្ត្រី​ឥណ្ឌា​ អ្នកស្រី ស៊ូស្មា​ ស្វារ៉ាជ (Smt Sushma Swaraj) រដ្ឋមន្ត្រីការបរទេស​ឥណ្ឌា។លោក​បាន​⁣អនុញ្ញាត​⁣ឲ្យ លោក Rahul Gandhi ប្រធាន​សភា​ជាតិ​ឥណ្ឌា​ និង​កូនប្រុស​របស់​លោក រ៉ាស៊ី គន្ធី អតីត​⁣នាយក⁣រដ្ឋមន្រ្តី​ឥណ្ឌា លោក ម៉ាន់ ម៉ូហាន់ស៊ីង អតីត​នាយករដ្ឋមន្រ្តី ​ឥណ្ឌា​ ចូល​ជួប​សម្តែង​ការគួរ​សម​ និង​ពិភាក្សាការងារ​ ហើយ​ក៏​បាន​ដឹកនាំប្រតិភូ​កម្ពុជា​ជួប⁣​ជាមួយ​ក្រុម​មន្ត្រីនៃ​ប្រទេស​ឥណ្ឌា​ ដែលមានលោក ​Modi​ ជា​ប្រមុខ​ ហើយ​លោក​ក៏​បាន​ចូលរួម​ក្នុង​វេទិកា​ធុរកិច្ច​ឥណ្ឌា​កម្ពុជា​ផង​ដែរ។

យោង​តាម​វីដេអូ​ឃ្លីប​ដែល​បង្ហោះ​លើ​ទំព័រ​ហ្វេសប៊ុក​ លោក​ ហ៊ុន សែន កាល​ពី​ថ្ងៃ​សៅរ៍​ លោក​ ហ៊ុន សែន​ ត្រូវ​គេ​ឃើញ​ថា​ បាន​ថ្លែង​ក្នុង​⁣ពិធី​⁣ប្រកាស​ព័ត៌មាន​រួម បន្ទាប់​ពី⁣​ការ⁣​ចុះ​ហត្ថលេខា​លើ​កិច្ចព្រម​ព្រៀង​ចំនួន​បួន។ លោក​ ហ៊ុន សែន​ បាន​ថ្លែង​ថា​ លោក⁣​ធ្លាប់​បាន⁣​ទៅ​បំពេញ​ទសន្សកិច្ច​នៅ​ប្រទេស​តាំង​ពី​ឆ្នាំ​ ១៩៨១​ គឺ​រយៈ​ពេល​៣៧ឆ្នាំ​មក​ហើយ​រហូត​មក​ដល់​ពេល​នេះ។ ​សម្រាប់​ទស្សនកិច្ច​របស់​លោក​នា​ពេល​នេះ​ គឺ​លោក​ផ្តល់​តម្លៃ​លើប្រព័ន្ធ​ព័ត៌មាន​វិទ្យារបស់​ឥណ្ឌា​ ដែល​អាច​នឹង​ជួយ​កម្ពុជា​ក្នុង​វិស័យ​កសិកម្ម។

«ទស្សនកិច្ច​របស់​ខ្ញុំ​លើក​នេះ​ ខ្ញុំបាន​រក​ឃើញ​ចំណុច​ពិសេស​មួយ​ដែល​ឥណ្ឌា​អាច​មាន​លទ្ធភាព​នឹង​ជួយ​ដល់​កម្ពុជា​ នៅ​ក្នុងការ⁣ប្រើ​បច្ចេក​វិទ្យា​ព័ត៌មាន​ ប្រើ​ឌីជីថល​ ទៅ​ក្នុង​ការ​ជួយ⁣​ទៅ​ក្នុង​វិស័យ​កសិកម្ម​ ដែល​ក្នុង​នោះ​ ខ្ញុំបាន​ស្នើ​ចំពោះ​ឯកឧត្តម​នាយករដ្ឋមន្ត្រី​ ដើម្បី​ផ្តល់​នូវគម្រោងជា​អាទិភាព​ទៅក្នុងការ​វិភាគ​អំពី​គុណភាព​ដី​សម្រាប់​បែង​ចែក​តំបន់​ដាំដុះ។ ចំណុច​នេះ​ គឺ​ជា​ចំណុច​ដែល​ឥណ្ឌា​មាន​លទ្ធភាព​ខ្ពស់​បំផុត​ នៅ​ក្នុង​ការ​ជួយ​ទៅដល់​កម្ពុជា​ ហើយ​ជួយដល់​កសិករកម្ពុជា»។

ថ្លែង​នៅ​ក្នុង​ពិធី​ដដែល​នោះ​ លោក ហ៊ុន សែន ​ក៏បាន​ស្នើ​ឲ្យ​អ្នកវិនិយោគ​មក​ដាក់​ទុន​រក​ស៊ី⁣​នៅ​កម្ពុជា​ផង​ដែរ។ លោក​ថា​ ដើម្បី​ឲ្យ​ដំណើរការវិនិយោគ​របស់​ឥណ្ឌា​ វិវត្តន៍​ទៅ​មុខ​ឆាប់រហ័ស​ លោក​បាន​ស្នើ​ឲ្យ​លោក​នាយករដ្ឋមន្ត្រី​ Modi មក​បំពេញ​ទស្សនកិច្ច​នៅ​កម្ពុជា​ក្នុង​ពេល​សមស្រប​ណាមួយ។ លោក​បាន​លើក​ឡើង​យ៉ាងដូច្នេះ។

«អ្វីដែល​ខ្ញុំ​សង្ឃឹម​រង់ចាំ​ គឺ​ឯកឧត្តមនាយករដ្ឋមន្ត្រី​ នឹង​ធ្វើ​ទស្សនកិច្ច​នៅ​ព្រះរាជាណាចក្រ​កម្ពុជា​ តាម​ពេល​វេលា​សមស្រប​ ព្រោះថា​ គឺ​ទស្សនកិច្ច​របស់​ឯកឧត្តម​នឹង​អាច​នាំ​មក​នូវ​ជោគ​ជ័យ​នៃ​កិច្ច​សហប្រតិបត្តិការ​បន្ថែម​ទៀត​ ជា​ពិសេស​គឺ​ជំរុញ​អ្នក​វិនិយោគ​និង​អ្នក​ទេសចរ​របស់​ឥណ្ឌា​ទៅ​កាន់​ព្រះរាជាណាចក្រ​កម្ពុជា»។

VOA មិន​ទាន់​អាច​ទទួល​បាន​ការ​អធិប្បាយ​ពី​លោក​ ជុំ​ សុន្ទរី​ អ្នកនាំពាក្យ​ក្រសួង​ការ​បរទេស​ និង​សហប្រតិបតិ្តការ​អន្តរជាតិ​កម្ពុជា​បាន​ទេ​កាលពីថ្ងៃ​អាទិត្យ​ ដោយ​ទូរស័ព្ទ​លោក​រោទិ៍​តែ​⁣គ្មាន​អ្នកទទួល។​

យោងតាមសេចក្តីថ្លែង​ការណ៍រួម​ស្តីពី​ទស្សនកិច្ច​ផ្លូវការរបស់​លោកនាយករដ្ឋមន្ត្រី​ ហ៊ុន សែន​ ចេញ​ផ្សាយ​នៅ​ថ្ងៃ​ទី​២៨​ ខែ​មករា​ ឆ្នាំ​ ២០១៨​នេះ​ បាន​ឲ្យ​ដឹង​ថា​ ឆ្លើយតប​ទៅ​នឹង​ការ​លើកឡើង​របស់​លោក​ ហ៊ុន​ សែន ចំពោះ​កិច្ច​ការ​ព័ត៌មានវិទ្យា លោក​ Modi ​នាយករដ្ឋមន្ត្រី​ឥណ្ឌា «បាន​ស្វាគមន៍​ចំពោះ​សំណើ⁣របស់​នាយករដ្ឋមន្ត្រី​កម្ពុជា​ ក្នុងការ​ជួយ​បណ្តុះបណ្តាល​យុវជនកម្ពុជា​ លើ​ផ្នែក​ព័ត៌មានវិទ្យា។ ក្នុង​ន័យនេះ​ នាយក⁣រដ្ឋមន្ត្រី​ឥណ្ឌា​ បាន​ប្រកាស​ពីការ​គាំទ្រ​របស់​រាជរដ្ឋាភិបាល​ឥណ្ឌា​ក្នុងការ​បង្កើត​មជ្ឈមណ្ឌល​ព័ត៌មាន​វិទ្យា​មួយ​ដ៏ប្រសើរ​បំផុត​នៅ​កម្ពុជា»។

លោក​ Modi ក៏​បាន​សម្តែង​អំណរគុណ​ចំពោះ លោក ហ៊ុន សែន ក្នុង​ការ​អញ្ជើញ​លោកទៅ​បំពេញ​ទស្សនកិច្ច​តប​វិញ​នា​ពេល​អនាគត​ ដើម្បី​ពង្រឹង​ថែម​ទៀត​នូវ​មិត្តភាព​ និង​កិច្ច​សហ​ប្រតិបត្តិការ​រវាង​ប្រទេស​ទាំងពីរ។

សេចក្តី​ថ្លែងការណ៍​បាន​បន្ត​ឲ្យ​ដឹង​ទៀត​ថា​ ភាគីកម្ពុជា​និង​ឥណ្ឌា​ បាន​ចុះ​កិច្ចព្រម​ព្រៀង​ចំនួន​បួន​ ដែល​រួម​មាន​ អនុស្សារណៈ​នៃ​ការ​យោគយល់​គ្នា​ស្តី​ពី​ការ​ទប់​ស្កាត់​ ការ​ជួញដូរ​មនុស្ស​ សន្ធិសញ្ញា​ស្តី​ពី​ការ​ជួយ​គ្នា​ទៅវិញ​ទៅ​មក​ផ្នែក​ច្បាប់​លើ​បញ្ហា​ព្រហ្មទណ្ឌ​ កម្មវិធី​ផ្លាស់ប្តូរវប្បធម៌​ កិច្ច​ព្រមព្រៀង​ឥណទាន​សម្បទាន​ចំនួន​ជិត៣៧​លាន​ដុល្លារ​អាមេរិក​សម្រាប់​គម្រោង​អភិវឌ្ឍន៍​ធន​ធាន​ទឹក​ស្ទឹង​ស្វាហាប់។

ពាក់​ព័ន្ធនឹង​បញ្ហា​ឥណទានសម្បទាន​នេះ​ ភាគីកម្ពុជា​ និង​ឥណ្ឌា​ បាន​ឯកភាព​គ្នា​អំពី​ការ​ផ្តល់​ឥណទាន​សម្បទាន​ចំនួន​ ២០លានដុល្លារ​ដោយ​ឥណ្ឌា​ សម្រាប់​ការ​សាងសង់​ខ្សែបញ្ជូន​អគ្គិសនី​នៅ​កម្ពុជា​ ហើយ​ឯកភាព​គ្នា​រៀបចំការចុះ​ហត្ថលេខា​ក្នុងពេល​អនាគត​ដ៏ខ្លីខាងមុខ។ រដ្ឋាភិបាល​ឥណ្ឌា​ ក៏បាន​លើក​ពី​បំណង​ចង់​ផ្តល់​ឥណទាន​បន្ថែម​សម្រាប់​គម្រោង​ហេដ្ឋា​រចនា​សម្ព័ន្ធ​នៅ​កម្ពុជា​ រួមមាន​ក្នុងវិស័យ​សុខាភិបាល​ (បង្កើត​មន្ទីរពេទ្យ​ឯកទេស​កម្រិត​ខ្ពស់) និង​ការ​តភ្ជាប់​ (ផ្លូវថ្នល់​ ផ្លូវ​ដែក​ និង​ឌីជីថល)។

ភាគីទាំងពីរ​បាន​ព្រមព្រៀង​ និងពិភាក្សាគ្នា​លើកិច្ចការ​ងារ​ជាច្រើន​ទៀត​ រួម​មាន​បញ្ហា​ទំនាក់​ទំនង​សេដ្ឋកិច្ច​ ការតភ្ជាប់​ ការ​ការពារជាតិ​ និងសន្តិសុខ​ វប្បធម៌​ អប់រំ​ និងការ​ផ្លាស់​ប្តូរ​រវាង​ប្រជាជន​ និង​ប្រជា​ជន​ កិច្ច​សហប្រតិបត្តិ​ការ​អភិវឌ្ឍន៍​ និង​កិច្ច​សហ​ប្រតិបត្តិការ​ក្នុង​តំបន់។ នេះ​បើ​យោង​តាម​ការ​បញ្ជាក់​របស់​សេចក្តី​ថ្លែងការណ៍​រួម​ចេញ​ផ្សាយ​ដោយ​ក្រសួងការបរទេស​និង​សហប្រតិបត្តិការ​អន្តរជាតិ​កាលពី​ថ្ងៃអាទិត្យ។

សេចក្តីថ្លែងការណ៍​រួម​ដដែល​បាន​បញ្ជាក់​ឲ្យ​ដឹង​បន្ថែម​ថា​ ថា្នក់​ដឹកនាំ​ទាំងពីរ​បាន​អំពាវនាវ​ឲ្យ​ប្រជាជាតិ​ទាំងអស់ ប្រកាន់​យក​នូវ​វិធីសាស្ត្រ​ទូលំទូលាយ​មួយ​ ដើម្បី​ប្រយុទ្ធ​ប្រឆាំង​នឹង​ភេរវកម្ម​ ក្នុងនោះ​ រួមទាំង​កម្លាំង​ភេរវករ​អន្តរជាតិ​ ការ​ទប់ស្កាត់​ប្រភព​ផ្តល់​ហិរញ្ញវត្ថុ​ភេរវកម្ម​ ដែលមាន​ជា​អាទិ៍​ ឧក្រិដ្ឋកម្ម​ជាប្រព័ន្ធ​ ការ​លាងលុយ​ ការ​ផ្គត់​ផ្គង់អាវុធ​ប្រល័យ​លោក​ ការ​ជួញដូរ​គ្រឿង​ញៀន​ និង​សកម្មភាព​ឧក្រិដ្ឋកម្ម​ផ្សេងៗ​ ការ​បំផ្លាញ​ចោលមូលដ្ឋាន​ភេរវករ​ ប្រយុទ្ធប្រឆាំង​ការ​ប្រើប្រាស់​ប្រព័ន្ធ​អ៊ីន​ធើណិត​ និង​បណ្តញសង្គម​ ក៏ដូច​ជា​បច្ចេកវិទ្យា​ព័ត៌មាន​ និង​គមនាគមន៍​ដោយ​ពួក​ភេរវករ។

ថ្នាក់ដឹកនាំ​នៃប្រទេស​ទាំង​ពីរ​ ក៏បាន​សង្កត់​ធ្ងន់​អំពីសារៈសំខាន់​នៃការ​កែទម្រង់ក្រុម​ប្រឹក្សា​សន្តិសុខ​អង្គការ​សហប្រជាជាតិ​ឲ្យ​បាន​កាន់​តែ​ឆាប់​ ដើម្បី​ឲ្យ​ស្ថាប័ន​នេះឆ្លុះ​បញ្ជាំង​ពី​តថភាព​ និង​មុខងារ​ពេល​បច្ចុប្បន្ន​ ប្រកប​ដោយ​គណនេយ្យភាព ភាព​ជា​តំណាង​ និង​ប្រសិទ្ធិភាព​ជាងមុន។

សេចក្តីថ្លែងការណ៍​រួម​របស់​ក្រសួង​ការបរទេស​កម្ពុជា​ បាន​សរសេរ​ក្នុង​ន័យ​ដើម​ថា៖

«ភាគីកម្ពុជា​បញ្ជាក់​ជា​ថ្មី​ពីការ​គាំទ្រ​បេក្ខភាព​ឥណ្ឌា​ ជា​សមាជិក​អចិន្រ្តៃយ៍​នៃក្រុម​ប្រឹក្សា​សន្តិសុខ​អង្គ​ការ​សហប្រជាជាតិ​ ក្រោយ​ពីមាន​ការកែទម្រង់​ និងពង្រីក។ ភាគីឥណ្ឌា​បាន​បញ្ជាក់​ជាថ្មី​ពីការ​គាំទ្រ​បេក្ខភាព​កម្ពុជា​ ជា​សមាជិកនៃក្រុមប្រឹក្សា​សេដ្ឋកិច្ច​ និង​សង្គមរបស់​អង្គការ​សហប្រជាជាតិ​សម្រាប់​អាណត្តិ​ឆ្នាំ​២០១៩»។

ប្រទេស​ឥណ្ឌា​ ត្រូវគេរាយការណ៍​ថា​ អាចក្លាយ​ជា​ក្បាល​ម៉ាស៊ីន​ដ៏សំខាន់​មួយ​ ក្នុងការ​ជំរុញ​ឲ្យមាន​កំណើន​សេដ្ឋកិច្ច​សាកល​ កាលពី​ឆ្នាំ​២០១៦​ គឺ​នៅ​ពេល​ដែលប្រទេស​បាន​ឃើញ​កំណើនសេដ្ឋកិច្ច​ក្នុង​កម្រិត​ជាង​ ៧ភាគរយ។ ក៏ប៉ុន្តែ​ សេដ្ឋកិច្ច​ឥណ្ឌាបាន​ចុះ​ថមថយ​ មកវិញ​នៅត្រឹម​កម្រិត​ ៥.៧​ភាគរយ​ ក្នុង​ត្រីមាស​ទីមួយ​ឆ្នាំ​ ២០១៧​ ដោយសារ​តែ​វិធានការ⁣លុបបំបាត់​ចរាចរ​លុយ​សុទ្ធ​ប្រមាណ​៨៦ភាគរយ​កាលពី​ខែវិច្ឆិកា​ ឆ្នាំ​២០១៦​ និង​ការ​រុះរើ​វិធានការ​ពន្ធ​ ដោយបាន​កែប្រែ​ពីប្រព័ន្ធ​ពន្ធ​របស់​រដ្ឋ​ និង​សហភាព​ មក​ជា​ប្រព័ន្ធ​ពន្ធលើ​សេវាកម្ម​ និង​ទំនិញ​ ដែលគេស្គាល់​ GST។

ដើម្បី​រក្សា​លំនឹង​សេដ្ឋកិច្ចរបស់​ខ្លួន​រដ្ឋាភិបាល​ឥណ្ឌា​ បាន​ដាក់ចេញ​វិធានការ⁣សង្គ្រោះ​វិស័យ​ធនាគារ​សាធារណៈដោយមាន​ទឹកប្រាក់​ប្រមាណ៣២ពាន់លាន​ដុល្លារ​អាមរិក។ ការណ៍នេះ​បាន​ធ្វើ​ឲ្យ​រដ្ឋាភិបាល​របស់​លោក​ Modi ជួបបញ្ហា​ប្រឈម​ជាច្រើន​មក​ដល់​ឆ្នាំ​២០១៨នេះ៕

XS
SM
MD
LG