ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រសួង​ការងារ​អំពាវនាវ​ឱ្យ​មាន​ការ​សម្រួល​ដល់​ការ​ចុះ​បញ្ជី​របស់​សហជីព 


រូបឯកសារ៖ លោក អ៊ិត សំហេង​ រដ្ឋមន្រ្តី​ក្រសួង​ការងារ​និង​បណ្តុះបណ្តាលវិជ្ជាជីវៈ ​និយាយ​ជាមួយ​អ្នក​កាសែត​បន្ទាប់ពី​កិច្ច​ប្រជុំ គណៈកម្មការ​ប្រឹក្សា​ការងារ​អាណត្តិ​ទី​០៨​នៅរសៀលថ្ងៃ​ព្រហស្បតិ៍ទី​០៥ ខែតុលា ឆ្នាំ ២០១៧។ (ហ៊ុល រស្មី/VOA)

រដ្ឋ​មន្រ្តី​ក្រសួង​ការងារ​កម្ពុជា​បាន​ចេញ​សេចក្តី​ណែនាំ​បន្ថែម​ទៀត​ឲ្យ​មន្រ្តី​ពាក់ព័ន្ធ​របស់​ខ្លួន​ចូល​រួម​ក្នុង​ការ​ធានា​ ​និង​លើក​កម្ពស់​សិទ្ធិ​សេរីភាព​បន្ថែម​ទៀត​ដល់​សហជីព​​តាម​រយៈ​ការ​សម្រួល​បែប​បទ​នីតិវិធី​នៃ​ការ​ចុះ​បញ្ជី។​ ​យ៉ាងណា​ក្តី​ប្រធាន​សហជីព​មួយ​លើក​ឡើង​ថា​ ​សេចក្តី​ណែនាំ​របស់​ក្រសួង​ការងារ​ក្នុង​ការ​សម្រួល​នីតិវិធី​ចុះ​បញ្ជី​សម្រាប់​សហជីព​ ​គ្រាន់​តែ​ជា​ចំណុច​តូច​មួយ​ដែល​អាច​ជួយ​ដល់​សហជីព​ ​បន្ទាប់ពី​មាន​ការ​ស្នើ​របស់​ស្ថាប័ន​អន្តរជាតិ​ឲ្យ​បើក​លំហ​សេរីភាព​នៅ​​កម្ពុជា។

រដ្ឋ​មន្រ្តី​ក្រសួង​ការងារនិង​បណ្តុះ​បណ្តាល​វិជ្ជាជីវៈជំរុញ​ឲ្យ​មន្រ្តី​របស់​ខ្លួន​ និង​អ្នក​ពាក់​ព័ន្ធជួយ​សម្រួល​ដល់​នីតិវិធី​និង​បែប​បទ​ក្នុង​ការ​ចុះ​បញ្ជី​សហជីព​ដើម្បី​ធានានិង​លើក​កម្ពស់​សេរីភាព​អង្គការ​វិជ្ជាជីវៈ​នៅ​កម្ពុជា​ឲ្យ​កាន់​តែ​មាន​ភាព​ប្រសើរ​ឡើង។​

សេចក្តី​ណែនាំ​ស្តីពី​ការ​សម្រួល​នីតិវិធី​ ​និង​បែប​បទ​ក្នុង​ការ​ចុះ​បញ្ជី​សហជីព​ ​ចេញ​កាលពី​ថ្ងៃទី​១៤ខែ​ធ្នូឆ្នាំ​២០១៨​ ​និង​ទើប​ត្រូវ​បាន​ផ្សព្វផ្សាយ​នៅ​ថ្ងៃ​អង្គារ​នេះ​ បញ្ជាក់​ថា​ ​ក្រសួង​ការងារ​ស្នើ​ឲ្យ​មន្រ្តី​ពាក់​ព័ន្ធ​ទាំងអស់​ត្រូវ​ពង្រឹង​ការ​អនុវត្ត​ច្បាប់​ស្តីពី​សហជីព​ ​ជា​ពិសេស​ការ​អនុវត្ត​បញ្ញត្តិ​ពាក់ព័ន្ធ​នឹង​ការ​ការពារ​ជាពិសេស​សម្រាប់​សមាជិក​ស្ថាបនិក​ ​និង​ថ្នាក់​ដឹកនាំ​សហជីព​ឲ្យ​បាន​ម៉ឺងម៉ាត់​ដើម្បី​ធានា​ ​និងលើក​កម្ពស់​សេរីភាព​អង្គការ​វិជ្ជាជីវៈ​នៅ​កម្ពុជា​ឲ្យ​កាន់​តែ​មាន​ភាព​ប្រសើរ​ឡើង។​ ​មន្រ្តី​ពាក់ព័ន្ធ​ដែល​ក្រសួង​ស្នើ​ទៅ​ទាំង​នោះ​រួម​មាន៖​ ប្រធាន​នាយក​ដ្ឋាន​វិវាទ​ការងារ​ ​ប្រធាន​នាយកដ្ឋាន​អធិការ​កិច្ច​ ​ប្រ​ធាន​មន្ទីរ​ការងារ​រាជធានី​ខេត្ត​ ​មន្រ្តី​ទទួល​បន្ទុក​ចុះ​បញ្ជី​សហជីព​ ​និង​មន្រ្តី​ទទួល​បន្ទុក​អធិការកិច្ច​ការងារ​ជា​ដើម។​

សេចក្តី​ណែនាំ​ ដែល​ចុះ​ហត្ថលេខា​ដោយ​លោក ​អ៊ិត សំហេង​ ​រដ្ឋមន្រ្តី​ក្រសួង​ការងារ​នោះ​ ​បញ្ជាក់ពី​ចំណុច​សំខាន់​ចំនួន​បី​ ​ដែល​មន្រ្តី​ពាក់ព័ន្ធ​ទាំងនោះ​ត្រូវ​អនុវត្ត។ សេចក្តី​ណែនាំនេះ​សរសេរ​តាម​ន័យ​ដើម​ថា៖​

«មិន​តម្រូវ​ឲ្យ​បំពេញ​ព័ត៌មាន​អំពី​សមាជិក​គ្រួសារ​របស់​ថ្នាក់​ដឹកនាំ​សហជីព​ ​មិន​តម្រូវ​ឲ្យ​ផ្តល់​សៀវ​ភៅ​ការងារ​ ​និង​បណ្ណ​សមាជិក​បេឡា​ជាតិ​របប​សន្តិសុខ​សង្គម​ ​(ប.ស.ស.)​ភ្លាមៗ​នៅ​ពេល​ដាក់​សំណុំ​បែប​បទ​សុំ​ចុះ​បញ្ជី​សហជីព​នោះ​ទេ​ ​ដោយ​អនុញ្ញាត​ឲ្យ​សហជីព​ត្រូវ​ផ្តល់​ឯក​សារ​ទាំងនេះ​ក្នុង​រយៈ​ពេល​៤៥​ថ្ងៃ​ ​គិត​ពី​ថ្ងៃទទួលបាន​ការ​ចុះ​បញ្ជី។​ ​អនុញ្ញាត​ឲ្យ​បុគ្គលិក​ផ្នែក​រដ្ឋបាល​នៃ​សហព័ន្ធ​សហជីព​ ​ឬ​សហ​ភាព​សហជីព​ជួយ​សម្រប​សម្រួល​ការ​ចុះបញ្ជី​របស់​សហជីព​មូលដ្ឋានដែលជា​សមាជិក​របស់​ខ្លួន»។​

VOA​ បាន​ព្យាយាម​ទាក់ទង​សុំ​ការ​អត្ថាធិប្បាយ​លម្អិត​ពី​លោក​ហេង សួរ​ ​អ្នក​នាំ​ពាក្យ​ក្រសួង​ការងារ​ និង​បណ្តុះ​បណ្តាល​វិជ្ជាជីវៈ​ ​តែ​រហូត​មក​ដល់​ល្ងាច​ថ្ងៃ​អង្គារ​នេះ​ ​មិនទាន់​មាន​ការ​ឆ្លើយ​តប​នៅ​ឡើយ។​

ការ​ចេញ​សេចក្តី​ណែនាំ​ឲ្យ​សម្រួល​ដល់​នីតិវិធី​ ​និង​បែប​បទ​ចុះ​បញ្ជី​សហជីព​នេះធ្វើ​ឡើង​ ​ខណៈ​ដែល​រដ្ឋាភិបាលដឹកនាំ​ដោយលោក​នាយក​រដ្ឋមន្រ្តី​ហ៊ុន សែន​កំពុង​ព្យាយាម​បន្ធូរ​បន្ថយ​កំដៅនយោបាយ​ ​ខណៈ​កម្ពុជា​កំពុង​ត្រូវ​បាន​ដឹកនាំ​ដោយ​រដ្ឋាភិបាល​ឯក​បក្ស​ ​ក្រោយ​ការ​បោះឆ្នោត​ថ្នាក់​ជាតិ​មួយ​ដែលមិន​មាន​ការចូលរួម​ពី​គណបក្ស​ប្រឆាំង។​

លោក​ អាត់ ធន់​ ​ប្រធាន​សហភាព​ការងារ​កម្ពុជា​ ​ប្រាប់​ ​VOA​ ​នា​រសៀល​ថ្ងៃ​អង្គារ​នេះ​ថា​ ​ចាប់​តាំង​ពី​ច្បាប់​ស្តីពី​សហជីព​ត្រូវ​បាន​បង្កើត​ ​កាលពី​ពាក់​កណ្តាល​ឆ្នាំ​២០១៦​ ​ការ​អនុវត្ត​ការងារ​របស់​សហជីព​ ​ព្រម​ទាំង​ការ​ចុះ​បញ្ជី​ផ្សេងៗ​ ចាប់​ផ្តើម​មាន​ការ​រឹតត្បិត​ ​និង​ប្រឈម​ផល​វិបាក​ជាច្រើន។​ ​លោក​បន្ថែម​ថា​ ​សេចក្តី​ណែនាំ​របស់​ក្រសួង​ការងារ​ក្នុង​ការ​សម្រួល​នីតិវិធី​ចុះ​បញ្ជី​សម្រាប់​សហជីពនេះគ្រាន់​តែ​ជាចំណុច​តូច​មួយ​ដែល​អាច​ជួយ​ដល់​សហជីព​ ​បន្ទាប់​ពីស្ថាប័ន​អន្តរជាតិ​ធំៗ​មួយចំនួន​បាន​ស្នើ ​និង​ដាក់​សម្ពាធ​ឲ្យ​រដ្ឋាភិបាល​អនុវត្ត​ការ​ពង្រឹង​លទ្ធិ​ប្រជា​ធិបតេយ្យ​ប៉ុណ្ណោះ។​

លោក ​អាត់ ធន់ ​បន្ថែម​ដោយ​បញ្ជាក់​អំពី​ចំណុច​ដែល​អាច​ធានា​ឲ្យ​សហជីព​អាច​ធ្វើ​ការងារ​របស់​ខ្លួន​ដោយ​ពេញ​លេញ​ថា៖

«កែប្រែ​ច្បាប់​សហជីព​ហ្នឹង​ឲ្យ​វា​សម្រួល​ទៅ​ ស្រួល​ដូច​ច្បាប់​ការងារ​ឡើង​វិញ។​ ​ទី២​គឺ​ត្រូវ​ធានា​សម្រួល​នីតិវិធី​ចុះ​បញ្ជី​ហ្នឹង​ ​កុំ​ឲ្យ​មាន​លក្ខណៈ​ស្មុគ​ស្មាញ​ដែល​ធ្វើ​ជា​ឧបសគ្គ​ខាង​សហជីព។​ ហើយ​មន្រ្តី​របស់​ក្រសួង ​ឬ​ក៏​អាជ្ញាធរ​មាន​សមត្ថ​កិច្ច​ពាក់ព័ន្ធមិន​គួរ​មាន​ឥទ្ធិពល​ ឬ​ទី​ប្រឹក្សា​ក្រុមហ៊ុន​ ដែល​ធ្វើ​ជា​ឧបសគ្គ​នៃ​ការ​រាំង​ស្ទះ​ដំណើរ​ការ​ចុះ​បញ្ជី​ហ្នឹង​ទេ»។​

នៅ​មុន​ការ​បោះ​ឆ្នោត​ថ្នាក់​ជាតិ​ឆ្នាំ​២០១៨គឺ​ជា​ពេល​វេលា​ដែល​រដ្ឋាភិបាល​រឹត​បន្តឹង​សេរីភាព​នៃ​ការ​ជួប​ជុំ​ផ្សេងៗ។​ ​ការ​រឹត​បន្តឹង​សេរីភាព​នៃ​ការ​ជួបជុំ ការ​រឹត​បន្តឹងការ​ធ្វើ​សកម្មភាព​ការ​ងារ​របស់​សហជីព​ ​និង​សង្គម​ស៊ីវិល​ ​ព្រម​ទាំង​ការ​បង្ក្រាប​សំឡេង​ប្រឆាំង​ជា​បន្ត​បន្ទាប់​បាន​ធ្វើ​ឲ្យ​សហភាព​អឺរ៉ុប​ និង​បណ្តា​ប្រទេស​កាន់​លទ្ធិ​ប្រជា​ធិបតេយ្យ​ធំៗ​មួយ​ចំនួនរិះគន់​រដ្ឋាភិបាល​កម្ពុជា​យ៉ាង​ខ្លាំង។​

សហ​ភាព​អឺរ៉ុប​ ​នៅ​ដើម​ខែតុលាឆ្នាំ​២០១៨​ ​ ​បាន​ជូន​ដំណឹង​ទៅ​រដ្ឋាភិបាល​កម្ពុជា​ថា​ ​ប្រទេស​កម្ពុជា​នឹង​បាត់បង់​ឋានៈ​អនុគ្រោះ​ពន្ធ​សម្រាប់​ការ​នាំ​ទំនិញ​ចូល​ទីផ្សារ​របស់​សហគមន៍​អឺរ៉ុប​ ​ដោយ​សារតែ​ការ​រំលោភ​សិទ្ធិ​មនុស្ស។​ ​សហភាពអឺរ៉ុប​ក៏​បាន​ទុក​ពេល​ឲ្យ​កម្ពុជា​ស្តារ​ស្ថាន​ភាព​ប្រជា​ធិប​តេយ្យ​ឡើង​វិញ​ ​មុន​នឹង​សម្រេច​ដក​ពន្ធ​អនុគ្រោះ​ ​ដែល​ផ្ដល់​ផល​ចំណេញ​ឲ្យ​កម្ពុជា​ប្រមាណ​ជា​៧០០លាន​ដុល្លារ​ក្នុង​មួយ​ឆ្នាំៗ។

លោក​នាយក​រដ្ឋមន្រ្តី​ ​ហ៊ុន សែន​ ​កាល​ពី​ចុង​ខែវិច្ឆិកាឆ្នាំ​២០១៨​ ​បាន​បញ្ជា​ឲ្យ​ក្រសួង​ការងារជំរុញ​ទៅតុលាការ​កម្ពុជា​ ​បិទ​បញ្ចប់​រឿង​ក្តី​ប្រឆាំង​នឹង​តំណាង​សហ​ជីព​នានា​នៅ​ត្រឹម​ចុង​ឆ្នាំ​២០១៨​ ​ដើម្បី​ឲ្យ​លំហ​សេរីភាព​នៃ​ការ​បំពេញ​ការងារ​សម្រាប់​សហជីព​បាន​ពេញ​លេញ។​ ​រដ្ឋាភិបាល​ឯកបក្ស​របស់​លោក​ហ៊ុន សែន​ ​ក៏​បាន​បើក​លំហ​សេរីភាព​ខ្លះៗ​ឡើង​វិញ​ដល់​អង្គការ​សង្គម​ស៊ីវិល​និង​ក្រុម​បក្ស​ប្រឆាំង​ផង​ដែរ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG