ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋាភិបាល​ស្នើ​សុំ​គ្រឹះស្ថាន​ធនាគារ​និង​ហិរញ្ញ​វត្ថុ ​សម្រួល​ការ​សង​ប្រាក់​​រហូត​ដល់​ចុង​ឆ្នាំ​២០២០


រូបឯកសារ៖ ធនាគារ​ជាតិ​នៃ​កម្ពុជា ​នៅ​តាម​បណ្តោយ​មហាវិថី​ព្រះនរោត្តម​ នៅ​រាជធានី​ភ្នំពេញ​ នៅ​​ថ្ងៃទី៨ ខែ សីហា ២០១៥។ (អ៊ុច នីដា/VOA)

ធនាគារ​ជាតិ​នៃ​កម្ពុជា​បាន​ស្នើ​គ្រឹះស្ថាន​ធនាគារ​និង​ហិរញ្ញ​វត្ថុ​ទាំង​អស់​លើក​លែង​ការ​សង​បំណុល​ ដែល​ប្រជា​ពលរដ្ឋ​ជំពាក់​រហូត​ដល់​ចុង​ឆ្នាំ​២០២០​ ប្រសិន​បើ​ពួក​គេ​ពុំ​មាន​លទ្ធភាព​បង់។​

នេះ​ជា​ការ​បញ្ជាក់​ជា​ថ្មី​របស់​ធនាគារ​ជាតិ​ ខណៈ​ប្រទេស​កម្ពុជា​កំពុង​រង​ឥទ្ធិពល​នៃ​ការ​រាតត្បាត​វីរុស​កូរ៉ូណា។​ ប្រជា​ជន​ដែល​ងាយ​រង​គ្រោះ​បាន​បាត់​បង់​ការងារ។ ប្រាក់​ចំណូល​របស់​ពួក​គេ​បាន​ធ្លាក់​ចុះ​រហូត​មិន​មាន​លទ្ធភាព​បង់​សង​ប្រាក់។​

ក្នុង​លិខិត​មួយ​ចុះ​ថ្ងៃ​ទី​២០​ ខែ​មេសា ​ទៅ​កាន់​គ្រឹះស្ថាន​ធនាគារ​និង​ហិរញ្ញ​វត្ថុ​ទាំង​អស់ ធនាគារ​ជាតិ​នៃ​កម្ពុជា​បាន​ស្នើ​ឲ្យ​មាន​ការ​បន្ធូរ​បន្ថយ​កម្រៃ​សេវា​ផ្សេងៗ​ ពាក់ព័ន្ធ​នឹង​ឥណទាន​ ឬ​លើក​លែង​ការ​ផាក​ពិន័យ​ផ្សេងៗ​ ចំពោះ​អតិថិជន​របស់​ខ្លួន​ចាប់​ពី​ពេល​បរិច្ឆេទ​នៃ​លិខិត​នេះ ​រហូត​ដល់​ចុង​ខែ​ធ្នូ​ ឆ្នាំ​២០២០។​ ធនាគារ​ស្នើ​សុំ​គ្រឹះស្ថាន​ធនាគារ​និង​ហិរញ្ញ​វត្ថុ​ទាំង​នោះ ​«សហការ​អនុវត្ត​ឲ្យ​មាន​ប្រសិទ្ធ​ភាព​ខ្ពស់»។​

លោក​ កាំង តុងងី​ ប្រធាន​នាយកដ្ឋាន​ទំនាក់​ទំនង​ និង​ជា​អ្នក​នាំពាក្យ​សមាគម​មីក្រូ​ហិរញ្ញ​វត្ថុ​កម្ពុជា​ មាន​ប្រសាសន៍​ថា​ គ្រឹះស្ថាន​មីក្រូ​ហិរញ្ញ​វត្ថុ​នឹង​មើល​លក្ខខណ្ឌ​ជាក់​ស្តែង​របស់​អ្នក​ជំពាក់​ ដែល​ភាគ​ច្រើន​ជា​អ្នក​ធ្វើ​ការ​ក្នុង​វិស័យ​ទេសចរណ៍​ សំណង់ ​ដឹក​ជញ្ជូន ​និង​រោងចក្រ​កាត់ដេរ។​ លោក​បន្ត​ថា​ នេះ​ជា​កាលៈ​ទេសៈ​នៃ​ការ​យោគ​យល់​គ្នា​ទៅ​វិញ​ទៅ​មក។​

លោក​បាន​ថ្លែង​ប្រាប់ ​VOA ​ថា៖ ​«ក្នុង​ពេល​ផល​ប៉ះពាល់​នៃ​ជំងឺ​កូវីដ​នេះ​ វា​ប៉ះពាល់​ទាំង​អតិថិជន​ វា​ប៉ះពាល់​ទាំង​គ្រឹះស្ថាន​មីក្រូ​ហិរញ្ញ​វត្ថុ។​ ក៏​ប៉ុន្តែ​ដើម្បី​ចូលរួម​ដោះស្រាយ​បញ្ហា​នេះ​បាន​ គ្រឹះស្ថាន​មីក្រូ​ហិរញ្ញ​វត្ថុ​ក៏​គាត់​ ត្រូវ​ការ​លះ​បង់​ខ្លះ​ដែរ​ ដើម្បី​ជួយ​អតិថិជន​គាត់​ក្នុង​ពេល​ដែល​ពិបាក​ហ្នឹង»។​

កម្មករ​រោងចក្រ​រាប់​ម៉ឺន​នាក់​ត្រូវ​បាន​ព្យួរ​ និង​បញ្ឈប់​ពី​ការងារ ​ដោយសារ​រោងចក្រ​បិទ​ និង​កាត់​បន្ថយ​ផលិត​កម្ម​ ដោយសារ​មិន​មាន​ការ​បញ្ជា​ទិញ។​ ចំណែក​ពលករ​ខ្មែរ​ជិត ​៩​ម៉ឺន​នាក់​ក៏​បាន​វិល​ត្រឡប់​ពី​ប្រទេស​ថៃ ហើយ​ពួកគេ​ភាគ​ច្រើន​ក៏​ជំពាក់​បំណុល​គេ​ដែរ។​

រដ្ឋមន្រ្តី​ក្រសួង​មហាផ្ទៃ​លោក ស ខេង​ កាល​ពី​ថ្ងៃ​ពុធ​ បាន​ថ្លែង​ថា ​ពលករ​វិល​ត្រឡប់​ពី​ប្រទេស​ថៃ​ជាប់​បំណុល​គេ​ ដែល​រដ្ឋាភិបាល​ត្រូវ​យក​ចិត្ត​ទុក​ដាក់។​

លោក​បាន​ថ្លែង​ថា៖ ​«ការងារ​ហ្នឹង​មិន​មែន​ថា​យើង​មិន​យក​ចិត្ត​ទុក​ដាក់​ទេ។​ [យើង]​យក​ចិត្ត​ទុក​ដាក់​ប៉ុន្តែ​ឲ្យ​ចំ​មុខ​សញ្ញា​បាន​ន័យ​ថា ​អ្នក​ហ្នឹង​ជួន​អី​ជំពាក់​លុយ​គេ ​...​មីក្រូ​ហិរញ្ញ​វត្ថុ​អីៗ។ [ពេល]មក​វិញ​វ័ណ្ឌក​អត់​មាន​ចំណូល មាន​អី។​ អាហ្នឹង​ជា​មុខ​សញ្ញា​មួយ​ដែល​យើង​យក​ចិត្ត​ទុក​ដាក់​ជួយ​ហើយ។​ ហើយ​មិន​តិច​ទេ​ អាមុខ​សញ្ញា​ហ្នឹង​ណា៎​ជំពាក់​គេ​ហ្នឹង​ណា៎​ ប្រហែល​ជា​មាន​ច្រើន»។

ពលករ​ម្នាក់​ដែល​មក​ពី​ប្រទេស​ថៃ​ អ្នកនាង​ អាន់ ស្រីលីស ​អាយុ​២៦​ឆ្នាំ ​រស់​នៅ​ក្នុង​ខេត្ត​តាកែវ​ បាន​ថ្លែង​ប្រាប់​ VOA​ ថា ​អ្នកនាង​កំពុង​ព្រួយ​បារម្ភ​អំពី​ការ​សង​បំណុល​គេ​ ដែល​ត្រូវ​បង់​មួយ​ខែ​ប្រមាណ​១២០​ដុល្លារ​ និង​ត្រូវ​បង់​៦​ខែ​ទៀត។​

ប្រជាជន​នៅ​តាម​ជន​បទ​ភាគ​ច្រើន​ជាប់​បំណុល​មីក្រូ​ហិរញ្ញ​វត្ថុ​ធនាគារ​ និង​បំណុល​ឯកជន។​ ករណី​ខ្លះ​ពួកគេ​បាន​យក​កម្ចី​ពី​ច្រើន​គ្រឹះស្ថាន​មីក្រូ​ហិរញ្ញ​វត្ថុ ​និង​ការ​ខ្ចី​បែប​ឯកជន​ដែល​មាន​ការ​ប្រាក់​ខ្ពស់។​ការណ៍​នេះ​នាំ​ឲ្យ​ពួកគេ​ធ្លាក់​ខ្លួន​ក្នុង​អន្ទាក់​បំណុល​ ហើយ​ស្ថានភាព​រស់​នៅ​របស់​ពួក​គេ​កាន់​តែ​លំបាក​ ដោយសារ​ត្រូវ​រក​លុយ​សង​បំណុល​គេ​ជា​រៀងរាល់​ខែ។​

លោក​ យឿន វណ្ណៈ ​អាយុ​៣៦​ឆ្នាំ ​នៅ​ខេត្ត​បាត់ដំបង ​មាន​ប្រសាសន៍​ថា​ លោក​ត្រូវ​បង់​សង​គេ​ចំនួន​ ៩០​ដុល្លារ​ក្នុង​មួយ​ខែ​ រយៈ​ពេល​ជាង​២​ឆ្នាំ​ទៀត​ ក្រោយ​ខ្ចី​លុយ​គេ ​២​ពាន់​ដុល្លារ​ កាល​ពី​ឆ្នាំ​មុន​ដើម្បី​ទិញ​ម៉ូតូ។

លោក​ វណ្ណៈ​ ដែល​មាន​ការងារ​មិន​ទៀង​ទាត់ ​និង​មាន​ភរិយា​ជា​កម្មករ​រោងចក្រ​កាត់​ដេរ​ នៅ​ភ្នំពេញ​ មាន​ប្រសាសន៍​ថា ​ភរិយា​របស់​លោក​ត្រូវ​បាន​ព្យួរ​ការងារ​ ហើយ​ទទួល​បាន​ប្រាក់​ចំណូល​តិច​ជាង​មុន។​ លោក​ស្នើ​សុំ​ការ​យោគយល់​ពី​គ្រឹះស្ថាន​មីក្រូ​ហិរញ្ញ​វត្ថុ​ឈ្មោះ​ អាក់ទីវ ភីភលភីអិលស៊ី (APMFI) ​រយៈ​ពេល​ពីរ​បី​ខែ។​

លោក​មាន​ប្រសាសន៍​ថា៖ ​«ខល​សុំ កាល​នោះ ​ គេ​... គេ​មិន​មែន​ថា​ គេ​មិន​ព្រម​ទេ។​ ប៉ុន្តែ​គេ​ថា​ គេ​ពន្យារ​ឲ្យ​បាន​ប៉ុន្តែ​ខូច​ឈ្មោះ​អ៊ីចឹងណា៎​....​ ដាច់​ខាត​យើង​ត្រូវ​តែ​បង់។​គេ​និយាយ​អ៊ីចឹង។​ មិន​មែន​ថា​បង់​ពន្យារ​បាន​អី​បាន​ប៉ុណ្ណេះ​ខែ​។ គេ​និយាយ​ថា​ បើ​យើង​ពន្យារ​ យើង​ខូច​ឈ្មោះ​អ៊ីចឹង​ណា៎»។​

គ្រឹះ​ស្ថាន​មីក្រូ​ហិរញ្ញ​វត្ថុ​ អាក់ទីវ ភីភលភីអិលស៊ី​ បដិសេធ​មិន​ផ្តល់​បទ​សម្ភាសន៍​តាម​ទូរស័ព្ទ​នៅ​រសៀល​ថ្ងៃ​សុក្រ​នេះ។

បើ​តាម​របាយ​ការណ៍​របស់​សមាគម​មីក្រូ​ហិរញ្ញ​វត្ថុ​កម្ពុជា គិត​ត្រឹម​ដំណាច់​ឆ្នាំ​២០១៩​ គ្រឹះ​ស្ថាន​មីក្រូ​ហិរញ្ញ​វត្ថុ​នៅ​កម្ពុជា​បាន​ផ្តល់​ឥណទាន​ជាង ​៧​ពាន់​លាន​ដុល្លារ​អាមេរិក​ ដល់​ប្រជា​ពលរដ្ឋ​ខែ្មរ​ជាង​ ២,២​លាន​នាក់​ ក្នុង​នោះ​មាន​ប្រមាណ ​៨០​ភាគ​រយ​ជា​ស្ត្រី។​ គ្រឹះស្ថាន​មីក្រូ​ហិរញ្ញ​វត្ថុ​នៅ​កម្ពុជា​មាន​ជាង​ ៧០​និង​គ្រឹះស្ថាន​ឥណទាន​ជន​បទ​មាន​ជាង ​២០។

ក្នុង​កិច្ច​ប្រជុំ​កាល​ពី​ថ្ងៃ​ពុធ ​រដ្ឋមន្រ្តី​ក្រសួង​មហា​ផ្ទៃ​លោក ​ស ខេង​ បាន​បញ្ជាក់​ថា​ ដោយសារ​ផល​ប៉ះពាល់​នៃ​វីរុស​កូរ៉ូណា​អត្រា​ភាព​ក្រីក្រ​នៅ​កម្ពុជា ​អាច​កើន​ឡើង​ក្រោយ​ជំងឺ​ដែល​កំពុង​រាត​ត្បាត​ជា​សាកល​នេះ​បាត់​ទៅ​វិញ។​

លោក​មាន​ប្រសាសន៍​ថា៖​ «ប៉ុន្តែ​ក្នុង​ស្ថានភាព​ដែល​កូវីដ​វា​រាលដាល​នេះ​ ប្រហែល​ជា​អាច​វា​មាន​ផល​ប៉ះពាល់​ បាន​ន័យ​ថា ​វា​ធ្វើ​ឲ្យ​ចំនួន​អ្នក​ក្រ​ហ្នឹង​[កើន​ឡើង]​ ដែល​ចុង​ក្រោយ​ យើង​ថា​នៅ​សល់​ប៉ុន្មាន ​៩​ភាគ​រយ។ ​ប៉ុន្តែ​ដល់​តែ​កូវីដ​ទៅ​ តើ​វា​ឡើង ​១០​ភាគ​រយ​ ឬ​វា​នៅ ​៩​ភាគ​រយ?»​

លោក​រដ្ឋមន្រ្តី​មាន​ប្រសាសន៍​ថា​ រដ្ឋាភិបាល​កម្ពុជា​មិន​មាន​ថវិកា​ចែក​ដល់​ប្រជា​ពលរដ្ឋ​នោះ​ទេ៕

តួលេខនៃករណីឆ្លងជំងឺកូវីដ១៩

XS
SM
MD
LG