ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នកបោះឆ្នោត​ខ្មែរ​អាមេរិកាំង​បារម្ភ​អំពី​លទ្ធិប្រជាធិបតេយ្យ ​អតិផរណា​និង​សុវត្ថិភាព


អ្នកស្រី ជា អ៊ី អ្នកបោះឆ្នោតនៅទីក្រុង Fairfax រដ្ឋ Virginia ថ្ងៃទី ៨ ខែវិច្ឆិកា ឆ្នាំ២០២២។ (ម៉ែន គឹមសេង/វីអូអេ)

អ្នកបោះឆ្នោត​ខ្មែរ​អាមេរិកាំង​បាន​ចេញ​មក​បោះឆ្នោត​ពាក់​កណ្តាល​អាណត្តិ​នៅ​ថ្ងៃ​អង្គារ​នេះ​ដោយ​ផ្តោត​ខ្លាំង​លើ​បញ្ហា​អតិផរណា ​សិទ្ធិ​ក្នុង​ការរំលូត​កូន​ សន្តិសុខ​ព្រំដែន​ អន្តោប្រវេសន៍​ លទ្ធិ​ប្រជាធិបតេយ្យ​ និង​ការគ្រប់គ្រង​អាវុធ។

មាន​អាសនៈ​សមាជិក​រដ្ឋសភា​ចំនួន​៤៣៥​រូបត្រូវ​បោះឆ្នោត​ឡើង​វិញ​និង​សមាជិក​ព្រឹទ្ធសភា​ចំនួន​១ភាគ៣​គឺ​៣៥​នាក់​ដល់​ពេល​ត្រូវ​បោះឆ្នោត​ឡើង​វិញ​ដែរ។​ ការបោះឆ្នោត​នេះ​ត្រូវ​បាន​គេ​វាយ​តម្លៃ​ថា​មាន​លក្ខណៈ​ប្រកៀក​ប្រកិត​គ្នាខ្លាំង​នៅ​រដ្ឋ​ចំនួន​៥​ គឹ​រដ្ឋ​ Arizona រដ្ឋ Nevada រដ្ឋ Wisconsin រដ្ឋ Goergia និង​រដ្ឋ​ Pennsylvania ​ដោយ​គណបក្ស​សាធារណរដ្ឋ​ផ្តោត​ខ្លាំង​លើ​បញ្ហា​អតិផរណា​ សន្តិសុខ​និង​ជន​អន្តោប្រវេសន៍​ខុសច្បាប់។ ក្នុង​ខណៈ​ពេល​ដែល​គណបក្ស​ប្រជាធិបតេយ្យ​ផ្តោតខ្លាំង​លើ​បញ្ហា​លទ្ធិប្រជាធិបតេយ្យ សន្តិសុខ​និង​សិទ្ធិ​ក្នុងការ​រំលូត​កូន។

លោក​យ័ប គឹមទឹង​ប្រធាន​សមាគម​ខ្មែរ​អាមេរិកាំង​ដើម្បី​សិទ្ធិមនុស្ស​និង​ប្រជាធិបតេយ្យ​បាន​ចេញ​មក​បោះឆ្នោត​នៅ​ក្រុង ​Great Falls ​នៃ​ទីក្រុង ​Fairfax រដ្ឋ​ Virginia​ បាន​ថ្លែង​ប្រាប់​វីអូអេ​ថា៖

«បញ្ហា​ចម្បង​របស់​ខ្ញុំ ​គឺ​ថា​ខ្ញុំ​ចង់​ឃើញ​ថា​ប្រទេស​អាមេរិកាំង​នៅ​តែ​មាន​លទ្ធិ​ប្រជាធិបតេយ្យ​ត្រឹមត្រូវ​ ហើយ​ពី​រឿង​ដោះស្រាយ​ផ្សេងៗ​ទៀត​ទាក់​ទង​នឹង​សេដ្ឋកិច្ច​ហើយ​នឹង​សិទ្ធិ​ប្រើ​កាំភ្លើង»។

លោក យ័ប គឹមទឹង ប្រធាន សមាគម ខ្មែរ អាមេរិកាំងដើម្បី​សិទ្ធិមនុស្ស និង ប្រជាធិបតេយ្យ ថ្ងៃទី ៨ ខែវិច្ឆិកា ឆ្នាំ២០២២។ (ម៉ែន គឹមសេង/វីអូអេ)
លោក យ័ប គឹមទឹង ប្រធាន សមាគម ខ្មែរ អាមេរិកាំងដើម្បី​សិទ្ធិមនុស្ស និង ប្រជាធិបតេយ្យ ថ្ងៃទី ៨ ខែវិច្ឆិកា ឆ្នាំ២០២២។ (ម៉ែន គឹមសេង/វីអូអេ)

អ្នកស្រី ​ជា អ៊ី ​ក៏​បាន​មក​បោះឆ្នោត​នៅ​ស្ថានីយនេះ​ដែរ៖

«ថ្ងៃនេះ​សប្បាយ​ចិត្ត​ណាស់​បាន​មក​បោះឆ្នោត​ជ្រើសរើស​តំណាងរាស្ត្រ​ដែល​ខ្ញុំ​ពេញចិត្ត​ដើម្បី​ការពារ​រឿង​រំលូតកូន​ ការពារ​លទ្ធិ​ប្រជាធិបតេយ្យ​ហើយ​នឹង​បញ្ហា​សេដ្ឋកិច្ច»។

អ្នកស្រី​បាន​ពន្យល់​ពី​ហេតុផល​នៃ​ការប្រឆាំង​នឹង​ការរំលូត​កូន​ថា៖

«គឺ​កូន​បាន​ចាប់​បដិសណ្ឋិ​ក្នុង​ផ្ទៃ​របស់​យើង​ហើយ​គឺ​ថា​ជា​កូន​របស់​យើង​ហើយ​ បើ​យើង​រំលូត​ទៅ​បាន​ន័យ​ថា​យើង​សម្លាប់​កូន​របស់​យើង»។

​បច្ចុប្បន្ន ​នេះ​គណបក្ស​ប្រជាធិបតេយ្យ​របស់​លោក​ប្រធានាធិបតី​ ចូ បៃដិន ​គ្រប់គ្រង​នៅ​ព្រឹទ្ធសភា​និង​រដ្ឋសភា។ ការបោះឆ្នោត​លើក​នេះ​ដែល​ធ្វើឡើង​នៅ​ពាក់​កណ្តាល​អាណត្តិ​របស់​ប្រធានាធិបតី​ ត្រូវ​បាន​គេ​មើលឃើញ​ថា​ជា​ការកំណត់​ការដឹកនាំ​របស់​លោក ចូ បៃដិន ​នៅ​ក្នុង​រយ:ពេល​ពីរ​ឆ្នាំ​ទៅមុខ​ទៀត។​ បើ​សិន​ជា​គណបក្ស​សាធារណរដ្ឋ​គ្រប់គ្រង​ស្ថាប័ន​ទាំងពីរ​គឺ​នឹង​អាច​ប៉ះពាល់​ដល់​គោលនយោបាយ​ការបរទេស​និង​បញ្ហា​ក្នុង​ស្រុក​ជាច្រើន។

ចំនួន​អ្នកចេញ​មក​បោះឆ្នោត​មុន​ថ្ងៃ​កំណត់នៅ​ឆ្នាំ​នេះ​មាន​ចំនួន​ជាង​៤២​លាន​នាក់​គឺ​ច្រើន​ជាង​ការបោះឆ្នោត​ពាក់​កណ្តាល​អាណត្តិ​ក្នុង​ឆ្នាំ​២០១៨​ដែល​មាន​ជាង​៣៩​លាន​នាក់។ នេះ​បើតាម​សេចក្តី​រាយការណ៍​របស់​សារព័ត៌មាន ​Washington Post។

លោកយ័ប គឹមទឹង និងអ្នកស្រីជា អ៊ី ផ្ទៀងផ្ទាត់ឈ្មោះនៅការិយាល័យបោះឆ្នោត ថ្ងៃទី ៨ ខែវិច្ឆិកា ឆ្នាំ២០២២។ (ម៉ែន គឹមសេង/វីអូអេ)
លោកយ័ប គឹមទឹង និងអ្នកស្រីជា អ៊ី ផ្ទៀងផ្ទាត់ឈ្មោះនៅការិយាល័យបោះឆ្នោត ថ្ងៃទី ៨ ខែវិច្ឆិកា ឆ្នាំ២០២២។ (ម៉ែន គឹមសេង/វីអូអេ)

អ្នកស្រី​ណាឡែន ស្មីត​មក​ពី​រដ្ឋ Virginia និង​លោក​គុជ ច័ន្ទលី​មកពី​រដ្ឋ​ Maryland ស្ថិត​ក្នុង​ចំណោម​អ្នក​ដែល​បាន​បោះឆ្នោត​មុន​ថ្ងៃ​កំណត់។

អ្នកស្រី​ណាឡែន ស្មីត​បាន​សម្តែង​ការព្រួយ​បារម្ភ​នឹង​បញ្ហា​សន្តិសុខ​ដែល​មាន​ការបាញ់​សម្លាប់​សិស្ស​តាម​សាលារៀន​និង​នៅ​តាម​ទី​សាធារណៈ​ដោយសារ​តែ​ការគ្រប់គ្រង​អាវុធ​មិន​បាន​ល្អ។

អ្នកស្រី​បាន​បន្ថែម​ថា៖

«ឃាត​កម្ម​ទាំងនេះ​ធ្វើ​ឲ្យ​យើង​ហើយ​នឹង​បងប្អូន​នៅ​សហរដ្ឋ​អាមេរិក​មាន​ការភ័យ​បារម្ភ​ជាច្រើន​។ កូនក្មេង​ក៏​បារម្ភ​អត់​ហ៊ាន​ទៅ​សាលា​។ អ៊ីចឹង​យើង​មិន​អាច​ធ្វើ​ឲ្យ​ប្រទេស​សហរដ្ឋ​អាមេរិក​ហ្នឹង​រស់​នៅ​ក្រោម​ភាព​ភ័យ​ខ្លាច​អ៊ីចឹង​ទេ​ពីព្រោះ​កូនក្មេង​គឺ​ជា​ក្មេង​ដែល​យើង​ត្រូវ​បណ្តុះ​បណ្តាល​ឲ្យ​គាត់​ទៅ​អនាគត​ដើម្បី​ប្រទេស​ជាតិ។ អ៊ីចឹង​គាត់​មិន​អាច​រស់​នៅ​ក្នុង​ភាព​ភ័យ​ខ្លាច​អត់ទៅ​សាលា​អ៊ីចឹង​ទេ។

អ្នកស្រី​ណាឡែន ស្មីត​បា​ន​បន្ថែម​ថា៖

«អ៊ីចឹង​ខ្ញុំ​ចង់​ឲ្យ​សភា​ជាតិ​បន្តឹង​ច្បាប់​នេះ​ឲ្យ​ខ្លាំង​ដើម្បី​សុវត្ថិភាព​បងប្អូន​យើង​ទាំង​អស់»។​

លោក​គុជ ច័ន្ទ​លី​បាន​ពន្យល់​ដែរ​ថា​បច្ចុប្បន្ន​អ្នកនយោបាយ​ហាក់​និយម​បក្ស​ពួក​និង​បុគ្គល​ជាង​ប្រទេស​ជាតិ​ដែល​នេះ​ជា​ហានីភ័យ​មួយ​ដល់​លទ្ធិ​ប្រជាធិបតេយ្យ។

លោក​បាន​បន្ថែម​ថា៖

«តាំង​ពី​ឆ្នាំ​២០១៦​មក​សហរដ្ឋ​អាមេរិក​មិនមែន​ជា​សហរដ្ឋ​អាមេរិក​ដូច​ពី​មុន​ទៀត​ទេគឺ​ថា​នៅ​ក្នុង​ផ្ទៃ​ប្រទេស​ទាំង​មូល​វា​មាន​ការបែក​បាក់​ប្រជាពលរដ្ឋ​អាមេរិកាំង​ហើយ​ចាប់ផ្តើម​គំនិត​អំពី​ការបែង​ចែក​ពណ៍​សម្បុរ​ បែងចែក​ពូជសាសន៍​គ្នា​ជាដើម។ ជនជាតិ​អាស៊ី​ត្រូវ​ជនជាតិ​ស្បែកស​ដែល​ប្រកាន់​ពូជសាសន៍​ហ្នឹង​វាយដំ​ច្រំធាក់​នៅ​តាម​រដ្ឋ​ផ្សេងៗ​ជាច្រើន»។​

អត្រា​អ្នកគ្មាន​ការងារធ្វើ​នៅ​សហរដ្ឋ​អាមេរិក​មាន​កម្រិត​៣,៧%​ប៉ុន្តែ​កម្រិត​អតិផរណា​មាន​ខ្ពស់​រហូតដល់​៨,៥%ក្នុង​ខែ​មីនា​។ នេះ​បើតាម​ទិន្នន័យ​របស់​ការិយាល័យ​ការងារ​របស់​សហរដ្ឋ​អាមេរិក។

យោង​តាម​ការស្ទង់​មតិ​ថ្មី​របស់​ក្រុមហ៊ុន​ Gallup ​ដែលបាន​ចេញផ្សាយ​ក្នុង​វិច្ឆិកា​ខែ​នេះ​ ៥១%​ នៃ​ពលរដ្ឋអាមេរិក​ដែល​បាន​ស្ទង់​មតិ​បាន​និយាយ​ថា​ពួកគេ​ជឿ​ទុកចិត្ត​លើ​គណបក្ស​សាធារណរដ្ឋ​កាន់តែច្រើន​ក្នុង​ការដោះស្រាយ​បញ្ហា​សេដ្ឋកិច្ច​ធៀបនឹង​ចំនួន​ ៤១%​ ដែល​បាន​និយាយ​ថា​ពួកគេ​ទុកចិត្ត​គណបក្ស​ប្រជាធិបតេយ្យ។ យោងតាម​ការស្ទង់​មតិ​របស់​សាកលវិទ្យាល័យ​ Monmouth​ នា​ពេលថ្មីៗ​នេះ​បង្ហាញ​ថា ​៨២% ​នៃ​ពលរដ្ឋ​អាមេរិកាំង​បាន​និយាយ​ថា​អតិផរណា​គឺជា​ «បញ្ហា​ដ៏​ចាំបាច់​បំផុត»​ សម្រាប់​រដ្ឋាភិបាល​សហព័ន្ធ​ដោះស្រាយ។

លោក យ័ប គឹមទឹង​បាន​ពន្យល់​ដែរ​ថា៖​

«បាទ​នេះ​ជា​បញ្ហា​មួយ​ធំ​មួយ​ចម្បង​នៅ​ក្នុង​ប្រទេស​អាមេរិក​ពីព្រោះ​បើ​គិត​មើល​ទៅ​បញ្ហា​នេះ​មិន​មែន​តែ​ជា​បញ្ហា​នៅ​អាមេរិក​ទេ​គឺ​ជា​បញ្ហា​ទូទាំង​ពិភព​លោក​ពីព្រោះ​វា​ទាក់​ទង​នឹង​បញ្ហា​ធំៗ​ដូច​ជា​សង្គ្រាម​នៅ​អ៊ុយក្រែន​និង​បញ្ហា​កូវីដ១៩។ ដូច្នេះ​វា​ធ្វើ​ឲ្យ​ពិភពលោក​មាន​ការលំបាក​ពី​រឿង​អតិផរណា​ហ្នឹង​ប៉ុន្តែ​ខ្ញុំ​ឃើញថា​នៅ​អាមេរិក​រដ្ឋាភិបាល​ចាត់​ចែង​បាន​ល្អ​ធ្វើ​ឲ្យ​អតិផរណា​មិន​សូវ​ច្រើន​បើ​ប្រៀបធៀប​ទៅ​នឹង​ប្រទេស​ដទៃ​ទៀត​លើ​ពិភពលោក»៕

XS
SM
MD
LG