ស្របពេលដែលការប្រើប្រាស់ផលិតផល និងកម្មវិធីបច្ចេកវិទ្យាទំនើបដើម្បីការប្រាស្រ័យទាក់ទងគ្នាកាន់តែមានសភាពផុសផុលនៅក្នុងប្រទេសកម្ពុជា ក្រុមពាណិជ្ជករធំៗនៃបច្ចេកវិទ្យាសារគមនាគមន៍ បាននឹងកំពុងឯកភាពជាសម្លេងតែមួយ ត្រៀមជួយរុញច្រានសេដ្ឋកិច្ចប្រើពុទ្ធិដែលដាក់គោលដៅដោយរដ្ឋាភិបាលខ្មែរ។
នៅក្នុងឯកសារគោលនយោបាយដើម្បីអភិវឌ្ឍវិស័យព័ត៌មានវិទ្យា និងទូរគមនាគមន៍ឆ្នាំ២០២០ ដែលបានចេញផ្សាយជាសាធារណៈ កាលពីខែមេសា រដ្ឋាភិបាលខ្មែរបានដាក់គោលដៅដើម្បីប្រែក្លាយសេដ្ឋកិច្ចប្រទេសកម្ពុជាឆ្លងកាត់អន្តរកាលផ្នែកសេដ្ឋកិច្ច ឈានទៅពឹងផ្អែកទៅលើប្រព័ន្ធសេដ្ឋកិច្ចដែលប្រើប្រាស់ពុទ្ធិជាមូលដ្ឋាន ដោយមានជំនួយពីវិស័យនេះ។
សហព័ន្ធ ICT កម្ពុជា ដែលបានក្លាយជាតំណាងស្របច្បាប់របស់វិនិយោគិនក្នុងវិស័យនេះ បានអះអាងពីគោលបំណង និងមហិច្ឆិតារបស់វិស័យឯកជនក្នុងការជួយដល់វិស័យនេះ និងជួយរដ្ឋាភិបាលខ្មែរសម្រេចគោលដៅដែលដាក់ចេញខាងលើ ក៏ដូចជាជួយលើកកម្ពស់មុខមាត់ផ្នែកពាណិជ្ជកម្ម និងការវិនិយោគនៅក្នុងប្រទេស។
លោក Steven Path ប្រធានសហព័ន្ធ ICT កម្ពុជា បាននិយាយប្រាប់ VOA ថា ខាងវិស័យឯកជនបានត្រៀមខ្លួនរួចរាល់ដើម្បីក្លាយជាក្បាលរថភ្លើង ដែលជួយអូសទាញឲ្យវិស័យព័ត៌មានវិទ្យា និងទូរគមនាគមន៍ឈានទៅកម្រិតមួយដែលមានសមត្ថភាពផ្នែកធនធាន និងបច្ចេកទេស ហើយអាចប្រកួតប្រជែងក្នុងតំបន់។
«យើងមានដៃគូរបស់យើងនៅជុំវិញតំបន់ នៅអូស្ត្រាលី នៅសហរដ្ឋអាមេរិក នៅសឹង្ហបុរី និងនៅម៉ាឡេស៊ីជាដើម អញ្ចឹងយើងទទួលបានព័ត៌មានជាក់ច្បាស់អំពីអ្វីដែលកំពុងកើតឡើងជាសាកល ម្ល៉ោះហើយអ្វីដែលយើងផ្ដោតគឺថា ជួយសហគ្រាសក្នុងស្រុកឱ្យមានលទ្ធភាពប្រកួតប្រជែងកាន់តែខ្លាំង»។
តួនាទីកាន់តែសំខាន់របស់វិស័យព័ត៌មានវិទ្យា និងទូរគមនាគមន៍នេះកើតមានឡើងនៅចំពេលដែលកម្ពុជាកំពុងស្ថិតក្នុងអន្តរកាលដ៏ធំក្នុងវិស័យបច្ចេកវិទ្យា។ តួលេខរបស់រដ្ឋាភិបាលខ្មែរបានបង្ហាញថា ចំនួនអ្នកប្រើ Internet បានកើនឡើងយ៉ាងគំហុកពីចំនួន៣សែននាក់ក្នុងឆ្នាំ២០១០ដល់ចំនួនជិត៧លាននាក់ គិតត្រឹមឆ្នាំ២០១៦នេះ។
រាល់សកម្មភាពប្រចាំថ្ងៃ រាប់ចាប់តាំងពីការធ្វើការងារតាមការិយាល័យ ការធ្វើជំនួញជួញដូរ ការទូទាត់សាច់ប្រាក់ ការសិក្សាស្រាវជ្រាវ រហូតដល់ការទទួលព័ត៌មាន ដំណឹងប្រចាំថ្ងៃ បាននឹងកំពុងពឹងផ្អែកកាន់តែខ្លាំងឡើងលើប្រព័ន្ធអេឡិចត្រូនិច និងប្រព័ន្ធ Internet នារយៈពេលប៉ុន្មានឆ្នាំចុងក្រោយនេះ។
ក្នុងន័យនេះ វិស័យព័ត៌មានវិទ្យានិងទូរគមនាគមន៍នៅកម្ពុជាបាននឹងកំពុងផ្ដល់ការងារដល់អ្នកបច្ចេកទេសប្រមាណ៣ម៉ឺននាក់នៅកម្ពុជា ហើយវិស័យឯកជនដែលមានតម្លៃសេដ្ឋកិច្ចប្រមាណ៨០០លានដុល្លារអាមេរិក គ្រោងនឹងបង្កើនទំហំទីផ្សារការងារក្នុងវិស័យនេះដល់១សែននាក់ និងតម្លៃមូលធនទីផ្សារដល់៣ពាន់លានដុល្លារអាមេរិក នៅក្នុងរយៈពេល១០ឆ្នាំខាងមុខ។ នេះបើតាមការប្ដេជ្ញារបស់លោក Steven Path ប្រធានសហព័ន្ធ ICT កម្ពុជា។
«អ្នកដែលទទួលបានការបណ្ដុះបណ្ដាលផ្នែកព័ត៌មានវិទ្យានៅកម្ពុជា គាត់មានមូលដ្ឋានគ្រឹះរឹងមាំ ដោយធាតុសំខាន់មួយគឺថា កម្រិតភាសាអង់គ្លេសរបស់គាត់ល្អ ដែលជាតម្រូវការមួយដ៏ចាំបាច់»។
សហព័ន្ធ ICT កម្ពុជាបានធ្វើការកែសម្រួលសមាសភាពដឹកនាំកាលពីខែមេសា ដើម្បីបើកផ្លូវដល់ការដាក់ចេញនូវគោលដៅច្បាស់លាស់ និងបង្កើតបរិយាកាសសមស្របដើម្បីទាក់ទាញសមាជិកថ្មីៗដែលមានសក្ដានុពលទាំងក្នុងស្រុក និងក្រៅស្រុក។
លោក Steven Path បាននិយាយអំពីសក្ដានុពលធនធានមនុស្សក្នុងវិស័យព័ត៌មានវិទ្យា និងទូរគមនាគមន៍របស់កម្ពុជា ដោយលើកឡើងថា វិស័យនេះមានជំនាញបច្ចេកទេស និងបាតគ្រឹះផ្នែកភាសាបានល្អបង្គួរ ដែលជាចំណុចទាក់ទាញមួយ ហើយវិស័យឯកជនក៏បាននឹងកំពុងព្យាយាមទាក់ទងវិនិយោគិនធំៗលំដាប់ពិភពលោក ដែលកំពុងធ្វើដំណើរជាបន្តបន្ទាប់មកតំបន់អាស៊ីអាគ្នេយ៍។
«យើងចង់ធ្វើការជាមួយក្រុមហ៊ុនលំដាប់អន្តរជាតិ ដើម្បីទាក់ទាញការវិនិយោគ ជួយកសាងមជ្ឈមណ្ឌលស្រាវជ្រាវ ដើម្បីជួយបណ្ដុះបណ្ដាលអ្នកជំនាញខាងព័ត៌មានវិទ្យាកម្ពុជា មានន័យថា កម្ពុជាត្រៀមខ្លួនរួចរាល់ដើម្បីទទួលឱកាសទាំងអស់នោះ ... ហើយប្រជាជនវ័យក្មេងរបស់កម្ពុជាពិតជាស្រេកឃ្លាននូវកាលានុវត្តភាពទាំងនោះណាស់»។
រដ្ឋាភិបាលខ្មែរបាននឹងកំពុងបោះដៃស្វែងរកកិច្ចសហការទ្រង់ទ្រាយធំពីវិស័យឯកជនដើម្បីជួយក្នុងការបង្កើនគុណភាពសេវាប្រព័ន្ធអេឡិចត្រូនិច ក៏ដូចជាចូលរួមគំនិតក្នុងការតាក់តែងបទដ្ឋានគតិយុត្តិនានាផងដែរ។ នេះបើតាមការពន្យល់របស់លោក Steven Path។
លោក Hiroshi Suzuki សេដ្ឋវិទូនៅវិទ្យាស្ថានស្រាវជ្រាវធុរកិច្ចនៃកម្ពុជា (BRIC) បានមើលឃើញពីសុទិដ្ឋិនិយមរបស់វិស័យព័ត៌មានវិទ្យា និងទូរគមនាគមន៍កម្ពុជា និងការចូលរួមរបស់វិស័យឯកជន ជាមួយនឹងការគ្របដណ្ដប់កាន់តែទូលំទូលាយនៃសេវាកម្ម Internet នៅទូទាំងប្រទេស។
លោកបានសរសេរក្នុងសារអេឡិចត្រូនិចមកកាន់ VOA ថា៖
«កម្ពុជាស្ថិតក្នុងចំណោមប្រទេសដែលជោគជ័យបំផុតក្នុងការអភិវឌ្ឍវិស័យទូរគមនាគមន៍ ... ហើយខ្ញុំរំពឹងទុកថា ការអភិវឌ្ឍរបស់វិស័យព័ត៌មានវិទ្យា និងទូរគមនាគមន៍នឹងកាន់តែមានល្បឿនលឿន ជាមួយនឹងគោលនយោបាយ និងជំនួយដ៏រឹងមាំពីរដ្ឋាភិបាល»។
លោក Miguel Chanco អ្នកវិភាគកិច្ចការអាស៊ានឱ្យអង្គភាពស៊ើបអង្កេតរបស់ទស្សនាវដ្ដី The Economist (EIU) បាននិយាយថា វិស័យព័ត៌មានវិទ្យា និងទូរគមនាគមន៍កម្ពុជាជួបនឹងបញ្ហាកង្វះការបណ្ដុះបណ្ដាលប្រកបដោយគុណភាព ហើយវិស័យឯកជនមានតួនាទីសំខាន់ក្នុងការចូលរួមចំណែកជួយសម្រាលបន្ទុកទាំងនេះ។
លោកបានសរសេរក្នុងសារអេឡិចត្រូនិចមកកាន់ VOA ថា៖
«សហព័ន្ធ ICT កម្ពុជាគួរណាស់តែជួយជំរុញការតស៊ូមតិផ្នែកគោលនយោបាយលើវិស័យនេះ នៅក្នុងប្រទេស ដើម្បីបង្កើនគុណភាពរបស់សហគ្រាស ហើយសហព័ន្ធនេះគួរតែក្លាយជាមូលដ្ឋានដើម្បីបង្កើននូវសក្ដានុពលរបស់វិស័យ ICT កម្ពុជា»។
លោក Chanco បានបន្ថែមថា បើកាលណាមានគោលដៅ និងចក្ខុវិស័យច្បាស់លាស់ហើយនោះ វិស័យព័ត៌មានវិទ្យា និងទូរគមនាគមន៍នឹងជួយសេដ្ឋកិច្ចខ្មែរបោះជំហានបានវែង និងឆាប់រហ័ស៕
