រាជរដ្ឋាភិបាលកម្ពុជាបានសម្រេចទុកឱ្យក្រុមហ៊ុនសម្បទានដីសេដ្ឋកិច្ចចំនួន១២បន្ថែមទៀតបន្តសកម្មភាពវិនិយោគដំណាំកសិ-ឧស្សាហកម្មប៉ុន្តែបានកាត់បន្ថយរយៈពេលមកនៅត្រឹមតែ៥០ឆ្នាំវិញ។
ការប្រកាសពីសេចក្តីសម្រេចនេះធ្វើឡើងចំពេលដែលក្រុមការពារបរិស្ថានរកឃើញថា វិនាសកម្មព្រៃឈើបានកើតមានឡើងដោយសារតែគោលនយោបាយអភិវឌ្ឍន៍និងវិនិយោគរបស់រដ្ឋាភិបាលលើផ្នែកដីសម្បទានសេដ្ឋកិច្ចនេះ។
សេចក្ដីប្រកាសព័ត៌មានរបស់ក្រសួងបរិស្ថានដែលចេញផ្សាយនៅថ្ងៃពុធបញ្ជាក់ថាក្រុមហ៊ុនទាំងនោះចំនួន៨មានទីតាំងស្ថិតនៅក្នុងខេត្តក្រចេះកំពុងអភិវឌ្ឍន៍នៅក្នុងដែនជម្រកសត្វព្រៃស្នួល និងក្នុងតំបន់ជម្រកសត្វព្រៃស្នួលនៅខេត្តឧត្តរមានជ័យនិងព្រះវិហារមានចំនួន៤ក្រុមហ៊ុនដែលអភិវឌ្ឍន៍នៅក្នុងដែនជម្រកសត្វព្រៃគូលែន-ព្រហ្មទេព។
លោក ស្រ៊ុន ដារិទ្ធិ នាយខុទ្ទកាល័យក្រសួងបរិស្ថានបានបញ្ជាក់ប្រាប់ VOA ថា៖
«យើងពិនិត្យទៅឃើញថាគាត់បានបំពេញនីតិវិធីគោលការណ៍ជាមូលដ្ឋានតាមការណែនាំក៏ដូចជាតម្រូវការរបស់រដ្ឋាភិបាលហើយគាត់បានអនុវត្តមានវឌ្ឍនភាពជាក់ស្តែងហើយគាត់ពិតជាធ្វើការវិនិយោគមែនគឺមិនមែនយកទៅគោលដៅអ្វីផ្សេងទេ។ ហើយផលប៉ះពាល់ជាមួយនឹងប្រជាពលរដ្ឋគាត់ក៏បានដោះស្រាយចប់សព្វគ្រប់អស់ហើយដែរ។ ចឹងបានយើងអនុញ្ញាតឱ្យគាត់បន្តអនុវត្តគម្រោងគាត់បន្តទៀត»។
លោកបានបន្ថែមថាក្រុមហ៊ុនទាំងនោះធ្វើការវិនិយោគលើដំណាំកសិ-ឧស្សាហកម្ម ដែលមានដំណាំ ចម្បងគឺកៅស៊ូ ដំឡូងមី និងម្រេច។
អង្គការសង្គមស៊ីវិលមួយក្រុមបានចេញរបាយការណ៍ថ្មីមួយកាលពីថ្ងៃពុធដែរ បង្ហាញពីវិនាសកម្ម ព្រៃឈើដែលបានកើតឡើងនៅក្នុងខេត្តភាគឦសានចំនួនពីរនៅក្នុងប្រទេសកម្ពុជាដោយសារក្រុមហ៊ុនឯកជនដាំដំណាំកសិ-ឧស្សាហកម្ម។
របាយការណ៍ដែលមានចំណងជើងថា «ការកាប់ឈើនិងបរិបាលកិច្ច៖ ការកាប់ឈើខុសច្បាប់ជាប្រព័ន្ធ និងការបំផ្លាញព្រៃឈើរដ្ឋ និងតំបន់ការពារ» បានផ្តោតទៅលើខេត្តរតនគិរី និងខេត្តស្ទឹងត្រែងដែលជាទីទាក់ទាញដល់ក្រុមហ៊ុនឯកជនដើម្បីដាក់ទុនដាំដំណាំឧស្សាហកម្ម ជាពិសេសដំណាំកៅស៊ូ។ របាយការណ៍ឲ្យដឹងថា ក្រុមហ៊ុនជាច្រើន បានកាប់ឈើ ដករំលើងដើមឈើទាំងឫស និង ដាំដំណាំកៅស៊ូជំនួស។
ទីតាំងស្នូលដែលរបាយការណ៍នេះ បានផ្តោតជាសំខាន់នោះគឺតំបន់សួនឧទ្យានជាតិវិរជ័យដែលជាតំបន់ការពារ និងមានទីតាំងនៅភាគខាងជើងខេត្តរតនគិរី និងស្ទឹងត្រែង។
ក្រសួងបរិស្ថានក៏បានឱ្យដឹងដែរថាមានក្រុមហ៊ុនពីរទៀតនៅក្នុងឧទ្យានជាតិវីរជ័យក្នុងខេត្តរតនគិរីត្រូវបានរាជរដ្ឋាភិបាលអនុញ្ញាតបន្តនីតិវិធីដោយទុករយៈពេល៦ខែដើម្បីតាមដានវឌ្ឍនភាពនិងកែសម្រួលរយៈពេលវិនិយោគពី៧០ឆ្នាំមកត្រឹម៥០ឆ្នាំវិញ។
រហូតមកដល់ពេលនេះមានគម្រោងវិនិយោគអភិវឌ្ឍន៍ចំនួន១១៣ត្រូវបានរាជរដ្ឋាភិបាលពិនិត្យនិងវាយតម្លៃហើយបានសម្រេចនិរាករណ៍ចោលគម្រោងរបស់ក្រុមហ៊ុនចំនួន២៣និងបួនត្រូវក្រុមហ៊ុនប្រគល់ដោយស្ម័គ្រចិត្តមកឱ្យរាជរដ្ឋាភិបាលវិញ៕
