ភ្នំពេញ៖ លោក រ៉ុង ឈុន ដែលជាប្រធានសមាគមគ្រូបង្រៀនឯកជ្យកម្ពុជា និងជាសកម្មជនទាមទារសិទ្ឋិកម្មករដ៏លេចធ្លោមួយរូបត្រូវបានតុលាការខេត្តកណ្តាលបានកោះហៅឲ្យចូលបំភ្លឺនៅថ្ងៃព្រហស្បតិ៍អស់រយៈពេលជិតបីម៉ោង ក៏ប៉ុន្តែតុលាការមិនទាន់មានការចោទប្រកាន់ណាមួយជាផ្លូវការទេ។
លោករ៉ុង ឈុនត្រូវបានថៅកែរោងចក្រតៃយានដែលមានទីតាំងនៅស្រុកអង្គស្នួលខេត្តកណ្តាលប្តឹងពីបទញុះញង់កម្មករឲ្យធ្វើកូដកម្មខុសច្បាប់ និងបរិហាកេរ្តិ៍ ដែលបានធ្វើឡើងកាលពីថ្ងៃទី២៥ដល់ថ្ងៃទី៣០ខែមិថុនាកន្លងទៅនេះ។
តុលាការខេត្តកណ្តាលបានចេញដិកាកោះហៅ លោករ៉ុង ឈុន ឲ្យចូលបំភ្លឺក្នុងតុលាការជាលើកទី១កាលពីថ្ងៃទី១១ ក៏ប៉ុន្តែលោកបានស្នើសុំឲ្យលើកពេលរហូតដល់ថ្ងៃព្រហស្បតិ៍នេះ តុលាការបានចេញដិកាកោះលើកទី២ទៀត។
នៅក្នុងបរិវេណតុលាការខេត្តកណ្តាលមានមន្ត្រីឈ្លាំមើលការរំលោភសិទ្ឋិមនុស្ស អ្នកតំណាងរាស្ត្រនិងសមាជិកព្រឹទ្ឋសភានៃគណបក្សប្រឆាំង ព្រមទាំងអតិតតំណាងកម្មករនៃរោងចក្រតែយានប្រមាណជាង២០នាក់បានមកស្តាប់ និងរងចាំលទ្ឋផលនៃការសាកសួររបស់តុលាការ។
អ្នកស្រីផូ ហានអាយុ៣៨ឆ្នាំអតីតកម្មករមកពីរោងចក្រតៃណានដែលបានមកគាំទ្រលោករ៉ុង ឈុននៅក្នុងបរិវេនតុលាការខេត្តកណ្តាលបាននិយាយថា លោក រ៉ុង ឈុន មិនបានញុំញង់ក្រុមកម្មករទេ។ អ្នកស្រីបាននិយាយថា ពួកអ្នកស្រីបានពឹងពាក់លោក រ៉ុង ឈុន ឲ្យជួយរកដំណោះស្រាយក្រោយពីថៅកែរោងចក្របានរំលោភសិទ្ឋិដល់ក្រុមកម្មករ។
«អត់មានជាប់អ្វីទាំងអស់ពីព្រោះពួកខ្មុំស្ម័គ្រចិត្តធ្វើដោយខ្លួនឯង។ ហើយពួកខ្ញុំមកនេះក៏ចង់លើកទឹកចិត្តគាត់ថា គេចោទប្រកាន់គាត់គឺមិនពិតទេពីព្រោះពួកខ្ញុំទាំងអស់គ្នាស្ម័គ្រចិត្តធ្វើដោយខ្លួនឯងតាំងពីដើមមកដល់ចប់»។
លោករ៉ុង ឈុនបានថ្លែងប្រាប់ក្រុមអ្នកយកព័ត៌មានបន្ទាប់ពីលោកបញ្ចប់ការសាកសួរថា លោកបានប្រាប់លោកព្រះរាជអាជ្ញាថារាល់អ្វីដែលលោកបានចូលរួមធ្វើកូដកម្មនោះដោយសារមានលិខិតពឹងពាក់ពីក្រុមកម្មករឲ្យលោកជួយរកដំណោះស្រាយ។
លោកបានមានប្រសាន៍ថា ជំហររបស់លោក និងមិនមានការរាថយទេដើម្បីបង្កើនការការពារដល់ក្រុមកម្មកររហូតដល់ពួកគេមានប្រាក់បៀវត្សរ៍សមរម្យ។
«នេះគ្រាន់តែជាដិកាដើម្បីចូលមកសាកសួរនិងបំភ្លឺពាក់ព័ន្ឋទៅហ្នឹងពាក្យបណ្តឹងនាយកក្រុមហ៊ុនតៃណាន អតីតរោងចក្រតៃយាន។ គ្រាន់ពាក់ព័ន្ឋគេប្តឹងខ្ញុំដែលខ្ញុំចុះទៅជួយអន្តរាគមន៍ចុះទៅជួយកម្មករតាមរយៈការពឹងពាក់របស់បងប្អូនកម្មករកម្មការីនី»។
លោកទេព មុនិន្ន តំណាងអយ្យការតុលាការខេត្តកណ្តាលនៅថ្ងៃព្រហស្បតិ៍នេះមិនអាចស្នើសុំការបំភ្លឺបានទេ។
អ្នកស្រីហេង បុង មេធាវីការពារក្តីលោករ៉ុង ឈុនបាននិយាយថា លោកតំណាងអយ្យការគ្រាន់តែបានកោះហៅកូនក្តីរបស់អ្នកស្រី ដើម្បីសាកសួរទាក់ទិននឹងពាក្យបណ្តឹងតែប៉ុណ្ណោះ។ មិនទាន់មានការចោទប្រកាន់នៅឡើយទេ។ អ្នកស្រីសង្ឃឹមថាតុលាការនឹងផ្តល់យុត្តិធម៌ដល់កូនក្តីរបស់អ្នកស្រី។
«នាងខ្ញុំជាមេធាវីមានសិទ្ឋិការពារផលប្រយោជន៍ ការពារកូនក្តីតាមផ្លូវច្បាប់ទាក់ទងការទម្លាក់ការចោទប្រកាន់ ឬមិនចោទប្រកាន់ជាសិទ្ឋិរបស់តំណាងអយ្យការ»។
លោក ជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជាបានផ្តាច់ខ្លួនចេញពីសហភាពសហជិពកម្ពុជា។ លោកបានចូលរួមការតវ៉ាជាមួយក្រុមកម្មករដើម្បីទាមទារលក្ខខណ្ឌការងារ និងការតវ៉ារឿងរំលោភចាប់យកដីធ្លីរបស់អ្នកភូមិបឹងកក់ និងបូរីកីឡា៕
