ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តុលាការ​ខេត្តកណ្តាល​បាន​កោះហៅ​ប្រធាន​សហព័ន្ធ​សហជីព​កម្មករ​កម្ពុជា ​


ពលការនី​រោងចក្រ​ស្រែកតវ៉ា។
ពលការនី​រោងចក្រ​ស្រែកតវ៉ា។
វ៉ាស៊ីនតោន៖ តុលាការ​ខេត្តកណ្តាល​បាន​កោះហៅ​ប្រធាន​សហព័ន្ធ​សហជីព​កម្មករ​កម្ពុជា ​លោក​ រ៉ុង ឈុន​ឲ្យ​ចូល​បំភ្លឺ​ពី​បទ​ញុះញង់​ឲ្យ​មាន​កូដកម្ម​ខុសច្បាប់​និង​បទបរិហាកេរ្តិ៍ ​ជា​សាធារណៈ​តាម​បណ្តឹង​របស់​អគ្គនាយក​សហគ្រាស​តៃយាន Jack Liu។
បើ​តាម​ដីការ​កោះ​របស់​លោក​ព្រះរាជ​អាជ្ញា​អមតុលាការ​ខេត្តកណ្តាល​ ទេព មុនិន្ទ​បាន​អញ្ជើញ​លោក រ៉ុង ឈុន​ឱ្យ​ចូល​ខ្លួន​បំភ្លឺ​នៅថ្ងៃទី​១១​ខែកញ្ញាឆ្នាំ​២០១២​ដើម្បី​សាកសួរ​ទាក់ទង​នឹង​បណ្តឹង​របស់​ដើមចោទ។

លោក រ៉ុង ឈុន​បញ្ជាក់ថា​លោក​បាន​ទទួល​ដីការ​នៅព្រឹក​ថ្ងៃពុធ​ហើយ​លោក​ថ្លែង​ថា​បាតុកម្ម​របស់​កម្មករ​រាប់ពាន់​នាក់​នៃ​រោងចក្រ​តៃយាន​នៅស្រុក​អង្គស្នួល ​ខេត្តកណ្តាល​ កាលពីខែ​មិថុនា​នេះ​កើតឡើង ​ដើម្បី​ទាមទារ​សិទ្ធិសេរីភាព ​និង​ផលប្រយោជន៍​ របស់​ពួកគេ​ ក្រោយ​ពេល​ដែល​រោងចក្រ​ តៃយាន​ផ្លាស់ប្តូរ​ឈ្មោះរោងចក្រ​ទៅជា​រោងចក្រ​តៃណាន​ ហើយ​ពុំបាន​ជូន​ដំណឹង​ដល់​កម្មករ​និង​ផ្តល់​ការធានា​ពី​អតីតភាព​កាងារ ​និងផល​ប្រយោជន៍​កម្មករ​ ផ្សេងៗទៀត ​ហើយ​ក៏​គ្មាន​ដំណោះស្រាយ​ពីរោងចក្រ​ និង​ក្រសួង​ការងារ។

«អីចឹង​បន្ទាប់​មក​ទៀត​ខ្ញុំ​ក៏​បាន​ជូន​ដំណឹង​ទៅ​អាជ្ញាធរ​ពាក់ព័ន្ធ​ថា​បើគ្មាន​ដំណោះស្រាយ​ទេ​ថ្ងៃ២៥មិថុនា​ហ្នឹង ​យើង​នឹង​ចាប់​ផ្តើម​ធ្វើ​កូដកម្ម​បាតុកម្ម។ អីចឹង​ដំណើរ​រឿង​ហ្នឹង​វាត្រូវ​ទៅ​តាម​នីតិវិធី។​ ហើយ​អ្វី​ដែល​និយោជក​ចោទ​ប្រកាន់​ថា​ ធ្វើខុស​ច្បាប់​វាជា​រឿង​មួយ​អត់​ត្រឹមត្រូវ»។

លោក រ៉ុង ឈុន​បាន​អះអាង​ថា​លោក​នឹង​រកមេធាវី​ដើម្បី​ចូលបំភ្លឺ​លើ​ពាក្យ​បណ្តឹង ​ដែល​លោក​ចាត់ទុកថា​ប្រឆាំង​នឹង​ការ​ប្រើប្រាស់​សិទ្ធិ​ស្របច្បាប់​របស់​លោក​ក្នុង​ការជួយ​កម្មករ។​ លោក​បាន​ថ្លែង​ថា​ប្រព័ន្ធ​តុលាការ​កម្ពុជា​ពេល​នេះ​កំពុង​ពេញ​និយម​ក្នុង​ការ​ចាត់វិធានការ​លើ​កម្មករ​និង​សហជីព។

«ហើយ​ឥឡូវ​ហ្នឹង​កំពុង​ពេញ​និយម​ហើយ​ នៅស្រុកខ្មែរ​ឥឡូវហ្នឹង​ ដែលនិយោជក​ យក​ប្រព័ន្ធ​តុលាការ​មក​គាប​សង្កត់​លើ​កម្មករ​ គាប​សង្កត់​លើ​មេដឹកនាំ ​សហជីព ​ឱ្យ​តែ​មាន​បាតុកម្ម កើតឡើង​ដឹងតែ​ឲ្យ​តុលាការ​ហ្នឹង ​ចេញ​ដីការ​រក្សា​ការពារ​ឬ​ប្តឹង​មេដឹកនាំ​សហជីព ​ប្តឹង​តំណាង​កម្មករ​ដូចជា ​រោងចក្រ​តៃណាន​ អតីត​រោងចក្រ​តៃយាន»។
លោក អំ សំអាត ​ប្រធាន​ក្រុម​អ្នកស៊ើប​អង្កេត​នៃ​អង្គការ​សិទ្ធិ​មនុស្ស​លីកាដូ ​បាន​អះអាង​ថា​ការតវ៉ា​របស់​កម្មករ​មិនសូវ​ត្រូវគេ​យក​ចិត្ត​ទុកដាក់​រក​ដំណោះស្រាយ​ទេ​ក្រៅតែ​ពី​ការបំបែក​ការតវ៉ា​ ការចាត់​វិធានការ​តុលាការ​ចាប់ខ្លួន ​ឃុំខ្លួន​ជាដើម​ ដែល​លោក​ចាត់ទុកថា​មិនមែន​ជា​ដំណោះស្រាយ​នោះ។

«យើង​ឃើញ​ថា​វាជា​វប្បធម៌​ទៅ​ហើយ​ គេប្រើប្រាស់​តុលាការ​ដើម្បី​ធ្វើជា ​មធ្យោបាយ​ ក្នុងការ​គាបសង្កត់​ទៅលើ​សហជីព​ឬ​ក៏តំណាង​សហជីព ​ឬ​ក៏​តំណាង​កម្មករ​ដែល​ទង្វើ​ទាំងអស់​នេះ​ជា​ការណ៍​មួយ​ដែល​គំរាម​កំហែង​ ឬ​ក៏​បំបាក់​ស្មារតី​ដល់​តំណាង​កម្មករ​ផ្សេងៗ​ទៀត​ដើម្បី​កុំ​ឲ្យ​តវ៉ា»។
លោករ៉ុង ឈុន ​និង​លោក​ អំ សំអាត​ថ្លែង​ថា​កំណើន​នៃ​ការ​បង្រ្កាប​ តំណាង​ កម្មករ​និង​សហជីព​អាច​ធ្វើ​ឲ្យ​ប៉ះពាល់​ដល់អ្នក​បញ្ជា​ទិញ​ទំនិញ​ដែល​នៅ​សរអា​និង​អឺរ៉ុប​ចំពោះ ផលិតផល​ វាយនភណ្ឌ​ដែល​រក​ចំណូល​ជាង២ពាន់​លាន​ដុល្លារ​ក្នុង​មួយ​ឆ្នាំៗ​និង ​ជា​វិស័យ​ទ្រទ្រង់​សេដ្ឋកិច្ច​កម្ពុជា​ដ៏​សំខាន់។ ​ក្រុម​អ្នកសង្កេតការណ៍​បាន​សង្កេត​ឃើញ​ថា​មាន​កំណើន​នៃ​ចំណាត់ការ​តុលាការ​ជាច្រើន​ទៅ​លើ​សកម្មជន​និង​អ្នករិះគន់​រដ្ឋាភិបាល​មុនពេល​បោះឆ្នោត​ជា​សកល៕
XS
SM
MD
LG