ប្រទេសកម្ពុជាស្ថិតនៅស្ទើរតែក្រោមគេបំផុតខាងផ្នែកនីតិរដ្ឋ បើប្រៀបធៀបនឹងប្រទេសនានាលើពិភពលោកដោយទទួលបានចំណាត់ថ្នាក់៩៩ក្នុងចំណោមប្រទេស១០២។ នេះបើយោងតាមរបាយការណ៍អង្កេតមួយធ្វើឡើងដោយគម្រោងយុត្តិធម៌ពិភពលោក (World Justice Project) ដែលបានចេញផ្សាយនៅថ្ងៃអង្គារនេះ។
ការអង្កេតរបស់គម្រោងយុត្តិធម៌ពិភពលោកដែលមានមូលដ្ឋាននៅរដ្ឋធានីវ៉ាស៊ីនតោន សហរដ្ឋអាមេរិកបានវាស់ស្ទង់លើកម្រិតនៃការអនុវត្តតាមគោលការណ៍នីតិរដ្ឋ ដែលពលរដ្ឋនានានៅជុំវិញពិភពលោកជួបប្រទះក្នុងជីវភាពប្រចាំថ្ងៃរបស់ពួកគេ។
តារាងវាយតម្លៃធ្វើការវាស់ស្ទង់ពិនិត្យលើចំណុចជាច្រើនដូចជា ការកម្រិតនៃអំណាចរដ្ឋ អំពើពុករលួយ សិទ្ធិមនុស្ស ការអនុវត្តច្បាប់ ប្រព័ន្ធតុលាការ និងការបើកចំហររបស់រដ្ឋាភិបាលជាដើម។
អង្គការនេះឱ្យដឹងថា អំពើពុករលួយក្នុងប្រព័ន្ធតុលាការស្ថិតក្នុងចំណោមចំណុចអវិជ្ជមានខ្លាំងជាងគេបំផុតនៅក្នុងប្រទេសកម្ពុជា ដែលធ្វើឲ្យប្រទេសនេះមានលំដាប់អាក្រក់ជាងគេបំផុតនៅលើពិភពលោកខាងយុត្តិធម៌សម្រាប់ជនស៊ីវិល។ ហើយប្រទេសដ៏ក្រីក្រមួយនេះក៏ស្ថិតនៅបាតតារាងខាងផ្នែកនីតិរដ្ឋ បើប្រៀបធៀបនឹងប្រទេសនៅក្នុងតំបន់អាស៊ីបូព៌ា និងប៉ាស៊ីហ្វិក ដោយបានចំណាត់ថ្នាក់១៥ក្នុងចំណោមប្រទេសចំនួន១៥។ ប៉ុន្តែ ស្ថានភាពសិទ្ធិមនុស្សក្នុងប្រទេសកម្ពុជាមានលក្ខណៈល្អប្រសើរជាងប្រទេសចិននិងភូមាបន្តិច។
អង្គការនេះបានសង្កេតលើប្រទេសតែចំនួន១០២ប៉ុណ្ណោះ ដោយសារមានប្រទេសមួយចំនួនដែលអង្គការនេះប្រមូលទិន្នន័យមិនបានដូចជាប្រទេសឡាវជាដើម។ ប្រទេសវៀតណាម និងប្រទេសថៃដែលនៅជិតខាងមានចំណាត់ថ្នាក់៦៤ និង៥៦ រៀងៗខ្លួន។ ប្រទេសដែលមានចំណាត់ថ្នាក់អន់ជាងគេបំផុតលើពិភពលោកគឺវេណេហ្ស៊ុយអេឡា ដោយទទួលបានលេខ១០២។
គម្រោងយុត្តិធម៌ពិភពលោក(WJP) គឺជាអង្គការឯករាជ្យនិងផ្តោតលើពហុវិស័យ ដែលធ្វើការដើម្បីជួយជំរុញនីតិរដ្ឋនៅជុំវិញពិភពលោក។ អង្គការនេះជឿថា នីតិរដ្ឋផ្តល់នូវមូលដ្ឋានសម្រាប់ឱ្យសហគមន៍ទទួលបានឱកាស និងសមភាពសម្រាប់ការលូតលាស់សេដ្ឋកិច្ច និងឱ្យរដ្ឋាភិបាលទទួលខុសត្រូវ និងគោរពសិទ្ធិមនុស្ស៕
