ភ្នំពេញ៖ លោកនាយករដ្ឋមន្ត្រីហ៊ុន សែននៃប្រទេសកម្ពុជា នៅថ្ងៃព្រហស្បតិ៍នេះបានស្វះស្វែងរកការលើកលែងទោសចំពោះជនជាតិថៃចំនួនពីរនាក់ដែលកំពុងជាប់ឃុំក្នុងប្រទេសកម្ពុជាពីបទធ្វើចារកម្មក្នុងតំបន់ហាមឃាត់យោធាកាលពីឆ្នាំ២០១០។
ការស្នើសុំឲ្យមានការលើកលែងទោសនិងបន្ធូរបន្ថយទោសនេះបានកើតមានឡើងបន្ទាប់ពីជំនួបចំនួនពីរលើករវាងលោកនាយករដ្ឋមន្ត្រីហ៊ុន សែននិងលោកស្រីយីងឡាក់ ស៊ីណាវ៉ាត់ នាយករដ្ឋមន្ត្រីថៃ នៅក្នុងពេលកិច្ចប្រជុំកំពូលអាស៊ានលើកទី២១កាលពីខែវិច្ឆកានិងបានលើកសំណើនេះម្តងទៀតនៅថ្ងៃព្រហស្បតិ៍នេះ។
សេចក្តីប្រកាសព័ត៌មានរបស់ក្រសួងការបរទេសបាននិយាយថា ឆ្លើយតបនឹងសំណើរបស់លោកស្រីយីង ឡាក់ លោកនាយករដ្ឋមន្ត្រីហ៊ុន សែនបានស្នើទៅក្រសួងយុត្តិធម៌ឲ្យធ្វើការពិចារណាបន្ធូរបន្ថយទោសដល់ទណ្ឌិត វីរ៉ា ស៊ុមក្វាមឃីត ដើម្បីឈានទៅរកការលើកលែងទោសនាពេលខាងមុខនិងលើកលែងទោសដល់អ្នកស្រីរ៉ាទ្រី ពីតាណាប៉ៃប៊ូន។
លោកហ៊ុន សែនបាននិយាយថា ការលើកលែងទោសនេះអាចនឹងធ្វើឡើងក្នុងឱកាសព្រះរាជពិធីថ្វាយព្រះភ្លើងព្រះបរមសពសម្តេចឪ។
លោកប៊ុន យ៉ៃណារិន នាយករងខុទ្ទកាល័យក្រសួងយុត្តិធម៌ បាននិយាយថា ក្រសួងបានទទួលលិខិតស្នើសុំរបស់លោកនាយករដ្ឋមន្ត្រីហ៊ុន សែនរួចហើយ ក៏ប៉ុន្តែលោកសុំមិនធ្វើអត្ថាធិប្បាយទេដោយបានបង្វែសំណួរនេះទៅលោកសម ប្រជាមានិត។
«និយាយរួមការងារហ្នឹងបងអាចសួរឯកឧត្តមសម ប្រជាមានិត ពីព្រោះគាត់អ្នកដឹងការងារហ្នឹងច្បាស់»។
វីអូអេបានព្យាយាមជាច្រើនលើកតាមទូរស័ព្ទដើម្បីទាក់ទងលោកសម ប្រជាមានិត នាយកខុទ្ទកាល័យក្រសួងយុត្តិធម៌ ដើម្បីសុំការបំភ្លឺ តែពុំមានអ្នកទទួលទូរស័ព្ទ។
កាលពីថ្ងៃទី២៩ ខែធ្នូឆ្នាំ២០១០ អាជ្ញាធរកម្ពុជាបានចាប់ខ្លួនជនជាតិថៃសរុបចំនួនប្រាំពីរនាក់ក្នុងនោះមានអ្នកតំណាងរាស្រ្តគណបក្សប្រជាធិបតេយ្យថៃគឺលោក Panich Vikitsreth ព្រមទាំងលោក វីរ៉ា ស៊ុមក្វាមឃីត និងអ្នកស្រីរ៉ាទ្រី ពីតាណាប៉ៃប៊ូនក្រោមបទចោទប្រកាន់ថា ពួកគេបានឆ្លងចូលមកកាន់ប្រទេសកម្ពុជាដោយខុសច្បាប់។
តុលាការកម្ពុជាបានកាត់ទោសលោកវីរ៉ា ស៊ុមក្វាមឃីតឲ្យជាប់ពន្ធនាគាររយៈពេល៨ឆ្នាំ ចំណែកឯអ្នកស្រីរ៉ាទ្រីមានទោសជាប់ពន្ធនាគាររយៈពេល៦ឆ្នាំពីបទធ្វើចារកម្មនៅក្នុងតំបន់ហាមឃាត់។
វីអូអេព្យាយាមទាក់ទងមន្ត្រីស្ថានទូតថៃនៅក្នុងប្រទេសកម្ពុជាដើម្បីស្នើសុំសេចក្តីអត្ថាធិប្បាយ តែមិនអាចទាក់ទងបានទេ។ ក៏ប៉ុន្តែបើតាមការសែតថៃមួយឈ្មោះបាងកកប៉ុស្តិ៍ដែលបានចុះផ្សាយនៅថ្ងៃព្រហស្បតិ៍នេះបានស្រង់សម្តីលោកស្រីយិង ឡាក់ថា អ្នកស្រីទទួលបានកំណត់សម្គាល់ពីការវិវត្តន៍របស់រដ្ឋាភិបាលកម្ពុជា។ អ្នកស្រីបានបញ្ជាក់ថា ការបន្ធូរបន្ថយទោសដល់ទណ្ឌិតជនជាតិថៃទាំងពីរនាក់នេះបានបង្ហាញនូវការរីកចម្រើននៃកិច្ចសហប្រតិបត្តិការរវាងប្រទេសទាំងពីរ៕
