ភ្ជាប់​ទៅ​គេហទំព័រ​ទាក់ទង

តុលាការ​ចោទប្រកាន់​និង​ឃុំ​ខ្លួន​តំណាងរាស្រ្ត​ជាប់​ឆ្នោត​គណបក្ស​ប្រឆាំង​៥​នាក់

  • ហេង រស្មី

តុលាការ​ក្រុង​ភ្នំពេញ​នៅ​ថ្ងៃ​ពុធ​នេះ​បាន​សម្រេចឃុំ​ខ្លួន​បណ្តោះ​អាសន្ន អ្នក​តំណាង​រាស្ត្រ​ជាប់​ឆ្នោត​គណបក្ស​សង្គ្រោះជាតិ​ដ៏​លេច​ធ្លោ​ចំនួន​៥​នាក់​និង​ជំនួយ​ការ​អ្នក​ស្រី​មូរ សុខហួរ​ម្នាក់នៅ​ពន្ធនាគារព្រៃ​ស​ដើម្បី​រង់ចាំ​ជំនុំ​ជម្រះ​ទោស​បន្ទាប់​ពី​មាន​អំពើ​ហិង្សា​មួយ​នៅ​ក្បែរ​សួន​ប្រជាធិបតេយ្យ​កាល​ពី​ថ្ងៃ​អង្គារ។​

គណបក្ស​សង្គ្រោះ​ជាតិ​បាន​ប្រកាស​ជា​សាធារណៈ​ថា​នឹង​ដឹក​នាំ​ធ្វើ​មហា​បាតុកម្ម​ប្រសិន​ណា​បើ​អ្នក​តំណាង​រាស្ត្រ​ជាប់​ឆ្នោត​ទាំង​៥​រូប​និង​សកម្មជន​គណបក្ស​ម្នាក់​ទៀតមិន​ត្រូវ​បាន​ដោះ​លែង​ចេញ​ពី​ពន្ធនាគារក្នុង​ពេល​ឆាប់​ៗ​ខាង​មុខនេះ​ទេ។​

អ្នក​តំណាង​រាស្ត្រ​ជាប់​ឆ្នោត​ទាំង​៥​រូប​រួម​មាន​ លោក​ស្រី​ មួរ សុខ​ហួរ​ លោក​ ហូរ វ៉ាន់​ លោក​ រៀល ខេមរិន្រ្ទ​ លោក​ កែវ ភារម្យ​ និង លោក​ ម៉ែន សុថាវរិន្រ្ទ។ ចំណែក​ ​លោក​ អឿ ណារិទ្ធ ​ជំនួយ​ការ​អ្នក​ស្រី​មូរ សុខហួរ​ ម្នាក់​ទៀតត្រូវ​បាន​អាជ្ញាធរ​មាន​សមត្ថកិច្ច​ចាប់​ខ្លួននៅ​ព្រឹក​ថ្ងៃ​ពុធនេះ។​

​លោក​អំ សំអាត​ ប្រធាន​ផ្នែក​ស៊ើប​អង្កេត​របស់​អង្គការ​សិទ្ធិ​មនុស្ស​លីកាដូបាន​បញ្ជាក់​ថា​ អ្នក​តំណាង​រាស្ត្រ​ជាប់​ឆ្នោត​ទាំង​៥​រូប​និង​លោក​ អឿ ណារិទ្ធ​ ​ត្រូវ​បាន​តុលាការ​ចោទ​ប្រកាន់​ចំនួន​៣​បទ​ល្មើស​ផ្សេងៗ​គ្នា​គឺ៖​ «ផ្តើម​គំនិត​ធ្វើ​កុប្បកម្ម​ខុស​ច្បាប់​មាត្រា​ទី​២៨​និង​ ៤៥៩​ ផ្តើម​គំនិតឱ្យ​មាន​អំពើ​ហិង្សា​ដោយ​ចេតនា​ដោយ​មាន​ស្ថានទម្ងន់​ទោស​តាម​មាត្រា​ទី​ ២១៨​ និង​ផ្តើម​គំនិត​ញុះញង់​ឱ្យប្រព្រឹត្ត​បទឧក្រិដ្ឋ​ជា​អាទិ៍​ តាម​មាត្រាទី​ ៤៩៥»។​

កង​កម្លាំង​មាន​សមត្ថកិច្ច​របស់​រដ្ឋាភិបាល​កាល​ពី​ថ្ងៃ​អង្គារ​និង​ថ្ងៃ​ពុធ​បាន​ចាប់​ខ្លួន​អ្នក​តំណាង​រាស្ត្រជាប់​ឆ្នោត​គណបក្ស​សង្គ្រោះជាតិ​ចំនួន​៥​រូប​ជាបន្ត​បន្ទាប់ ​រួច​ហើយ​យក​ទៅ​ឃុំ​ឃាំង​នៅ​ស្នង​ការ​ប៉ូលិស​ក្រុង​ភ្នំពេញ​មួយយប់​ ដោយ​មាន​ដៃ​ជាប់​ខ្នោះ​ទៅ​ក្រោយ។​

ការ​ចាប់​ខ្លួន​អ្នក​តំណាង​រាស្ត្រ​របស់​គណបក្ស​សង្គ្រោះ​ជាតិ​បាន​កើត​មាន​ឡើង​ក្រោយ​ពី​មាន​ការ​ប៉ះ​ទង្គិច​ដោយ​អំពើ​ហិង្សា​មួយ​នៅ​ក្រៅ​បរិវេណ​ទីលាន​ប្រជាធិបតេយ្យ​ដែល​បាន​បណ្តាល​ឱ្យមាន​ក្រុម​សន្តិសុខ​របស់​ខណ្ឌ​ដូន​ពេញ​និង​សកម្មជន​គណបក្ស​សង្គ្រោះ​ជាតិ​ប្រមាណ​ជាង​៥០​នាក់​បាន​រង​របួស។​

តុលាការ​ក្រុង​ភ្នំពេញ​ក្រោយ​ពី​បាន​សាកសួរ​អស់​រយៈ​ពេល​ពេញ​មួយ​ថ្ងៃ​បាន​ចេញ​ដីការ​សម្រេចឃុំ​ខ្លួន​អ្នក​តំណាង​រាស្ត្រ​ទាំង​៥​រូប​និង​ជំនួយ​ការ​ម្នាក់​របស់​អ្នក​ស្រី​មូរ សុខហួរ​ដើម្បី​រង់​ចាំ​ជំនុំ​ជម្រះ​ទោស។ ​ប្រសិន​ណា​បើ​តុលាការ​រក​ឃើញ​ថា​មាន​ទោស​កំហុស​តំណាង​រាស្ត្រ​ជាប់​ឆ្នោត​ទាំង​នោះ​អាច​ប្រឈម​មុខ​ជាប់​ពន្ធនាគាររយៈ​ពេល​ពី​២០​ទៅ​៣០​ឆ្នាំ។​

វីដេអូ៖ មន្ត្រីទូត​និងមន្ត្រីអ.ស.ប.​ជំរុញ​ឲ្យ​ដោះលែងតំណាងរាស្ត្រ​ប្រឆាំង​

នៅ​ខាង​ក្រៅ​អគារ​តុលាការ ​មានប្រជាពលរដ្ឋ​និង​អ្នក​តំណាង​រាស្ត្រ​ជាប់​ឆ្នោត​គណបក្ស​សង្គ្រោះជាតិ​បាន​មក​តវ៉ា​ដើម្បី​ឱ្យដោះ​លែង​អ្នក​តំណាង​រាស្ត្រ​ទាំង​នោះ។ ​ការ​តវ៉ា​នេះ​បាន​ធ្វើ​ឡើង​ក្រោម​ការ​រឹត​បន្តឹង​សន្តិសុខ​យ៉ាង​មាំទាំ។​

កង​កម្លាំង​មាន​សមត្ថកិច្ច​ប្រ​ដាប់​ដោយ​ខែល​ ដំបងឆក់​ កាំភ្លើង​ស្វ័យ​ប្រវត្តិ​គ្រប់​ដៃ​ និង​រថយន្ត​បាញ់​ទឹក​បាន​ដាក់​ពង្រាយ​នៅ​ពាស​ពេញ​បរិវេណ​អគារ​តុលាការ​ហើយ​ផ្លូវ​នៅ​ជុំវិញ​នោះ​ត្រូវ​បាន​បិទ​មិន​អនុញ្ញាត​ឱ្យមាន​មនុស្ស​ចូល​ក្នុង​តុលាការ​ទេ​ សូម្បី​តែ​អ្នក​កាសែត​ក៏​ដោយ។​

លោក​ កឹម សុខា​ ប្រធាន​ស្តីទី​គណបក្ស​សង្គ្រោះជាតិ​ក្រោយ​ពីបាន​ធ្វើ​សន្និសីទ​កាសែត​នៅ​ទី​ស្នាក់​ការ​បាន​ដឹក​នាំ​សមាជិក​សភា​ជាប់​ឆ្នោត​និង​សមាជិក​ព្រឹទ្ធសភា​ គណបក្ស​សម រង្ស៊ី ​មក​តវ៉ា​នៅ​ខាង​ក្រៅ​អគារ​តុលាការ។​

លោក​កឹម សុខា​ និយាយ​ថា៖ «ហើយ​បើ​តុលាការ​នេះ​ហ៊ាន​សម្រេច​ចោទ​ប្រកាន់​ឃុំខ្លួន​បេក្ខជន​តំណាង​រាស្ត្រ​យើង​ទាំង​៥​រូប​គឺ​ខ្ញុំ​សូម​អំពាវ​នាវ​ដល់​សហគមន៍​អន្តរជាតិ​ប្រទេស​ម្ចាស់​ជំនួយ​ទាំង​អស់​ ប្រទេស​ហត្ថលេខី​ទី​ក្រុង​បារីស​ទាំង​អស់​ សុំ​ឱ្យពិចារណា​ដើម្បី​កុំ​ទទួល​ស្គាល់​ហើយ​កុំ​ជួយ​ដល់​រដ្ឋាភិបាល​ រំលោភ​ច្បាប់​ រដ្ឋាភិបាល​ខុស​ច្បាប់​នេះ»។​

នៅទី​ស្នាក់​ការ​គណបក្ស​សង្គ្រោះជាតិ​លោក​ កឹម សុខា​ ​បាន​ប្រកាស​ជា​សាធារណៈ​ថា​ការតវ៉ា​ដំបូង​គឺ​តវ៉ា​តាម​រយៈ​នៅ​ក្នុង​ស្រុក​និង​អន្តរជាតិ​តែ​បើ​សិន ​មិនមាន​ដំណោះ​ស្រាយ​ទេ​នោះ​ជម្រើស​ចុង​ក្រោយ​នឹងមាន​មហា​បាតុកម្ម​ប្រឆាំង​ដើម្បី​ទាមទារ​ឱ្យដោះ​លែង​អ្នក​តំណាង​រាស្ត្រ​ទាំង​នោះ។​

លោក​និយាយ​ថា៖ ​«ហើយ​យើង​គិត​ថា​បើ​អស់​ជម្រើស​ចុង​ក្រោយ​ហើយ ​ជម្រើស​ចុង​ក្រោយ​របស់​យើង​ប្រហែល​ជា​អាច​បាតុកម្មហើយ​តែ​បាតុកម្ម​យ៉ាង​ណា​វាទុក​ឱ្យគណបក្ស​ជា​អ្នកសម្រេច»។​

អ្នក​ស្រីញ៉េប វន្នី​ អាយុ​៥៧​ប្រជាពលរដ្ឋ​នៅ​ផ្តុំ​ផ្សារ​អូរឬស្សី​ក្រុង​ភ្នំពេញ​បាន​រិះ​គន់​ការ​ចាប់​ខ្លួន​អ្នក​តំណាង​រាស្ត្រ​ថា​ជា​អំពើ​រំលោភ​ច្បាប់។ ​អ្នក​ស្រី​បាន​បញ្ជាក់​ថា​ប្រជាពលរដ្ឋ​មិន​សុខចិត្ត​ទេ​ចំពោះ​ការ​ចាប់​ខ្លួន​នេះ។​

អ្នក​ស្រី​និយាយ​ថា៖​ «តវ៉ា​ដើម្បី​សេរីភាព​ ដើម្បី​ប្រជាជន​យើង​បាន​សេចក្តី​សុខ​តែ​ប៉ុណ្ណឹង​ទេ។ ​ខ្ញុំ​មិន​ទាម​ទារ​អ្វី​ទេ​ក្រៅ​ពី​សុខ​ហើយ​ឱ្យប្រជាជន​យើង​សុខសាន្ត​គ្រប់​គ្នា​ទាំង​អស់​គ្នា​លើ​ប្រទេស​កម្ពុជា​យើង​ហ្នឹង»។​

លោក​ កែវ រ៉េមី​ អនុប្រធាន​អង្គភាព​ព័ត៌មាន​និង​ប្រតិកម្ម​រហ័ស​នៃ​ទី​ស្តី​ការ​គណៈ​រដ្ឋមន្ត្រី​មាន​ប្រសាសន៍​ក្នុង​អង្គសន្និសីទ​កាសែត​ថា​បើ​ទោះបី​ជា​លោក​មិន​បាន​ឆ្លើយ​ចំ​នឹង​សំណួរ​តែ​លោក​បាន​អះអាង​ថា​រដ្ឋាភិបាល​នឹង​មាន​វិធាន​ការទប់​ស្កាត់​ប្រសិន​ណា​បើ​មាន​សកម្មភាព​បាតុកម្ម៕

XS
SM
MD
LG