ភ្នំពេញ៖ រដ្ឋសភាជាតិរបស់ប្រទេសកម្ពុជា នៅថ្ងៃព្រហស្បតិ៍នេះ បានចាប់ផ្តើមប្រជុំពិភាក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៣។ ការពិភាក្សានេះបានធ្វើឡើងយ៉ាងតឹងតែងរវាងអ្នកតំណាងរាស្ត្រខាងគណបក្សកាន់អំណាចនិងអ្នកតំណាងរាស្ត្រគណបក្សប្រឆាំង។
សមាជិករដ្ឋសភាចំនួន៩៦រូបនៃសមាជិកសភាចំនួន១០១រូបដែលមានវត្តមាន បានសម្រេចដោយលើកដៃគាំទ្រលើខ្លឹមសាររួម ដើម្បីយកសេចក្តីព្រាងច្បាប់ថវិកាជាតិឆ្នាំ២០១៣មកពិភាក្សា សួរដេញដោលមុននឹងអនុម័ត។
សេចក្តីព្រាងច្បាប់នេះមានចំនួន៦ជំពូកនិង១៨មាត្រា ហើយតំណាងរាជរដ្ឋាភិបាលដែលចូលមកការពារសេចក្តីព្រាងច្បាប់ថវិកាជាតិឆ្នាំ២០១៣នេះ ដឹកនាំដោយលោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយមានការហែរហមពីគណៈប្រតិភូចំនួន៤០រូបផ្សេងទៀត។
សេចក្តីព្រាងច្បាប់ស្តីពីហិរញ្ញវត្ថុនេះបានកំណត់ពីការចំណាយសរុបរហូតដល់ជាង១២ពាន់លានរៀលគឺស្មើនឹងប្រមាណជាង៣០០០លានដុល្លារអាមេរិក។ ថវិកាចំណាយសរុបឆ្នាំ២០១៣បានកើនឡើង១២,៣២% បើធៀបនឹងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១២ស្មើនឹង១៩,១២%នៃផលិតផលសរុបក្នុងស្រុក(ផ.ស.ស.)។
សេចក្តីព្រាងច្បាប់ស្តីពីហិរញ្ញវត្ថុនេះបានកំណត់ពីការចំណាយសរុបរហូតដល់ជាង១២ពាន់លានរៀលគឺស្មើនឹងប្រមាណជាង៣០០០លានដុល្លារអាមេរិក។ ថវិកាចំណាយសរុបឆ្នាំ២០១៣បានកើនឡើង១២,៣២% បើធៀបនឹងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១២ស្មើនឹង១៩,១២%នៃផលិតផលសរុបក្នុងស្រុក(ផ.ស.ស.)។
ក្រសួងអប់រំបានស្ថិតនៅក្នុងការចំណាយអទិភាពខ្ពស់ជាងគេសម្រាប់ថវិកាឆ្នាំ២០១៣នេះគឺមានចំនួនជាង២៨០លានដុល្លារ បន្ទាប់មកគឺក្រសួងការពារជាតិស្ថិតនៅក្នុងលំដាប់ទីពីរ មានចំនួនត្រឹមតែ២៤៥លានដុល្លារ ក្រសួងសុខាភិបាលចំនួន២២៥លានដុល្លារ ក្រសួងមហាផ្ទៃនិងសន្តិសុខមុខងារសារធារណៈចំនួន១៥៥លានដុលា្លរនិងក្រសួងសង្គមកិច្ចចំនួន១០៣លានដុល្លារ។
ក្នុងចំណោមថវិកាជាតិសរុបជាង៣០០០លានដុល្លារសម្រាប់ការចំណាយឆ្នាំ២០១៣នេះ មានចំនួនជាង៩០០០លានដុល្លារជាប្រាក់កម្ចីពីបរទេស។
លោកនាយករដ្ឋមន្ត្រីហ៊ុន សែនបាននិយាយនៅក្នុងសេចក្តីថ្លែងហេតុនៃសេចក្តីព្រាងច្បាប់ស្តីពីហិរញ្ញវត្ថុនេះថា សេចក្តីព្រាងច្បាប់នេះនឹងបន្តបង្កនូវកត្តាជាបុព្វបទទាំងឡាយសម្រាប់ការឈានទៅសម្រេចឲ្យបាននូវគោលនយោបាយជាមូលដ្ឋានគ្រឹះខាងសេដ្ឋកិច្ចរបស់រដ្ឋាភិបាល។
អ្នកតំណាងរាស្ត្រមកពីគណបក្សប្រឆាំងបានធ្វើការបរិហាររិះគន់ធ្ងន់ៗចំពោះការចំណាយថវិកាជាតិ ដែលពុំមានគុណភាពដូចជាការសាងសង់ផ្លូវគមនាគមន៍ សេវាសុខភាពសារធារណៈ និងការប្រព្រឹត្តអំពើពុករលួយរបស់មន្ត្រីរដ្ឋាភិបាល។
លោកសុន ឆ័យ ប្រធានក្រុមអ្នកតំណាងរាស្ត្រគណបក្សប្រឆាំង បាននិយាយនៅក្នុងកិច្ចប្រជុំរបស់រដ្ឋសភាថា ថវិកាឆ្នាំ២០១៣មានការកើនក្នុងការចំណាយ ក៏ប៉ុន្តែលទ្ធភាពនៃការបង្កើនការចំណាយមួយភាគធំនៃទឹកប្រាក់គឺបានមកពីការខ្ចីបុលដែលកំណត់នៅក្នុងច្បាប់នៃថវិកានេះ។
លោកបានបញ្ជាក់ថា កាលណាយើងខ្ចីបុលពីបរទេសច្រើនប្រៀបធៀបនឹងផលិតផលក្នុងស្រុកសរុប វាអាចធ្វើឲ្យមានគ្រោះថ្នាក់ទៅដល់សេដ្ឋកិច្ចរបស់ប្រទេស។
«ចំនួននៃការខ្ចីបុលនេះវាអាចមានចំនួនគ្រោះថ្នាក់ដល់សេដ្ឋកិច្ចនេះបានតាមការលើកឡើងរបស់យើង។ ក្នុងការលើកឡើងនេះក៏យើងបានផ្តល់លទ្ធភាពនៃការរកចំណូលដែរ»។
លោកឧបនាយករដ្ឋមន្ត្រី គាត ឈុន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបាននិយាយថា ការរៀបចំថវិកាឆ្នាំ២០១៣គឺស្ថិតក្នុងសេដ្ឋកិច្ចកម្ពុជាទើបតែងើបចេញពីវិបត្តិសេដ្ឋកិច្ចនិងហិរញ្ញវត្ថុយ៉ាងឆាប់រហ័ស និងកំពុងបង្ហាញពីភាពមាំមួនឆ្ពោះទៅរកគោលនយោបាយកំណើនប្រចាំឆ្នាំ៧%របស់រាជរដ្ឋាភិបាល។
«កំណើនសេដ្ឋកិច្ចតាមថ្លៃថេរនឹងសម្រេចបានប្រមាណ៧%»។
សេចក្តីព្រាងច្បាប់ស្តីពីហិរញ្ញវត្ថុឆ្នាំ២០១៣នេះត្រូវបានគណៈរដ្ឋមន្ត្រីអនុម័តនៅក្នុងសម័យប្រជុំកាលពីថ្ងៃទី២៩ខែតុលាឆ្នាំ២០១២ ហើយបានបញ្ជូនមករដ្ឋសភានៅថ្ងៃទី៣០ខែតុលា។
រដ្ឋសភាទើបតែបានអនុម័តបានមួយជំពូកតែប៉ុណ្ណោះក្នុងចំណោម៦ជំពូក។សមាជិករដ្ឋសភានឹងបន្តពិភាក្សានៅថ្ងៃសុក្រស្អែកទៀត៕
