ភ្ជាប់​ទៅ​គេហទំព័រ​ទាក់ទង

និស្សិត​ដូរ្យតន្ត្រី​ច្រៀង​បទ​ចម្រៀង​រំឭក​ដល់​សម្តេច​ឪ​នរោត្តម​សីហនុ​


ព្រះ​បាទ​នរោត្តម ​សីហនុ​គឺ​ជា​អ្នក​ចូល​ចិត្ត​សិល្បៈ​ ដោយ​ព្រះ​អង្គ​បាន​ផលិត​ខ្សែ​ភាពយន្ត​និង​តន្ត្រី​ជាច្រើន។

​ភ្នំពេញ៖ ខណៈ​ដែល​ពិធី​ថ្វាយ​ព្រះ​ភ្លើង​ដល់​ព្រះបរម​សព​របស់​ព្រះបាទ​នរោត្តម​សីហនុ​ កាន់​តែ​ខិត​ជិត​ចូល​មក​ដល់ ​ ក្រុម​និស្សិត​ដូរ្យតន្ត្រី​ពីរ​ក្រុម​បាន​រំឭក​ដល់​ស្នា​ព្រះហស្ថ​របស់​ព្រះ​មហាក្សត្រ​ដោយ​ច្រៀង​បទ​ចម្រៀង​ដែល​ជា​ព្រះរាជ​និពន្ធ​របស់​ព្រះអង្គ។​

ទោះ​បី​ជា​ព្រះ​បរមសព​របស់​អតីត​ព្រះ​មហាក្សត្រ​នរោត្តម ​សីហនុ​នឹង​ត្រូវ​គេ​ធ្វើ​ពិធី​ថ្វាយ​ព្រះភ្លើង​ក្នុង​ពេល​ដ៏​ខ្លី​ខាងមុខ​នេះ​ក៏​ដោយ ​ក៏​បទ​ចម្រៀង​របស់​ព្រះអង្គ​នឹង​នៅ​ស្ថិត​ឋេរ​ត​ទៅ​មុខ​ទៀត។​

និស្សិត​ចម្រៀង​អូប៉េរ៉ា​ឈ្មោះ​ហ៊ី គីមចន្ថាវុធ​បាន​សម្តែង​តន្ត្រី​នេះ​នៅក្នុង​ទីក្រុង​ភ្នំពេញ​កាល​ពី​ពេល​ថ្មីៗនេះ​ ​ដោយ​ច្រៀង​ចម្រៀង​បី​បទ​ដែល​និពន្ធ​ដោយ​អតីត​ព្រះ​ករុណា​ នរោត្តម​សីហនុ​គឺ​បទ​អប្សរា​ បទ​ជំនោរ​វិច្ឆិកា ​និង​បទ​ស្នេហា​ពុំមាន​សង្ឃឹម។​

«មូលហេតុ​ដែល​ខ្ញុំ​សម្តែង​បទ​ចម្រៀង​របស់​សម្តេច​តា​គឺ​ព្រោះតែ​ខ្ញុំ​ចង់​រំឭក​ពី​ស្នា​ព្រះហស្ថ​របស់​ព្រះអង្គ​ដែល​លោក​បាន​បន្សល់​ទុក​ឲ្យ​កូន​ចៅ​ខ្មែរ​ជំនាន់​ក្រោយ»។​

និស្សិត​វ័យ​២៨​ឆ្នាំ ​ដែល​បច្ចុប្បន្ន​កំពុង​សិក្សា​នៅ​សាលា​ដូរ្យតន្ត្រី​ Victoria Conservatory of Music ​ក្នុង​ប្រទេស​កាណាដា និយាយ​ថា​ ខ្លួន​តែង​តែ​មាន​មោទន​ភាព​ ដោយ​បាន​សម្តែង​បទ​របស់​អតីត​ព្រះ​មហាវីរ​ក្សត្រ​នរោត្តម​ សីហនុ។​

«គ្រប់​ពេល​ នៅពេល​ដែល​ខ្ញុំ​សម្តែង ​concert ​(ការ​ប្រគុំដន្ត្រី)​នៅ​ប្រទេស​កាណាដា​ ក៏​ដូចជា​នៅ​ប្រទេស​ខ្មែរ​ដែរ​គឺ​ដើម្បី​បង្ហាញ​ដល់​ឆាក​អន្តរជាតិ​ថា ​ខ្ញុំ​មាន​ព្រះ​មហាវីរ​ក្សត្រ​ដ៏​ឆ្នើម​ដែល​ទ្រង់​ចេះ​និពន្ធ ​ចេះ​សម្តែង​ខាង​វិស័យ​សិល្បៈ​ដែរ»។​

ព្រះ​បាទ​នរោត្តម ​សីហនុ​គឺ​ជា​អ្នក​ចូល​ចិត្ត​សិល្បៈ​ ដោយ​ព្រះ​អង្គ​បាន​ផលិត​ខ្សែ​ភាពយន្ត​និង​តន្ត្រី​ជាច្រើន។

ការ​សម្តែង​របស់​ព្រះអង្គ​នេះ​ត្រូវ​បាន​គេ​ចាក់​បញ្ចាំង​ជា​ប្រចាំ​តាម​កញ្ចក់​ទូរទស្សន៍​ជាតិ​កម្ពុជា ​មុន​ពេល​ព្រះអង្គ​ចូល​ទិវង្គត​ដោយ​រោគា​ពាធ ​នៅក្នុង​ទីក្រុង​ប៉េកាំង​ កាល​ពី​ខែ​តុលា។​

នៅក្នុង​ការ​ប្រគុំ​តន្ត្រី​មួយ​ផ្សេង​ទៀត​ដែល​រៀបចំឡើង​ដោយ​ក្រុម​សិល្បករ​កម្ពុជា​និង​កូរ៉េ ​ក្រុម​និស្សិត​ដូរ្យតន្ត្រី​ទាំង​នេះ​ក៏​បាន​សម្តែង​បទ​របស់​អតីត​ព្រះ​មហា​ក្សត្រ​ ដើម្បី​ចងចាំ​ព្រះ​អង្គ ​និង​កេរ​ដំណែល​របស់​ព្រះអង្គ​ផង​ដែរ។​

លោក​ញ៉ឺង កាណុល​គឺ​ជា​និស្សិត​ចម្រៀង​ជា​ពួក​មក​ពី​សាកល​វិទ្យាល័យ​ភូមិន្ទ​វិចិត្រ​សិល្បៈ​កម្ពុជា។​

«ខ្ញុំ​មិន​អាច​បំភ្លេច​ស្នា​ព្រះហស្ថ​របស់​ព្រះអង្គ​បាន​ទេ ​ព្រោះ​ព្រះអង្គ​បាន​ទាមទារ​នូវ​ឯករាជ្យ​ពី​អាណានិគមន៍​បារាំង​ដើម្បី​ឲ្យ​ប្រទេស​កម្ពុជា​យើង​មាន​សន្តិភាពឡើង​វិញ»។

ព្រឹទ្ធ​បុរស​មហាវិទ្យាល័យ​ដូរ្យតន្ត្រី​គឺ​លោកយស ច័ន្ទ​ដារ៉ាជា​សហ​អ្នក​រៀបចំ​កម្មវិធី​ប្រគុំ​តន្រ្តី​រួម​គ្នា​កម្ពុជា-កូរ៉េ​នេះ។​

«ទោះ​បី​ជា​ព្រះ​អង្គ​បាន​ចូល​ព្រះសោយ​ទិវង្គត​ទៅ​ហើយ​ក្តី ​ក៏​យើង​ត្រូវតែ​រំឭក​ពី​ស្នា​ព្រះហស្ថ​របស់​ព្រះអង្គ​ជានិច្ច​ ដើម្បី​កុំ​ឲ្យ​វា​បាត់​បង់​ទៅ»។​

លោក​ឆែម ឌី​គឺ​ជា​ទស្សនិកជន។​

«ពេល​ដែល​ខ្ញុំ​បាន​ឮ​ចម្រៀង​របស់​ព្រះ​អង្គ​ដែល​គេ​លើក​យក​មក​បកស្រាយ​នៅ​ទី​នេះ​ វា​ធ្វើ​ខ្ញុំ​មាន​អារម្មណ៍​ហាក់​ដូចជា​ព្រះអង្គ​កំពុង​តែ​បកស្រាយ​ និង​នៅ​មាន​ព្រះ​ជន្ម​រស់​សព្វ​ថ្ងៃ​ដដែល»។​

លោក​គី យ៉ុង​រ្យូ​គឺ​ជា​សាស្ត្រាចារ្យ​ដូរ្យតន្ត្រី​ និង​ជា​អ្នក​រៀបចំ​កម្មវិធី​នេះ​ដែរ។​

«យើង​ចង់​ឲ្យ​សាធារណជន​មើលឃើញ​អំពី​ទឹក​ព្រះទ័យ​របស់​ព្រះអង្គ​ថា ​ព្រះអង្គ​គឺ​ពិត​ជា​ស្រឡាញ់​ប្រជានុរាស្ត្រ​ និង​ប្រទេស​របស់​ព្រះអង្គ​យ៉ាង​ខ្លាំង»។
ព្រះ​បរម​សព​របស់​ព្រះករុណា​ព្រះបាទ​នរោត្តម ​សីហនុ​នឹង​ត្រូវ​រំកិល​ចេញ​ពី​ព្រះ​បរម​រាជវាំង​ទៅកាន់​វាល​ព្រះមេរុ​នៅ​ថ្ងៃ​ទី​១​ខែ​កុម្ភៈ​នេះ ​ហើយ​នឹងត្រូវ​ធ្វើ​ពិធី​ថ្វាយ​ព្រះភ្លើង​នៅ​ថ្ងៃ​ទី​៤​ខែ​កុម្ភៈ៕​

ព័ត៌មានចុងក្រោយជា​រូបភាព​តាម Storify៖
XS
SM
MD
LG