ភ្ជាប់​ទៅ​គេហទំព័រ​ទាក់ទង

ពុទ្ធ​បរិស័ទ​ខ្មែរ​ធ្វើ​បុណ្យ​បង្សុកូល​ព្រះ​បរម​សព​៧​ថ្ងៃ​នៃ​សម្តេចព្រះ​មហាវីរក្សត្រ​​

  • Sisovann Pin

ជនជាតិ​ខ្មែរ​ជាង​១០០នាក់​នៅ​ទីក្រុង​វ៉ាស៊ីនតោន ​និង​រដ្ឋ​ក្បែរៗ​រដ្ឋធានី​នេះ​ បាន​ធ្វើ​ពិធី​បុណ្យ​បង្សុកូល​គម្រប់​៧​ថ្ងៃ​នៃ​ព្រះ​បរមសព​សម្តេច​ព្រះ​មហាវីរក្សត្រ​នរោត្តម​សីហនុ ហើយ​បួងសួង​ឲ្យព្រះ​វិញ្ញាណក្ខន្ធ​បាន​ទៅ​កាន់​សុខតិភព។

វ៉ាស៊ីនតោន៖ កាលពី​ថ្ងៃអាទិត្យ ដែល​ត្រូវ​ជា​ថ្ងៃច័ន្ទ​នៅ​កម្ពុជា ជនជាតិ​ខ្មែរ​ជាង​១០០នាក់​នៅ​ទីក្រុង​វ៉ាស៊ីនតោន ​និង​រដ្ឋ​ក្បែរៗ​រដ្ឋធានី​នេះ​ បាន​ធ្វើ​ពិធី​បុណ្យ​បង្សុកូល​គម្រប់​៧​ថ្ងៃ​នៃ​ព្រះ​បរមសព​សម្តេច​ព្រះ​មហាវីរក្សត្រ​នរោត្តម​សីហនុ ហើយ​បួងសួង​ឲ្យព្រះ​វិញ្ញាណក្ខន្ធ​បាន​ទៅ​កាន់​សុខតិភព។

អ្នក​ចូលរួម​ក្នុង​ពិធី​បង្សុកូល​នៅ​វត្ត​ពុទ្ធិការាម រដ្ឋ Maryland នេះ រំឭក​ពី​ស្នា​ព្រះ​ហស្ថ​ព្រះ​អង្គ។​ លោក​តាយូសឿង ងួនលី អាយុ​៨៦​ឆ្នាំ ដែល​ជា​ថៅ​កែ​កាណូត​ សម័យ​សង្គម​រាស្ត្រ​ បាន​ឲ្យ​ដឹង​ថា លោក​តា​ធ្លាប់​បាន​បង្ហែ​សម្តេច​ឪ​ក្នុង​ចលនា​យុវ័ន​ទាមទារ​ឯករាជ្យ​ពីបារាំង។

លោកតាមានប្រសាសន៍ថា​៖​
«ព្រះអង្គ​មាន​ឥទ្ធិពលខ្លាំង កាល​ដែល​ធ្វើ​យុវ័ន យុវជន។ ជីវពល​យើង​តស៊ូ​ហ្នឹង យើង​តស៊ូ​កាំភ្លើង​អត់គ្រាប់​មុនដំបូង​នោះ។​ យើង​តស៊ូ​ជាមួយបារាំង​ទាមទារ​យក​ប្រទេស​ខ្មែរ​ឯករាជ្យ។ ដល់បាន​ឯក​រាជ្យ ហើយ​ក្រោយ​មកសៀម​វា​កាន់កាប់​ព្រះវិហារ​និង​បីខេត្ត អា​ហ្នឹង​ព្រះអង្គ​លោក​ទាមទារ​បាន​ដែរ ​ស្នាដៃ​ព្រះអង្គ»។​

លោកទុន សុវណ្ណ ប្រធាន​ក្រុម​អភិបាល​នៃ​ពុទ្ធិក​សមាគម​ខ្មែរ​ឥង្ក ​រំឭក​ថា ក្រៅពី​ទាម​ទារ​ឯករាជ្យ និង​ប្រាសាទ​ព្រះវិហារ ​ព្រះ​មហា​វីរ​ក្សត្រ​បាន​ដឹកនាំ​សង្គម​រាស្ត្រ​និយម​ដ៏រីក​ចម្រើន និង​បង្រួម​បង្រួម​ជាតិ​ក្នុង​កិច្ច​ព្រមព្រៀង​សន្តិភាព​ក្រុងប៉ារីស។​

«ហើយ​ការចរចា​សន្តិភាព​ជាមួយ​គ្នា​ហ្នឹង​គឺ​ព្រះ​អង្គ​បាន​ជួយ​ធ្វើឲ្យ​មាន​ការ​យល់ព្រម​កិច្ច​ព្រមព្រៀង​សន្តិភាព​ក្រុងប៉ារីស។ ព្រះ​អង្គ​ក៏មាន​ស្នាដៃ​នៅ​ក្នុង​ហ្នឹង​ដែរ»។​

ស្នាព្រះ​ហស្ថ​ព្រះ​មហាវីរក្សត្រ​មាន​ច្រើន​ដែល​អ្នក​ចូលរួម​ផ្សេង​ទៀត​រៀបរាប់​មិន​អស់​ឡើយ។​
អ្នកស្រី​ឯម វុទ្ធី ដែល​ធ្លាប់​ជាយុវ័ន​សម័យ​សង្គម​រាស្ត្រ​និយម នៅ​សាលា​យុគន្ធ បាន​រំឭក​ពីស្នា​ព្រះហស្ថ​ ខាង​កីឡា​និង​សិល្បៈ​របស់​សម្តេច​ឪ​នរោត្តម​សីហនុ។​

«ជាពិសេស​គឺស្នាដៃ​សិល្បៈ​របស់​សម្តេចឪ។​ លោក​តែង​បទ​ចម្រៀង​គួរឲ្យ​ចង​ចាំ ថត​កុន​ណា៎ អូន!»។​

ទោះ​ជាយ៉ាងណាក្តី ក្រៅពី​ស្នា​ព្រះហស្ថសម្តេច​ព្រះ​មហាវីរក្សត្រ​ក៏​មាន​ព្រះ​សកម្ម​ភាព​ដែល​ផ្តល់​ផល​វិបាក​ដល់​ប្រទេស​ជាតិ​ខ្មែរដែរ។

ក៏ប៉ុន្តែលោកតា​ ងួនលី ពន្យល់ថា សម្តេច​ឪចូល​ជាមួយ​ខ្មែរក្រហម​គឺ​ដោយសារ​លោក​លន់ នល់​ធ្វើរដ្ឋ​ប្រហារ។ ព្រះអង្គ​មិនមាន​គំនិត​ធ្វើបាប​រាស្ត្រទេ​គឺ​ព្រះអង្គ​ចាញ់បោក​ខ្មែរ​ក្រហម​កុម្មុយនិស្ត។​

«ព្រះអង្គ​មិន​បាន​ចូលស្រុក​វិញ​ទេ។ លោក​ត្រឡប់​ទៅ​ស្រុកចិន​ ទៅបង្កើត​បក្ស​ប្រឆាំង​ដណ្តើម​ (អំណាច)​ពីលន់ នល់​វិញ ប៉ុន្តែ​ដោយ​ការ​ចាញ់បោក​គេ។ យើង​ទាំងអស់​គ្នា​រស់​នៅ តែង​មាន​(កំហុស)​បន្តិចបន្តួច​ហើយ​រឿងហ្នឹង។ ​វា​ធម្មតា​ទេ​ណា៎»។​

លោកទុន សុវណ្ណ​មាន​ប្រសាសន៍​ថា៖​
«យើង​ដឹង​ហើយ​ខ្មែរក្រហម​មិនមែន​យក​ព្រះអង្គ​មក​ធ្វើ​ប្រមុខ​រដ្ឋ​ទេ​ ពេល​ព្រះ​អង្គ​យាង​ចូល​ទៅក្នុង​ប្រទេស​ជាតិវិញគឺព្រះ​អង្គ​បាន​ទទួល​រងគ្រោះ​ដូចខ្មែរ​យើង​គ្រប់គ្នា​អញ្ចឹង។​ ព្រះ​អង្គសោយ​ទិវង្គតហើយ យើង​ធ្វើម៉េច យើង​ធ្វើពិធីយ៉ាង​ម៉េច ដើម្បី​ឲ្យ​វិញ្ញាណ​ក្ខន្ធ​ព្រះអង្គ​បាន​សុខ​ទៅ​ចុះ​ណា៎»។​

ពេលដឹងព័ត៌មានអំពីការសោយទិវង្គរបស់មហាវីរក្ស ខ្មែរភាគច្រើនទាំងក្នុងនិងក្រៅប្រទេសបានតក់ស្លុត​និង​សោក​ស្តាយជាអនេក។
លោក​ទុន សុវណ្ណ​បាន​ឲ្យ​ដឹង​ថា ពុទ្ធ​បរិស័ទ​ខ្មែរ​អាមេរិកាំង​នៅទីនេះ​ក៏នឹង​ធ្វើបុណ្យ​គម្រប់​១០០​ថ្ងៃ​នៃ​ព្រះ​បរមសព​របស់​ព្រះ​មហារីរក្សត្រ​ផង​ដែរ៕
XS
SM
MD
LG