វ៉ាស៊ីនតោន៖ ផ្សែងធូបហុយខ្មួលខ្មាញ់ឡើងលើក្នុងអាកាសធាតុត្រជាក់បង្គួរ និងសំឡេងសូត្រធម៌បង្សុកូលឧទ្ទិសមគ្គផលដល់អតីតព្រះមហាវីរៈក្សត្រនរោត្តមសីហនុបានកើតមានឡើងនៅថ្ងៃច័ន្ទដែលជាថ្ងៃចុងក្រោយនៃពិធី បុណ្យភ្ជុំបិណ្ឌ នៅវត្តពុទ្ធិការ៉ាមក្នុងរដ្ឋម៉ារីឡែន សហរដ្ឋអាមេរិក។
ព្រះតេជគុណអ៊ុក វ៉ាន់ហន ព្រះចៅអធិការវត្តពុទ្ធិការ៉ាមបានមានសង្ឃដីការបញ្ជាក់ប្រាប់វីអូអេថា៖
«ប្រជាពលរដ្ឋខ្មែរនៅទីនេះឃើញមានការចាប់អារម្មណ៍មានការសោកស្តាយហើយបានរួមរំលែកទុក្ខហើយបានចូលរួម ភាគច្រើនបានចូលរួមធ្វើពិធីបង្សុកូលជូនកុសលថ្វាយកុសលទៅដល់ព្រះវិញ្ញាណក្ខន្ធរបស់ព្រះសម្តេចនរោត្តមសីហនុ»។
ព្រះមហាវីរក្សត្រនរោត្តម សីហនុបានសោយទិវង្គតកាលពីថ្ងៃច័ន្ទក្នុងព្រះជន្មាយុ៩០ព្រះវស្សាដោយជំងឺគាំងបេះដូងក្នុងមន្ទីរពេទ្យមួយក្នុងទីក្រុងប៉េកាំង។
លោកអាចារ្យកុយ មឿន ប្រចាំនៅវត្តពុទ្ធិការ៉ាមបានបញ្ជាក់ថា៖
«យើងខ្ញុំទាំងអស់គ្នាក៏មានការសោកស្តាយចំពោះវីរភាពហើយម្យ៉ាងទៀតក៏បាននិមន្តព្រះសង្ឃជាទីបញ្ចប់បង្សុកូលដើម្បី ឧទ្ទិសកុសលថ្វាយវិញ្ញាណក្ខន្ធនៃព្រះអង្គសូមវិញ្ញាណក្ខន្ធព្រះនរោត្តមសីហនុទទួលអនុមោទនានូវបុណ្យដែលយើងខ្ញុំបានធ្វើនៅក្នុងទីវត្តពុទ្ធិការ៉ាមនេះដោយសោមនស្សរីករាយ»។
សម្តេចព្រះនរោត្តមសីហនុ បានឡើងសោយរាជ្សនៅក្នុងឆ្នាំ១៩៤១ពេលដែលព្រះអង្គមានព្រះជន្ម១៩ព្រះវស្សា។ ព្រះអង្គត្រូវបានពលរដ្ឋជាច្រើនចងចាំពីយុគសម័យមាសដែលកម្ពុជាជួបប្រទះក្រោយពីទទួលបានឯករាជ្យក្នុងឆ្នាំ១៩៥៣ពីអាណានិគមបារាំង។
ឧបាសិកាខៀវ លក្ខិណាបាន នៅចងចាំពីសម័យកាលដែលអតីតព្រះមហាក្សត្របានកាន់អំណាចថា៖
«ខ្ញុំចងចាំថាជំនាន់នោះស្រុកមានសន្តិភាព អត់មានចម្បាំងរាំងជល់ហើយអត់មានការលួចឆក់ឬក៏រំលោភអ្វី ដោយព្រៃផ្សៃអ្វី ទេ»។
ស្រដៀងគ្នានេះដែរលោកស្រី អ៊ួន អ៊ន បានរំលឹកដល់អនុស្សាវរីយ៍កាលពីរស់នៅប្រទេសកម្ពុជាក្នុងទសវត្សរ៍១៩៥០និង៦០។
«ខ្ញុំនឹកឃើញដល់គាត់ដែលប្តីមានប្រាក់ខែស៊ីទាំងដៃៗដល់អីចឹងទៅនឹកឃើញអញ្ចឹងដែរហើយក៏បានសប្បាយដោយសារគាត់ដែរពេលឯករាជ្យ»។
មិនតែចំពោះប្រជាពលរដ្ឋចាស់ៗដែលធ្លាប់រស់ឆ្លងកាត់សម័យសង្គមរាស្រ្តនិយមទេ
លោកស្រី ស្រី ដាលីស ដែលមានវ័យ២៧ឆ្នាំជាប្រជាពលរដ្ឋនៅរដ្ឋម៉ារីឡែន ក៏បានបញ្ជាក់ពីអារម្មណ៍អាឡោះអាល័យដែរថា៖
«ខ្ញុំមានអារម្មណ៍សោកស្តាយព្រោះ ជាស្តេចម្នាក់ដែលជួយប្រជាជនឱ្យរស់ឡើងវិញ។ ព្រះអង្គគឺជាព្រះអង្គម្នាក់ដែលជួយប្រជាជនឱ្យរីកចម្រើនឡើងហើយជាព្រះអង្គម្នាក់ដែលជួយឱ្យប្រជាជនខំប្រឹង ជួយខ្មែរឱ្យរស់ឡើងវិញហើយខ្ពង់ខ្ពស់ឡើងហើយជឿជាក់»។
យ៉ាងណាក៏ដោយការសម្រេចព្រះទ័យរបស់ព្រះអង្គក្នុងការចូលរួមជាមួយចលនាខ្មែរក្រហមដែលជារបបមួយត្រូវបានស្តីបន្ទោសថាបានកាប់សម្លាប់ប្រជាពលរដ្ឋខ្មែរជាង១លាន៧សែននាក់ត្រូវបានពលរដ្ឋខ្មែរអាមេរិកាំងដូចជាលោក គុជ ចាន់លីមិនអាចបំភ្លេចបានឡើយ។ លោកចាន់លីបានសម្តែងការសោកស្តាយថាព្រះមហាក្សត្របានសោយទិវង្គតទៅដោយមិនបានបកស្រាយឱ្យបានច្បាស់ពីការចូលពាក់ព័ន្ធរបស់អតីតព្រះមហាក្សត្រត្រឹមកម្រិតណាជាមួយនឹងចលនាខ្មែរក្រហមបើទោះបីជាព្រះអង្គធ្លាប់បកស្រាយជាច្រើនលើកថាព្រះអង្គបានលាលប់ពីក្រុមខ្មែរក្រហមនៅដើមឆ្នាំ១៩៧៦មុនពេលដែលរបបនេះអនុវត្តនយោបាយកាប់សម្លាប់មនុស្សក៏ដោយ។
ព្រះសពរបស់ព្រះមហាវីរក្សត្រនរោត្តមសីហនុនឹងដង្ហែចូលប្រទេសកម្ពុជាវិញនៅថ្ងៃពុធដោយមានប្រជាពលរដ្ឋយ៉ាងហោចណាស់១០ម៉ឺននាក់ឈរដង្ហែតាមផ្លូវពីព្រលានយន្តហោះរហូតដល់ព្រះបរមរាជវាំង។ នេះបើតាមការបញ្ជាក់របស់មន្ត្រីព្រះរាជវាំងនិងរដ្ឋាភិបាលកម្ពុជា៕
ព្រះសពរបស់ព្រះមហាវីរក្សត្រនរោត្តមសីហនុនឹងដង្ហែចូលប្រទេសកម្ពុជាវិញនៅថ្ងៃពុធដោយមានប្រជាពលរដ្ឋយ៉ាងហោចណាស់១០ម៉ឺននាក់ឈរដង្ហែតាមផ្លូវពីព្រលានយន្តហោះរហូតដល់ព្រះបរមរាជវាំង។ នេះបើតាមការបញ្ជាក់របស់មន្ត្រីព្រះរាជវាំងនិងរដ្ឋាភិបាលកម្ពុជា៕
