ឡងប៊ិច៖ គណៈកម្មការប្រឡងចម្រៀងនៅទីក្រុងឡុងប៊ិចកំពុងធ្វើការប្រកាសស្វែងរកអ្នកមានទេពកោសល្យខាងផ្នែកចម្រៀងដើម្បីចូលរួមការប្រកួតប្រជែងដ៏ធំមួយនៅកម្ពុជាក្នុងមហោស្រពចម្រៀងខ្មែរសាកលឡើងនៅថ្ងៃទី៥ ខែធ្នូខាងមុខនេះ។
នេះជាឆ្នាំទី ២ សម្រាប់បេក្ខជនខ្មែរអាមេរិកាំងក្នុងការទៅចូលរួមការប្រកួតដ៏ធំនេះហើយវាជាកិច្ចសហការរវាងក្រសួងវប្បធម៌ និងវិចិត្រសិល្បៈកម្ពុជាជាមួយមជ្ឈមណ្ឌលសិល្បៈវប្បធម៌នៃទីក្រុងឡុងប៊ិច។ នៅសហរដ្ឋអាមេរិកក៏មានការប្រឡងជ្រើសរើសតំណាងពី ទីក្រុង ឡូវែល (Lowell) រដ្ឋ ម៉ាស្សាជូស៊ែត្តស៍ (Massachusetts)ផងដែរ។
លោកស្រី លឿង ណារី ដែលជាប្រធានគណៈកម្មការរៀបចំការប្រឡងនៃទីក្រុងឡុងប៊ិចនិយាយពីលក្ខខណ្ឌនៃការប្រឡង៖
«ក្នុងឆ្នាំនេះ វិញ្ញាសារប្រឡងនៅភ្នំពេញមានស្មូត ការតែងកំណាព្យ តែខាងឡុងប៊ិចយើងនេះ យើងរើសយកតែវិញ្ញាសារចម្រៀងបុរាណ យីកេ មហោរី និងចម្រៀងសម័យលោកស៊ិន ស៊ីសាមុត រស់ សេរីសុធា ប៉ែនរ៉នដែលលោកបានបន្សល់ទុកនូវជាមរតកដល់កូនខ្មែរយើង»។
ការប្រឡងនេះនឹងជ្រើសរើសយកបេក្ខជនចំនួនបួនរូប គឺប្រុសពីរ ស្រីពីរ ដែលមានទេពកោសល្យខាងចម្រៀងសម័យ និងបុរាណ។
លោក សុង ឆាល ជាអនុប្រធាន គណៈកម្មការការប្រឡង និយាយថា៖
«បើតាមគោលបំណងរបស់ក្រសួងគឺឱ្យយើងផ្តោតទៅលើបទបុរាណជាងសម័យ។ តែយោងទៅលើបងប្អូនយើងមកនៅក្រៅប្រទេសយូរមកហើយ ដូច្នេះយើងនឹងរៀបចំទៅតាមលទ្ធភាព។ ដូច្នេះយើងនឹងផ្តោតលើចម្រៀងសម័យជាងបុរាណ»។
បេក្ខជនដែលអាចចុះឈ្មោះប្រឡង ត្រូវតែជាជនជាតិខ្មែរ ឬមានឪពុកម្តាយជាជនជាតិខ្មែរមានអាយុ១៨ឆ្នាំឡើងទៅ ហើយអ្នកដែលនឹងត្រូវបានជ្រើសរើសនឹងទទួលបានសំបុត្រយន្តហោះដើម្បីទៅចូលរួមការប្រឡងនៅរាជធានីភ្នំពេញរួមនឹងថ្លៃស្នាក់នៅផងដែរ។ លោក ឆាល យល់ថា នេះជាឱកាសល្អសម្រាប់បងប្អូនខ្មែរនៅក្រៅប្រទេសចូលរួមជាមិត្តភាពក្នុងការប្រឡងចម្រៀងដ៏មហាសាលនេះនៅប្រទេសកម្ពុជា។ លោកសង្ឃឹមថា មានបងប្អូនខ្មែរនៅសហរដ្ឋអាមេរិកនេះចូលរួមច្រើន។ លោកមានប្រសាសន៍បន្ថែមថា៖
«គោលបំណងទី១គឺចង់ឱ្យបងប្អូនយើងមានចិត្តស្រឡាញ់គ្នាមានគំនិតរួបរួមគ្នាតាមរយៈសិល្បៈក្នុងនេះគឺការប្រឡងចម្រៀង។ គ្រប់មជ្ឈដ្ឋានទាំងអស់ គាត់អាចមកដាក់ពាក្យប្រឡងហើយសង្ឃឹមថា ទៅថ្ងៃមុខបើមិនអាចមានលទ្ធភាពលើកនេះគាត់នឹងចូលរួមការប្រឡងនេះ»។
បេក្ខជនដែលចង់ចុះឈ្មោះអាចទៅយកពាក្យនៅមជ្ឈមណ្ឌលសិល្បៈវប្បធម៌នៃទីក្រុងឡុងប៊ិចឬអាចទាញយកតាមប្រព័ន្ធអ៊ីនធឺណិត ឬគេហទំព័រដែលមានអាសយដ្ឋានAngkoridol.com ហើយផ្ញើពាក្យទៅកាន់ការិយាល័យមជ្ឈមណ្ឌលសិល្បៈវប្បធម៌ផ្ទះលេខ2338 ផ្លូវAnaheim, បន្ទប់លេខ105, ទីក្រុងឡងប៊ិច(Long Beach), រដ្ឋកាលីហ្វញ៉ា។ ការទទួលពាក្យប្រឡងចម្រៀងនេះនឹងផុតកំណត់នៅថ្ងៃទី ១៥ខែកញ្ញានេះហើយការប្រកួតច្រៀងនៅទីក្រុងឡុងប៊ិចនឹងធ្វើឡើងនៅថ្ងៃទី១២ ខែ តុលា។ គួរបញ្ជាក់ផងដែរថា កាលពីឆ្នាំមុនគណៈកម្មការនៅទីក្រុងឡងប៊ិច និងក្រុង ឡូវែល បានជ្រើសរើសយកបេក្ខជនពីររូប និងបេក្ខនារីពីររូបដើម្បីទៅចូលរួមការប្រឡងនៅកម្ពុជា។
