មន្ត្រីជាន់ខ្ពស់មួយរូបនៅក្រសួងធនធានទឹក និងឧត្តុនិយមបានឱ្យដឹងថា អំឡុងពេលមានការប្រារព្ធពិធីបុណ្យចូលឆ្នាំខ្មែរនាពេលខាងមុខនេះ អាកាសធាតុនឹងមានសភាពក្តៅខ្លាំង ដែលកម្តៅនឹងឡើងដល់ជិត ៤០ អង្សាសេនៅក្នុងតំបន់ខ្លះ ហើយតំបន់ខ្លះទៀតនឹងអាចមានភ្លៀងធ្លាក់ និងខ្យល់កន្ត្រាក់។
អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានលើកឡើងថា នៅក្នុងខេត្តមួយចំនួន ដូចជាខេត្តពោធិ៍សាត់ បាត់ដំបង បន្ទាយមានជ័យ និងខេត្តសៀមរាប សីតុណ្ហភាពអាចហក់ឡើងដល់ ៣៩ អង្សាសេ ដែលជាអាកាសធាតុក្តៅខ្លាំង។
ប៉ុន្តែលោកថា ស្ថានភាពនេះមិនមែនមានពេញមួយថ្ងៃទេ គឺក្នុងមួយខណៈខ្លីណាមួយតែប៉ុណ្ណោះ ជាពិសេសចាប់ពីម៉ោង ១២ ថ្ងៃត្រង់ ដល់ម៉ោង ៣ រសៀល ដែលទាមទារឱ្យប្រជាពលរដ្ឋបរិភោគទឹកឱ្យបានច្រើន និងគួរតែមានទឹកជាប់ខ្លួន ដើម្បីរក្សាលំនឹងជាតិទឹកក្នុងរាងកាយ។
លោកបន្ថែមថា៖ «យើងពិនិត្យឃើញថា នៅថ្ងៃទី ១៤ ត្រូវនឹងថ្ងៃទី ១ នៃថ្ងៃបុណ្យចូលឆ្នាំ គឺតំបន់មួយចំនួនជាពិសេសទំនាបកណ្តាល ភាគពាយ័ព្យ ដូចជាពោធិ៍សាត់ បាត់ដំបង បន្ទាយមានជ័យ សៀមរាប ជាដើមនោះ គឺអាចឈានដល់រង្វង់ ៣៩ អង្សាសេ ក្រៅពីនោះអាចទាបជាងហ្នឹង។ ហើយនៅថ្ងៃទី ១៥ ត្រូវថ្ងៃទី ២ នៃពិធីបុណ្យចូលឆ្នាំប្រពៃណីជាតិ យើងពិនិត្យឃើញថា នឹងមានភ្លៀងធ្លាក់រាយប៉ាយច្រើន ហើយដោយសារការធ្លាក់ភ្លៀងនេះ គឺនឹងធ្វើឱ្យសីតុណ្ហភាពចុះមកវិញ។ អ៊ីចឹងសម្រាប់ថ្ងៃទី ១៦ ដែលត្រូវនឹងថ្ងៃទី ៣ នៃពិធីបុណ្យចូលឆ្នាំ គឺស្ថានភាពសីតុណ្ហភាពនឹងថយចុះមកវិញបន្តិច»។
បើតាមលោក ចាន់ យុត្ថា អាកាសធាតុក្តៅនេះ មិនមែនកើតឡើងតែក្នុងប្រទេសកម្ពុជានោះទេ គឺនៅចុងសប្តាហ៍កន្លងទៅ នៅឯទីក្រុងបាងកកនិងទីក្រុងប៉ាត់តាយ៉ា ប្រទេសថៃ សីតុណ្ហភាពបានឡើងដល់ក្បែរ ៥០ អង្សាសេ។
លោកបន្តថា ប្រជាពលរដ្ឋគួររក្សាការប្រុងប្រយ័ត្នក្នុងមួយរយៈពេលនេះ ព្រោះអាកាសធាតុមិនត្រឹមតែក្តៅខ្លាំងទេ តែថែមទាំងអាចមានភ្លៀងកក់ខែ ដែលអាចបង្កជាបាតុភូតខ្យល់កន្ត្រាក់ និងបាតុភូតផ្គររន្ទះ។ ស្ថានភាពនេះតម្រូវឱ្យពួកគេត្រូវគិតគូររកទីមានសុវត្ថិភាពទុកជាមុនដើម្បីជ្រក និងការពារខ្លួនពីបាតុភូតធម្មជាតិដែលអាចបង្កគ្រោះថ្នាក់។
ប្រធានសមាគមគ្រូពេទ្យគុណធម៌កម្ពុជាលោក អ៊ូច វុទ្ធី ប្រាប់វីអូអេនៅថ្ងៃព្រហស្បតិ៍នេះថា នៅពេលអាកាសធាតុក្តៅបែបនេះ មិនថាមនុស្សចាស់ ឬកូនក្មេងនោះទេ គឺត្រូវមានទឹកតាមខ្លួនឱ្យបានជាប់លាប់ ដើម្បីកុំឱ្យខ្សោះជាតិទឹកក្នុងរាយកាយ និងត្រូវពាក់មួកដើម្បីការពារកម្តៅ។
លោកថ្លែងថា៖ «វាមិនថា តែមនុស្សចាស់ ឬក្មេងទេ តែយើងអត់មានទឹក ហើយដើរអត់មានមួកគ្រប់មុខគ្រប់អី វាអាចរបកស្បែក វាអាចជាំមុខ អ៊ីចឹងយើងឱ្យមានមួកឆាងម៉ាងពាក់ឱ្យជិតមុខ ហើយមានទឹកតាមខ្លួន»។
លោកបន្ថែមថា ប្រសិនបើអាកាសធាតុក្តៅខ្លាំងនោះ មនុស្សអាចដួលសន្លប់បាន ជាពិសេសគឺនៅកន្លែងដែលមានការជួបជុំគ្នាច្រើន ដោយហេតុបណ្តាលមកពីខ្វះជាតិទឹក ខ្វះជាតិស្ករ ខ្វះអុកស៊ីហ្សែនសម្រាប់ចិញ្ចឹមខួរក្បាល។
យ៉ាងណាក្តី អ្នកជំនាញសុខាភិបាលរូបនេះថា អ្នកលែងកីឡាច្រើនអាចទប់ទល់នឹងអាកាសធាតុក្តៅខ្លាំងបាន ដោយសារពួកគេមានភាពស៊ាំទៅនឹងស្ថានភាពក្តៅ។
នៅក្នុងសេចក្តីជូនដំណឹងមួយចេញផ្សាយកាលពីថ្ងៃទី ១១ ខែមេសា ក្រសួងធនធានទឹក និងឧតុនិយមបានឱ្យដឹងថា ចាប់ពីថ្ងៃទី ១២ ដល់ ១៤ ខែមេសា តំបន់ទំនាបកណ្តាលមានសីតុណ្ហភាពអតិបរមាពី ៣៥ ដល់ ៣៩ អង្សាសេ ចំណែកឯតំបន់ខ្ពង់រាប មានសីតុណ្ហភាពអតិបរមាពី ៣៦ ដល់ ៣៨ អង្សាសេ និងតំបន់មាត់សមុទ្រមានសីតុណ្ហភាព ៣៤ ដល់ ៣៦ អង្សាសេ និងអាចមានភ្លៀងលាយឡំដោយផ្គរ រន្ទះ និងខ្យល់កន្ត្រាក់នៅក្នុងប្រទេស។
ដោយឡែកនៅដើមសប្តាហ៍នេះ ក្រសួងសុខាភិបាលក៏បានអំពាវនាវឱ្យប្រជាពលរដ្ឋចូលរួមថែរក្សាសុខភាពផ្ទាល់ខ្លួនផងដែរ ដោយត្រូវប្រុងប្រយ័ត្នដើម្បីកាត់បន្ថយហានិភ័យសុខភាព ដោយសារការទទួលរងនូវកម្តៅក្តៅ ដែលអាចបណ្តាលឱ្យបែកញើសខ្លាំងពេកខុសពីធម្មតា ការហត់នឿយ ឈឺរមួលសាច់ដុំ អស់កម្លាំងខ្លាំង ចង្អោរ ឬក្អួត វិលមុខ ឬឈឺក្បាល ដួលសន្លប់ ជីពចរដើរលឿនហើយខ្សោយ និងជំងឺដាច់សរសៃឈាមខួរក្បាលជាដើម។
ក្រសួងសុខាភិបាលបញ្ជាក់ថា «កម្តៅក្តៅខ្លាំងពេក» ក៏នឹងបណ្តាលឱ្យមានជំងឺឈឺថ្កាត់ និងស្លាប់ផងដែរ។ ក្រសួងបានឱ្យដឹងថា ឯកសាររបស់អង្គការសុខភាពពិភពលោក ចេញផ្សាយនៅថ្ងៃទី ៧ ខែវិច្ឆិកាឆ្នាំ ២០២២ បានបង្ហាញថា យ៉ាងហោចណាស់ក៏មានមនុស្ស ១៥.០០០ នាក់បានស្លាប់ ដោយសារអាកាសធាតុក្តៅពេកនៅអឺរ៉ុបនៅក្នុងឆ្នាំ ២០២២ កន្លងទៅនេះ៕
