ភ្ជាប់​ទៅ​គេហទំព័រ​ទាក់ទង

តុលាការ​កំពូល​បើក​សវនាការ​ករណី​សុខភាព​អៀង ធីរិទ្ធ

  • គង់ សុឋានរិទ្ធ

​អៀង ធីរិទ្ធ
ភ្នំពេញ៖ អៀង ធីរិទ្ធ ជន​ជាប់​ចោទ​ម្នាក់​ក្នុង​សំណុំ​រឿង​០០២​ដែល​ទើប​នឹង​ត្រូវ​បាន​ដោះលែង​បាន​និយាយ​ដោយ​ស្មារតី​មិនជា​ក់លាក់​ក្នុង​សវនាការ​របស់​អង្គជំនុំជម្រះ​តុលាការ​កំពូល​នៅ​ថ្ងៃ​អង្គារ​នេះ។
អាយុ​៨០​ឆ្នាំ និង​ជា​អតីត​រដ្ឋមន្ដ្រីក្រសួង​សង្គមកិច្ច​នៃ​របប​កម្ពុ​ជា​ប្រជាធិបតេយ្យ អៀង ធីរិទ្ធ ត្រូវ​បាន​នាំ​ខ្លួន​ចូលក្នុង​បន្ទប់​ជម្រះក្តី​ជា​លើក​ដំ​បូង​ដើម្បី​ដោះស្រាយ​បណ្តឹង​របស់​សហ​ព្រះរាជ​អាជ្ញា​ប្រឆាំង​នឹង​ការ​ដោះលែង​រូបគាត់​កាលពី​ថ្ងៃទី​១៣ ខែ​កញ្ញា​ដោយ​អង្គ​ជំនុំ​ជម្រះ​សាលា​ដំបូង។
ការ​ដោះលែង​ដែល​ភ្ជាប់​ជាមួយ​នឹង​លក្ខខណ្ឌ​មួយ​ចំនួន​ជា​បណ្តោះអាសន្ន​ដោយ​សំអាង​ថា​ជន​ជាប់​ចោទ​បាន​បាត់បង់​ការ​ចងចាំ​និង​មាន​ជំងឺ​វង្វេង​ធ្ងន់ធ្ងរ​ដែល​មិនអាច​ចូលរួម​ការកាត់ទោស​លើ​រូបគាត់​បាន។
ឆើ្លយ​ទៅ​នឹង​សំណួរ​របស់​ក្រុម​ចៅក្រម​នៃ​អង្គជំនុំ​ជម្រះ​តុលាការ​កំពូល​អៀង ធីរិទ្ធ បាន​ឆ្លើយ​ត្រូវ​ខ្លះ​និង​មិនត្រូវ​ខ្លះ។
សំណួរ៖ «តើ​លោកស្រី​សុខ​សប្បាយ​ជា​ទេ​បច្ចុប្បន្ន​នេះ?» ឆ្លើយ៖ «ខ្ញុំ​អត់​អី​ទេ ខ្ញុំ​សុខ​សប្បាយ​ជា​ទេ​ចា៎»។ សំណួរ៖ ចាប់​តាំង​ពី​លោកស្រី​ត្រឡប់​ទៅ​ផ្ទះ​វិញ​តើ​លោកស្រី​មាន​សុខភាព​ល្អ​ជាង​មុន​ឬ​យ៉ាង​ណា?» ឆើ្លយ៖ «ដូចជា​ល្អ​ជាង​មុន ព្រោះ​អ្នក​ដែល​ទទួល​ខ្ញុំ​នោះ​ជា​ម្ចាស់ផ្ទះ​ផង ជា​ម្ចាស់​ទឹកដី​ផង ឲ្យ​ខ្ញុំ​នៅ​ឲ្យ​បាន​ស្រួល ឲ្យ​ឆាប់​ជា»។
នៅក្នុង​បណ្តឹង​ទាស់​ទៅកាន់​អង្គជំនុំជម្រះ​តុលាការ​កំពូល​ការិយាល័យ​សហ​ព្រះរាជ​អ​ជ្ញា​បានស្នើ​លក្ខខណ្ឌ​ចំនួន​ប្រាំ​មួយ​គឺ​ជន​ជាប់​ចោទ​អៀង ធីរិទ្ធ ត្រូវ​បង្ហាញ​ខ្លួន​ចំពោះ​មុខ​អាជ្ញាធរ​ក្នុង​មួយ​សប្តាហ៍​ម្តង លិខិតឆ្លងដែន និង​អត្តសញ្ញាណបន​ត្រូវ​ដកហូត ហាម​ប្រាស្រ័យ​ទាក់ទង​ជាមួយ​ជន​ជាប់​ចោទ​ដទៃ​ទៀត ជាមួយ​សាក្សី ឬ​នាក់​ជំនាញ​លើកលែង​តែ​ទំនាក់​ទំនង​ជាមួយ​ប្តី​របស់គាត់​គឺ​ជន​ជាប់​ចោទ​អៀង សារី។ មួយ​វិញ​ទៀត​អៀង ធីរិទ្ធ ត្រូវ​ទទួល​ការព្យាបាល​តាម​ការ​ការ​កំណត់​របស់​អង្គ​ជំនុំ​ជម្រះ។
ព្រះរាជអាជ្ញា​រង​កញ្ញា សុង ឆវ័ន បានស្នើ​ឲ្យ​អង្គជំនុំ​ជម្រះ​តុលាការ​កំពូល​ទទួលយក​លក្ខខ័ណ្ឌ​ទាំង​នេះ។
«យើង​សុំ​ស្នើ​ទៅ​អង្គជំនុំ​ជម្រះ​តុលាការ​កំពូល​ធ្វើការ​កែប្រែ​សេចក្ដីសម្រេច​របស់​អង្គជំនុំជម្រះ​សាលា​ដំបូង​ដោយ​ស្នើ​ឲ្យ​មាន​ការ​ដាក់​លក្ខ​ខ័ណ្ឌ​នានា​ដែល​ស្នើ​ដោយ​សហ​ព្រះរាជ​អាជ្ញា​កាលពី​ថ្ងៃ​ទី​៣១ ខែ​សីហា ឆ្នាំ​២០១២»។
ក៏​ប៉ុន្តែ​សហ​មេធាវី​ការពារ​ជនជាប់ចោទ​លោកស្រី​ដាយ​អាណា អាលីស និង​លោក​ផាត់ ពៅស៊ា​ង បាន​ស្នើ​ឲ្យ​តុលាការ​ទាត់​ចោល​លក្ខខណ្ឌ​ទាំងនោះ។
លោក​ផាត់ ពៅ​ស៊ា​ង បាន​ហៅ​លក្ខខណ្ឌ​ទាំង​នោះ​ថា ជា​ការ​កៀប​សង្កត់​សិទ្ធិ​ជនជាប់ចោទ។
«ការ​ដាក់​លក្ខខណ្ឌ​ទាំង​ប្រាំមួយ​នេះ​នឹង​ក្លាយ​ជាការ​រឹតត្បិត​លើ​សិទ្ធិ​ទទួលបាន​សេរីភាព​ឡើងវិញ​របស់​ចុង​បណ្តឹង​សារទុក្ខ»។
ទោះជា​យ៉ាងណា​លោក​ចៅក្រម​គង់ ស្រ៊ីម ប្រធាន​អង្គជំនុំជម្រះ​តុលាការ​កំពូល​បាន​ប្រកាស​ថា​ការ​សម្រេច​លើ​ករណី​បណ្តឹង​សារទុក្ខ​សុំ​ដាក់​លក្ខខណ្ឌ​លើ​ការដោះលែង​អៀង ធីរិទ្ធ នឹង​ត្រូវ​ជូនដំណឹង​នៅ​ពេល​ក្រោយ៕
XS
SM
MD
LG