អង្គការសង្គមស៊ីវិលក្នុងស្រុកចំនួន៩ នៅថ្ងៃពុធនេះ បានទទូចឲ្យគណបក្សប្រជាជនកម្ពុជា និងគណបក្សសង្គ្រោះជាតិ ដែលកំពុងចរចាអំពីកំណែទម្រង់ប្រព័ន្ធបោះឆ្នោត បញ្ចូលការគោរពសេរីភាពបញ្ចេញមតិរបស់អង្គការសង្គមស៊ីវិល ដែលចង់សម្តែងមតិក្នុងអំឡុងពេលនៃការបោះឆ្នោត។
សេចក្តីថ្លែងការណ៍របស់អង្គការសង្គមស៊ីវិលដែលបានចេញផ្សាយបានឲ្យដឹងថា ក្នុងអំឡុងពេលចរចាស្តីពីកំណែទម្រង់ប្រព័ន្ធបោះឆ្នោតនាពេលថ្មីៗនេះ លោកប៊ិន ឈិន ប្រធានក្រុមការងារចរចាមកពីគណបក្សប្រជាជនកម្ពុជា និងលោកកួយ ប៊ុនរឿន ប្រធានក្រុមការងារចរចាមកពីគណបក្សសង្គ្រោះជាតិ បានលើកឡើងនូវវិធានការថ្មីមួយដែលហាមឃាត់បុគ្គលិកអង្គការមិនមែនរដ្ឋាភិបាលក្នុងការផ្តល់បទសម្ភាសន៍ជាមួយប្រព័ន្ធផ្សព្វផ្សាយ ឬចេញសេចក្តីថ្លែងការណ៍ផ្សេងៗដែលអាច«ជេរប្រមាថ»គណបក្សនយោបាយក្នុងអំឡុងពេលបោះឆ្នោត។
អង្គការសង្គមស៊ីវិលទាំងនោះបានលើកឡើងថា វិធានការបែបនេះអាចនឹងត្រូវប្រើសម្រាប់តែការរារាំងការជជែកពិភាក្សាជាសារធារណៈ កាត់បន្ថយសិទ្ធិចូលរួមយ៉ាងសកម្មក្នុងជីវភាពនយោបាយរបស់ជាតិដែលមានចែងក្នុងរដ្ឋធម្មនុញ្ញ និងធ្វើឲ្យប៉ះពាល់ដល់តួនាទីរបស់អង្គការសង្គមស៊ីវិលក្នុងការទាមទារឲ្យអាជ្ញាធរសារធារណៈទទួលខុសត្រូវតែប៉ុណ្ណោះ។
លោក នី ចរិយា ប្រធានផ្នែកសិទ្ធិមនុស្ស និងជំនួយការផ្នែកច្បាប់នៃសមាគមសិទ្ធិមនុស្សអាដហុក មានប្រសាសន៍ថា រឿងនយោបាយគឺជារឿងរបស់ប្រជាពលរដ្ឋគ្រប់រូប។ ដូច្នេះអ្វីដែលជាការលើកឡើងដើម្បីហាមប្រាមមិនឲ្យសម្តែងមតិគឺជាការបំបិទសិទ្ធិសេរីភាពរបស់ពលរដ្ឋ និងអង្គការសង្គមស៊ីវិលក្នុងការចូលរួមសម្តែងមតិខាងនយោបាយ។
លោកនិយាយថា៖ «បើយើងបិទសិទ្ធិមិនឲ្យធ្វើការរិះគន់ទេនោះ វាធ្វើឲ្យគណបក្សដែលទទួលបានសំឡេងហ្នឹងគឺថា មិនបានឆ្លុះបញ្ជាំងទៅនឹងតម្រូវការរបស់ប្រជាពលរដ្ឋទេ នៅពេលដែលខ្លួនដាក់គោលនយោបាយហ្នឹងទៅដែលជាបញ្ហាសំខាន់សម្រាប់កសាងប្រទេសនោះ»។
គណបក្សប្រជាជនកម្ពុជា និងគណបក្សសង្គ្រោះជាតិបានជជែកគ្នាឈានដល់ជំពូកទី៨ហើយក្នុងចំណោម១២ជំពួកនៃសេចក្តីព្រាងច្បាប់ស្តីពីការគ្រប់គ្រងការបោះឆ្នោតជ្រើសតាំងតំណាងរាស្ត្រ។
គណបក្សទាំងពីររំពឹងថា សេចក្តីព្រាងច្បាប់ថ្មីនេះនឹងធ្វើចប់សព្វគ្រប់នៅចុងខែកុម្ភៈនេះ។ បើទោះបីជាមានចំណុចមួយចំនួននៅមិនទាន់បានព្រមព្រៀងគ្នាក៏ដោយ តែគណបក្សទាំងពីរបានសន្យាថា នឹងទុកឲ្យថ្នាក់ដឹកនាំកំពូលជាអ្នកសម្រេចនូវចំណុចដែលនៅសេសសល់។
លោកកួយ ប៊ុនរឿន ប្រធានក្រុមការងារចរចាមកពីគណបក្សសង្គ្រោះជាតិ មានប្រសាសន៍ថា ចំណុចនេះគណបក្សប្រជាជនកម្ពុជាជាអ្នកលើកឡើង។ លោកមានប្រសាសន៍ថា គណបក្សសង្គ្រោះជាតិគោរពនូវគោលការណ៍សេរីភាពបញ្ចេញមតិ តែបើមានការជេរប្រមាថគឺផ្ទុយនឹងរដ្ឋធម្មនុញ្ញ។
លោកនិយាយថា៖ «គណបក្សសង្គ្រោះជាតិគាំទ្រនូវសិទ្ធិបញ្ចេញមតិហើយគាំទ្រចង់ឲ្យមានភាគីដទៃទៀតផ្សេងទៀត ដែលមានការពាក់ព័ន្ធក្នុងការតាមដានអំពីយន្តការនៃការបោះឆ្នោត ធ្វើម៉េចដើម្បីឲ្យមានការរៀបចំបានល្អប្រសើរ ស្របតាមគោលការណ៍នៃការបោះឆ្នោតដោយសេរី ត្រឹមត្រូវ និងយុត្តិធម៌»។
លោកប៊ិន ឈិន ប្រធានក្រុមការងារចរចាមកពីគណបក្សប្រជាជនកម្ពុជា មិនបានធ្វើអត្ថាធិប្បាយទេ ដោយលោកនិយាយថា កំពុងជាប់ប្រជុំ។
លោកនិយាយថា៖ «ខ្ញុំកំពុងប្រជុំ ជាប់រវល់ប្រជុំ»។
គណបក្សប្រជាជនកម្ពុជា និងគណបក្សសង្គ្រោះជាតិរំពឹងថា ច្បាប់ថ្មីស្តីពីការគ្រប់គ្រងការបោះឆ្នោតជ្រើសតាំងតំណាងរាស្ត្រថ្មីនេះនឹងមានស្ថាប័នគ.ជ.ប.មួយឯករាជ្យ យុត្តិធម៌ និងអាចទទួលយកបានពីគ្រប់ភាគីទាំងអស់៕
