នៅថ្ងៃសុក្រនេះ កម្ពុជាបានបណ្តេញជនសង្ស័យឧក្រិដ្ឋកម្ម៣៩នាក់ទៅកាន់ចិនដីគោក ក្នុងនោះ២៥នាក់ជាពួកតៃវ៉ាន់ ដែលរដ្ឋាភិបាលក្រុងប៉េកាំងបានទទូចថា កម្ពុជាមានយុត្តាធិការ ទោះបីជាមានការតវ៉ាពីរដ្ឋាភិបាលក្រុងតៃប៉ិក៏ដោយ។
ប្រធានការិយាល័យស៊ើបអង្កេតអន្តោប្រវេសន៍នៃក្រសួងមហាផ្ទៃ លោកឧត្តមសេនីយ៍ អ៊ុក ហៃសិលា បានមានប្រសាសន៍ថា ជនជាតិចិនតៃវ៉ាន់២៥នាក់ និងចិន១៤នាក់ត្រូវបានបញ្ជូនតាមយន្តហោះពិសេសមួយគ្រឿងដែលបញ្ជូនចេញដោយរដ្ឋាភិបាលចិន។
លោកបានមានប្រសាសន៍ថា ពួកគេទាំងនោះត្រូវបានបញ្ជូនទៅកាន់ប្រទេសចិន ដោយសារតែពួកគេបានប្រព្រឹត្តបទល្មើសទៅលើប្រជាពលរដ្ឋចិន។ ពួកគេត្រូវបានចោទប្រកាន់ពីបទបោកបញ្ឆោតជនរងគ្រោះនៅក្នុងប្រទេសចិន តាមរយៈការហៅទូរស័ព្ទតាមប្រព័ន្ធអ៊ីនធឺណិត ដែលធ្វើឲ្យមានភាពស្មុគស្មាញក្នុងការតាមដានពួកគេ។ លោកបាននិយាយកាលពីមុនថា កាលពីដើមសប្តាហ៍នេះ ពួកគេនឹងត្រូវបញ្ជូនទៅប្រទេសចិនដោយសារតែកម្ពុជាចាត់ទុកតៃវ៉ាន់ថាជាផ្នែកមួយរបស់ចិន។
កាលពីដំបូងឡើយ កម្ពុជាគ្រោងនឹងបណ្តេញមនុស្សចំនួន៣៥នាក់ចេញ ប៉ុន្តែមនុស្ស៤នាក់ទៀតត្រូវបានចាប់ខ្លួននៅក្នុងការវាយឆ្មក់កាលពីសប្តាហ៍មុន។ នេះបើយោងតាមសម្តីរបស់លោក ហៃសិលា។
ក្រុមសកម្មជនសិទ្ធិមនុស្សនិងអាជ្ញាធរតៃវ៉ាន់និយាយថា ការបញ្ជូនខ្លួននេះ ឆ្លុះបញ្ចាំងពីឥទ្ធិពលដ៏ខ្លាំងក្លារបស់ចិនទៅលើកម្ពុជា តាមរយៈការផ្តល់ជំនួយនិងការវិនិយោគ។
ចិនគឺជាសម្ព័ន្ធមិត្តដ៏សំខាន់និងជាដៃគូសេដ្ឋកិច្ចរបស់កម្ពុជាដែលជាប្រទេសក្រីក្រមួយ។ ចិនបានផ្តល់ទឹកប្រាក់រាប់លានដុល្លារតាមរយៈជំនួយនិងវិនិយោគក្នុងរយៈពេលមួយទសវត្សរ៍មុននេះ ដោយចិនបានព្រមព្រៀងផ្តល់ជំនួយឥតសំណងនិងលើកលែងពន្ធនាំចេញនាំចូលលើទំនិញរាប់រយប្រភេទ។
ប្រទេសកេនយ៉ានិងម៉ាឡេស៊ីក៏បានបញ្ជូនខ្លួនជនសង្ស័យតៃវ៉ាន់ដែលបោកបញ្ឆោតលើប្រព័ន្ធអ៊ីនធឺណិតទៅកាន់ប្រទេសចិនដែរ បើទោះបីជាមានការតវ៉ាពីក្រុមមន្ត្រីតៃវ៉ាន់ក៏ដោយ៕
