ភ្នំពេញ៖ យ៉ាងតិចមានមន្ត្រីតំណាងអង្គការសង្គមស៊ីវិលចំនួន១១បានចូលជួបដាច់ដោយឡែកមួយជាមួយនឹងមន្ត្រីជាន់ខ្ពស់សហរដ្ឋអាមេរិកទទួលបន្ទុកសិទ្ឋិមនុស្សនិងជាទីប្រឹក្សារបស់លោកប្រធានាធិបតីសហរដ្ឋអាមេរិកបារ៉ាក់ អូបាម៉ាក្នុងអំឡុងពេលដែលលោកអូបាម៉ាស្នាក់នៅក្នុងប្រទេសកម្ពុជា។
ជំនួបនេះបានធ្វើឡើងមិនបើកចំហរ ប៉ុន្តែគ្រាន់តែបានដឹងថាបានធ្វើឡើងក្រោយពេលលោកប្រធានាធិបតីសហរដ្ឋអាមេរិកមានជំនួបក្រៅផ្លូវការមួយជាមួយនឹងលោកនាយករដ្ឋមន្ត្រីហ៊ុន សែននៅក្រៅកិច្ចប្រជុំកំពូលអាស៊ាន និងសហរដ្ឋអាមេរិក។
លោកអ៊ូ វីរៈ ប្រធានមជ្ឃមណ្ឌលសិទ្ឋិមនុស្សកម្ពុជា
លោកអ៊ូ វីរៈ ប្រធានមជ្ឃមណ្ឌលសិទ្ឋិមនុស្សកម្ពុជាដែលជាមន្ត្រីអង្គការសង្គមស៊ីវិលមួយរូបដែលបានជួបជាមួយនឹងមន្ត្រីជាន់ខ្ពស់សហរដ្ឋអាមេរិកបានបញ្ជាក់ថា អង្គការសង្គមស៊ីវិលបានរាយការណ៍អំពីការរំលោភសិទ្ឋិមនុស្ស ការចាប់ខ្លួនលោកម៉ម សូណង់ដូ នាយកស្ថានីយវិទ្យុសម្បុកឃ្មុំ និងសកម្មជនដីធ្លីដាក់ពន្ឋនាគារ កំណែទម្រង់ប្រព័ន្ឋតុលាការនិងកំណែទំរង់ប្រព័ន្ឋបោះឆ្នោត។លោកអ៊ូ វីរៈមិនបានអះអាងថាតើសហរដ្ឋអាមេរិកមានជំហរបែបណាក្រោយពីជួបជាមួយតំណាងអង្គការសង្គមស៊ីវិលនេះទេ។
«នៅក្នុងការជួបហ្នឹងខ្ញុំខ្លួនឯងអត់អាចនិយាយបានទេក៏ប៉ុន្តែយើងបានប្រាប់ពីរឿងទូទៅ។ មានអង្គការមួយចំនួនបានចូលរួមមានអង្គការខុសៗគ្នា។ មានអង្គការធំៗទាំងអស់នៅក្នុងហ្នឹង»។
លោកសន ម៉ាកឃីនថត អ្នកនាំពាក្យស្ថានទូតសហរដ្ឋអាមេរិកប្រចាំកម្ពុជាបានទទួលស្គាល់ថាពិតជាមានជំនួបរវាងមន្ត្រីជាន់ខ្ពស់សហរដ្ឋអាមេរិកជួបជាមួយ និងមន្ត្រីអង្គការសង្គមស៊ីវិលមួយចំនួនពិតមែន។ លោកបានប្រាប់វីអូអេ តាមសារអេឡិចត្រូនិកឬអ៊ីមែលមកថាលោកវ៉ាឡឺរី ចារ៉េត្ត (Valerie Jarrett) ទីប្រឹក្សាជាន់ខ្ពស់និងលោកស្រី សាម៉ានថា ផោវ័រ (Samantha Power) ទីប្រឹក្សាពិសេសលោកប្រធានាធិបតីបារ៉ាក់ អូបាម៉ាបានជួបជាមួយមន្ត្រីអង្គការសង្គមស៊ីវិលទាំងនោះដើម្បីស្វែងយល់អំពីស្ថានភាពសិទ្ឋិមនុស្សក្នុងកម្ពុជានិងផ្លាស់ប្តូរគំនិតគ្នាទៅវិញទៅមកស្តីពីបញ្ហាសិទ្ឋិមនុស្ស។
លោកអូបាម៉ាបានមកទស្សនកិច្ចកម្ពុជារយះពេលពីថ្ងៃចាប់ពីថ្ងៃ១៩ដល់ថ្ងៃទី២០កន្លងទៅនេះដើម្បីចូលរួមកិច្ចប្រជុំកំពូលអាស៊ាននិងសហរដ្ឋអាមេរិក។
នៅមុនកិច្ចប្រជុំកំពូលអាស៊ានលោកនាយករដ្ឋមន្ត្រីហ៊ុន សែនមានជំនួបទ្វេភាគីដាច់ដោយឡែកមួយជាមួយប្រធានាធិបតីសហរដ្ឋអាមេរិកបារ៉ាក់ អូបាម៉ា។ ក្រោយពីជំនួបរយៈពេលជាង៣០នាទីលោកប្រាក់ សុខុនរដ្ឋលេខាធិការទីស្តីការគណៈរដ្ឋមន្ត្រីបានប្រាប់អ្នកយកព័ត៌មានថា លោកប្រធានាធិបតីសហរដ្ឋអាមេរិកបានលើកឡើងពីបញ្ហាសិទ្ឋិមនុស្សនិងអ្នកទោសនយោបាយនៅក្នុងប្រទេសកម្ពុជា។
លោកប្រាក់ សុខុនបានស្រង់សម្តីលោកនាយករដ្ឋមន្ត្រីហ៊ុន សែនមកអះអាងថា លោកហ៊ុន សែនប្រាប់លោកបានប្រាប់លោកអូបាម៉ាថាបញ្ហារំលោភសិទ្ឋិមនុស្សនៅកម្ពុជាជាការមួលបង្កាច់ហើយនៅកម្ពុជាមិនមានអ្នកទោសនយោបាយទេក៏ប៉ុន្តែមានអ្នកនយោបាយដែលធ្វើខុសនិងច្បាប់។លោកបានបញ្ជាក់ថា បញ្ហាលោកសម រង្ស៊ីមិនបានលើកនៅក្នុងជំនួបទ្វេភាគីទេ។
ទីប្រឹក្សាផ្នែកសន្តិសុខសហរដ្ឋអាមេរិក លោក បេន រ៉ូដ្ស (Ben Rhodes) ដែលកត់សម្គាល់ថា ជំនួបទ្វេភាគីរវាងមេដឹកនាំនៃប្រទេសទាំងពីរបានប្រព្រឹត្តទៅក្នុងស្ថានភាពតានតឹង។ លោកបាននិយាយថាលោកប្រធានាធិបតីអូបាម៉ានិយាយសង្កត់ធ្ងន់ទៅលើការរំលោភសិទ្ឋិមនុស្ស។
សហរដ្ឋអាមេរិកបានព្រមានឲ្យកម្ពុជាធ្វើឲ្យប្រសើរនូវស្ថានភាពសិទ្ឋិមនុស្សនិងលិទ្ឋិប្រជាធិបតេយ្យប្រសិនបើចង់ឲ្យមានទំនាក់ទំនងល្អជាមួយសហរដ្ឋអាមេរិក៕
