កម្ពុជាអនុញ្ញាតឱ្យក្រុមហ៊ុនរ៉ូយ៉ាល់គ្រុប បង្កើតរោងចក្រអគ្គិសនីដើរដោយឧស្ម័នធម្មជាតិរាវ(LNG)ដែលមានអានុភាព៩០០មេហ្កាវ៉ាត់ជាលើកដំបូង បន្ទាប់ពីរដ្ឋាភិបាលប្រកាសឈប់ផ្តល់អាជ្ញាបណ្ណថ្មីសម្រាប់បង្កើតរោងចក្រអគ្គិសនីដុតដោយធ្យូងថ្ម។
បើតាមរដ្ឋាភិបាល ការអនុញ្ញាតឱ្យផលិតរោងចក្រអគ្គិសនីដោយប្រើឧស្ម័នធម្មជាតិ LNG ជួយទប់ស្កាត់ការប្រែប្រួលអាកាសធាតុ ដោយសារការបំពុលបរិស្ថានតិចជាងការផលិតអគ្គិសនីដោយដុតធ្យូងថ្ម។
រោងចក្រអគ្គិសនីដើរដោយឧស្ម័នធម្មជាតិ LNG មានអានុភាព៩០០មេហ្កាវ៉ាតនេះ បានបើកការដ្ឋានសាងសង់កាលពីថ្ងៃទី១៦ ខែតុលា ឆ្នាំ២០២៤ ដោយក្រុមហ៊ុនរ៉ូយ៉ាល់គ្រុប របស់អ្នកឧកញ៉ា គិត ម៉េង បន្ទាប់ពីរដ្ឋាភិបាលលុបចោលគម្រោងសាងសង់រោងចក្រដុតធ្យូងថ្មទំហំថាមពល៧០០មេហ្កាវ៉ាត់របស់ក្រុមហ៊ុនមួយនេះ នៅក្នុងស្រុកបទុមសាគរ ខេត្តកោះកុង កាលពីខែវិច្ឆិកា ឆ្នាំ២០២៣។
រោងចក្រអគ្គិសនីដើរដោយឧស្ម័នធម្មជាតិ LNG មានទីតាំងក្នុងឃុំថ្មស ស្រុកបទុមសាគរ ខេត្តកោះកុង ដោយគ្រោងចំណាយទុនវិនិយោគជាង១ពាន់៣រយលានដុល្លារអាមេរិក។ នេះបើតាមសារព័ត៌មានក្នុងស្រុក។
លោក ហេង គឹមហុង នាយកប្រតិបត្តិនៃសមាគមបណ្តាញយុវជនកម្ពុជាយល់ថា ការបង្កើតរោងចក្រអគ្គិសនីបែបនេះ គឺជារឿងល្អដោយសារវាអាចជួយធានានូវសន្តិសុខថាមពលអគ្គិសនីក្នុងប្រទេស។ ប៉ុន្តែលោកជំរុញឱ្យរដ្ឋាភិបាល និងក្រុមហ៊ុនផ្សព្វផ្សាយរបាយការណ៍វាយតម្លៃប៉ះពាល់បរិស្ថានជាសាធារណៈ ដើម្បីឱ្យប្រជាពលរដ្ឋអាចស្វែងយល់ពីទំហំនៃផលប៉ះពាល់ និងដំណោះស្រាយ និងទំហំនៃថាមពលដាក់ឱ្យប្រើប្រាស់ ជាពិសេសប្រភពឧស្ម័ន LNG សម្រាប់យកទៅផលិតអគ្គិសនីទាំងនោះ។
លោក ហេង គឹមហុង ក៏ជំរុញឱ្យរដ្ឋាភិបាលពិចារណាក្នុងការបញ្ចុះតម្លៃអគ្គិសនីនៅពេលរោងចក្រសាងសង់រួច។
លោកប្រាប់វីអូអេថា៖ «បើសិនជាកម្ពុជាមានផែនការជាច្រើនជាបន្តបន្ទាប់ យើងបានដឹងហើយមានថាមពលស្អាត មានថាមពលឧស្ម័ន មានថាមពលអ្វីផ្សេងទៀតហ្នឹង ខ្ញុំក៏ឆ្លៀតឱកាសអំពាវនាវដែរ ថា រដ្ឋាភិបាលគួរតែពិចារណាជំរុញឱ្យមានការបញ្ចុះតម្លៃអគ្គិសនីក្នុងការប្រើប្រាស់នៅក្នុងស្រុក ដើម្បីឱ្យពលរដ្ឋប្រើប្រាស់បានក្នុងតម្លៃសមរម្យជាងនេះបន្តិចទៀត»។
វីអូអេមិនទាន់អាចសុំការអត្ថាធិប្បាយពីអ្នកឧកញ៉ា គិត ម៉េង បាននៅឡើយទេ។
ចំណែកអ្នកនាំពាក្យអគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពល លោក ហេង គុណលាង បដិសេធមិនផ្តល់ការអត្ថាធិប្បាយ។
លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានបង្ហោះសារលើទំព័រហ្វេសប៊ុករបស់លោក កាលពីថ្ងៃទី១៦ ខែតុលា ឆ្នាំ២០២៤ថា រោងចក្រអគ្គិសនីដើរដោយឧស្ម័ន LNG នេះ គ្រោងដាក់ឱ្យដំណើរការនៅឆ្នាំ២០២៧។ ហើយរោងចក្រនេះមានតួនាទីបង្កើនប្រភពអគ្គិសនី និងជួយពង្រឹងសន្តិសុខថាមពលជាតិ បង្កើនស្ថិរភាពរបស់បណ្តាញជាតិ ដោយជួយធ្វើជាបង្អែកឱ្យថាមពលពន្លឺព្រះអាទិត្យ ថាមពលខ្យល់ ហើយបំពេញការខ្វះខាតឱ្យថាមពលវារីអគ្គិសនីនៅខែប្រាំង និងបំភាយជាតិពុលទៅបរិយាកាសតិចជាងថាមពលដើរដោយធ្យូងថ្ម។
សារព័ត៌មានខេមបូណូមីស កាលពីថ្ងៃទី១៦ ខែតុលា បានស្រង់សម្តីរបស់លោក Thomas Joseph អគ្គនាយកក្រុមហ៊ុន Royal Group Power ថា ក្រោយរោងចក្រនេះដាក់ឱ្យដំណើរការ វានឹងរួមចំណែករហូតដល់២៦% ក្នុងទិន្នផលផលិតថាមពលសរុបរបស់កម្ពុជា ហើយវានឹងក្លាយជារោងចក្រផលិតថាមពលដើរដោយឧស្ម័នធម្មជាតិរាវ LNG ដ៏ធំ និងដំបូងគេបង្អស់នៅកម្ពុជា។
សារព័ត៌មានខេមបូណូមីសស្រង់សម្តីរបស់អគ្គនាយកក្រុមហ៊ុននេះបន្ថែមថា រោងចក្រនេះនឹងចូលរួមចំណែកជួយគាំទ្រដល់គម្រោងបង្កើនសមត្ថភាពផលិតថាមពលស្អាតឱ្យបាន៧០%របស់កម្ពុជានៅត្រឹមឆ្នាំ២០៣០។ ឧស្ម័នធម្មជាតិត្រូវបានគេទទួលស្គាល់ថា ជាថាមពលស្អាតជាងធ្យូងថ្មចន្លោះពី៥០ទៅ៦០% ដូច្នេះ រោងចក្រផលិតថាមពលរបស់ក្រុមហ៊ុន រ៉ូយ៉ាល់ គ្រុបនេះនឹងរួមចំណែកយ៉ាងសំខាន់ក្នុងការជួយកម្ពុជាឱ្យសម្រេចគោលដៅក្លាយជាប្រទេសបំភាយឧស្ម័នសូន្យភាគរយនៅឆ្នាំ២០៥០។
កាលពីខែវិច្ឆិកា ឆ្នាំ២០២៣ លោកនាយករដ្ឋមន្ត្រី ហ៊ុន ម៉ាណែត ប្រកាសឈប់ឱ្យមានការអភិវឌ្ឍរោងចក្រផលិតអគ្គិសនីដុតធ្យូងថ្ម ហើយត្រូវពិនិត្យលទ្ធភាពចំពោះរោងចក្រផលិតអគ្គិសនីដុតធ្យូងថ្មដែលមានស្រាប់ ឱ្យបញ្ឈប់ដំណើរការមុនកំណត់នៅកម្ពុជា។
នាពេលនោះ លោកហ៊ុន ម៉ាណែត បានបញ្ជាឱ្យលុបចោលគម្រោងសាងសង់រោងចក្រដុតធ្យូងថ្ម ដែលមានអានុភាពថាមពល៧០០មេហ្កាវ៉ាត់របស់ក្រុមហ៊ុន រ៉ូយ៉ាល់គ្រុប ក្នុងស្រុកបទុមសាគរ ខេត្តកោះកុង ដោយឱ្យពិនិត្យប្តូរលទ្ធភាពគម្រោងនោះទៅជាគម្រោងផលិតអគ្គិសនី ដុតដោយឧស្ម័ន LNG វិញ។
បើតាមលោក ហ៊ុន ម៉ាណែត ការផលិតអគ្គិសនីដោយប្រើឧស្ម័ន LNG គឺបំពុលបរិស្ថានតិចជាង ការផលិតអគ្គិសនីដោយដុតធ្យូងថ្ម។ លោកថា នេះជាជំហានមួយក្នុងការចូលរួមទប់ស្កាត់ ការប្រែប្រួលអាកាសធាតុ និងមានការទទួលខុសត្រូវលើផ្នែកបរិស្ថាន ដែលកម្ពុជា បានសន្យានៅក្នុងសន្និសីទស្តីពីការប្រែប្រួលអាកាសធាតុរបស់អង្គការសហប្រជាជាតិ COP26 នៅចក្រភពអង់គ្លេស កាលពីខែវិច្ឆិកា ឆ្នាំ២០២១។
ការសម្រេចរបស់រដ្ឋាភិបាលកម្ពុជាលុបចោលគម្រោងសាងសង់រោងចក្រអគ្គិសនីដុតដោយធ្យូងថ្ម ធ្វើឡើងស្របពេលអ្នកតស៊ូមតិលើផ្នែកបរិស្ថានចង់ឃើញកម្ពុជាអភិវឌ្ឍអគ្គិសនី ដោយប្រើប្រាស់ថាមពលកកើតឡើងវិញ ឬថាមពលស្អាត ដែលសំដៅលើថាមពលព្រះអាទិត្យ និង ថាមពលខ្យល់ជាដើម៕
វេទិកាបញ្ចេញមតិ