ភ្ជាប់​ទៅ​គេហទំព័រ​ទាក់ទង

សិល្បករ​ចង់​ឲ្យ​គេ​ស្គាល់​​កម្ពុជា​តាមរយៈ​សិល្បៈ ជាជាង​​អំពើ​ប្រល័យ​ពូជ​សាសន៍​​


សិល្បករ​មួយ​ក្រុម​សង្ឃឹម​ថា ពួកគេ​នឹង​ជួយ​ធ្វើ​​ឲ្យ​គេ​ស្គាល់​ប្រទេស​ខ្លួនតាម​រយៈ​​ស្នាដៃ​សិល្បៈ​របស់​ខ្លួន​វិញ។​
ភ្នំពេញ​៖ ប្រទេស​កម្ពុជា​ត្រូវ​បាន​ពិភពលោក​ស្គាល់​ភាគច្រើន​ដោយ​សារ​អតីតកាល​នៃ​សោក​នាដកម្ម​ដ៏ជូរចត់​របស់​ខ្លួន​ ដែល​ពាក់​ព័ន្ធ​នឹង​របប​ខ្មែរ​ក្រហម​និង​អំពើប្រល័យពូជសាសន៍។ ប៉ុន្តែ សិល្បករ​មួយ​ក្រុម​សង្ឃឹម​ថា ពួកគេ​នឹង​ជួយ​ធ្វើ​ឲ្យ​មានការ​ផ្លាស់​ប្តូរ​ផ្នត់​គំនិត​នេះ ដោយ​ធ្វើ​ឲ្យ​គេ​ស្គាល់​ប្រទេស​នេះ​តាម​រយៈស្នាដៃ​សិល្បៈ​របស់​ខ្លួន​វិញ។​

សិល្បករ​វ័យ​ក្មេង​ទាំង​នេះ​កំពុង​ហាត់​សមរបាំ​របស់​ពួកគេ​នៅ​ក្នុង​ទីក្រុង​ភ្នំពេញ​ដើម្បី​ត្រៀម​ខ្លួន​សម្រាប់​ចូលរួម​មហោស្រព​សិល្បៈ​ដ៏​ធំមួយ​ក្នុង​ទីក្រុង​ញូយ៉ក នៅខែ​មេសា​នេះ។

ពួក​គេ​និយាយ​ថា ពួកគេ​ចង់​ឲ្យ​ប្រជាជន​នៅ​លើ​ពិភព​លោក​ស្គាល់​ប្រទេស​កម្ពុជា ដោយសារ​សិល្បៈ​របស់​ខ្លួន ជាជាង​ដោយសារវាល​ពិឃាត​នៃ​ប្រទេស​នេះ។​

លោក​ជី រតនា​គឺ​ជា​អ្នករាំ​ម្នាក់​នៅក្នុង​ក្រុម​ដែល​មាន​សមាជិក​៥នាក់ ​មក​ពី​អង្គការ​អម្រឹតា​សិល្បៈ​នេះ។​

«ឥឡូវ​យើង​មាន​ការ​អភិវឌ្ឍ​ច្រើន​ជាមួយ​នឹង​សិល្បៈ​ ហើយ​ជា​មួយ​នឹង​សមត្ថ​ភាព​កូន​ខ្មែរ។ យើង​មាន​គំនិត​ ហើយ​ធនធាន​ពួកយើង​រឹង​មាំ​ច្រើន ហើយ​កើន​ឡើង​ច្រើន​ដើម្បី​ធ្វើ​ឲ្យ​ពិភព​លោក​ដឹង​ថា ប្រទេស​របស់​យើង​មាន​សមត្ថភាពបង្ហាញស្នាដៃ​អ្វី​មួយ»។​

ក្រុម​នេះ​នឹង​សម្តែង​របាំ​របស់​ពួកគេ​នៅ​ឯ​មជ្ឈមណ្ឌល​សិល្បៈ Abrons ​Arts​ Center ​នៅ​ថ្ងៃ​ទី​១៨​ និង​១៩​ខែ​មេសា​នេះ ជា​ផ្នែក​មួយ​នៃ​មហោស្រព​សិល្បៈ​ខ្មែរ ឬSeason of Cambodia ​ក្នុង​ទីក្រុង​ញូយ៉ក។​

របាំ​ដែល​គេ​ឲ្យ​ឈ្មោះ​ថា Olden New Golden Blue​ឬ​ចរន្ត​បញ្ច្រាសទិស បង្ហាញ​អំពី​ទំនាក់​ទំនង​បែប​សិល្បៈ​របស់​អ្នក​រាំ​ជាមួយ​នឹង​ឬស​គល់​នៃ​អតីត​កាល​របស់​ពួក​គេ។​

លោក​ភីតធើ ឈិន ​(Peter Chin )​គឺ​ជា​បង្កើត​របាំ​ថ្មី​បែប​សហ​សម័យ​នេះ​ឡើង។

«មហោ​ស្រព​នៅទីក្រុង​ញូយ៉ក​នោះ​នឹង​មិន​អាច​ទប់បាន​ទេ ហើយ​ខ្ញុំ​សង្ឃឹម​ថា វា​នឹង​ផ្លាស់​ប្តូរ​ផ្នត់​គំនិត​ដែល​មាន​រួច​មក​ហើយ​ថា កម្ពុជា​មាន​អង្គរវត្ត​និង​មាន​ទំនាក់​ទំនង​ទៅ​នឹង​សង្គ្រាម​ខ្មែរ​ក្រហម។ ប៉ុន្តែ​ឥឡូវ​នេះ មហោស្រព​នេះ​ផ្តល់​ឲ្យ​យើង​នូវឱកាស​កំណត់​ប្រទេស​កម្ពុជា​ឡើង​វិញ​ថា ​ជា​ប្រជាជាតិ​ដែល​ពោរពេញ​ទៅ​ដោយ​សិល្បៈ​វប្បធម៌»។​

ប្រទេស​កម្ពុជា​បាន​ឆ្លងកាត់​សង្គ្រាម​ស៊ីវិល​ និង​ការ​វាយ​ប្រយុទ្ធ​គ្នា​រវាង​ភាគី​នានា​អស់​រយៈ​ពេល​៣​ទសវត្ស​ ចាប់​តាំង​ពី​ទសវត្ស​ឆ្នាំ​១៩៧០​មក។​

រជ្ជកាល​ដ៏​អាក្រក់​បំផុត​ក្នុង​របប​ខ្មែរក្រហមបាន​បង្ក​ឲ្យ​ប្រជាជន​ប្រមាណ​១លាន​៧​សែន​នាក់​ស្លាប់​ហើយ​សិល្បៈ វប្បធម៌ ត្រូវ​បាន​បំផ្លាញ។​

តែ​ទោះ​ជា​យ៉ាង​នេះ ក្រុម​សិល្បករ​វ័យ​ក្មេង​ទាំងនេះ​នៃ​អង្គការ​អម្រឹតា​សិល្បៈ​ ​បាន​បង្ហាញ​ក្តី​សង្ឃឹម​ថា ពិភពលោក​នឹង​ចាប់​ផ្តើម​ស្គាល់​កម្ពុជា ដោយសារ​ទេព​កោសល្យ​ខាង​សិល្បៈ​របស់​ខ្លួន​វិញ។​
លោក កង ឬទ្ធីសាល គឺ​ជា​នាយក​កម្មវិធី​អង្គការ​អម្រឹតា​សិល្បៈ។​

«ឱកាស​សម្រាប់​សិល្បករ​ជំនាន់​ថ្មី​របស់​ខ្មែរ​ទៅ​សម្តែង​នៅ​ទីនោះ​គឺ​ជា​ការ​ចូលរួម​ចំណែក​មួយ​យ៉ាង​ខ្លាំង​ក្នុង​ការ​ធ្វើ​ឲ្យ​ប្រទេស​ខ្មែរ​យើង​បាន​ចូល​ទៅក្នុង​ឆាក​អន្តរ​ជាតិ បាន​ត្រូវ​គេ​ឮ គេ​ស្គាល់ គេ​ដឹង លើស​ពី​អ្វី​ដែល​ជា​ប្រវត្តិ​ជូរចត់​ដូច​ជា​ខ្មែរក្រហម​ និង​ប្រវត្តិ​សោកនាដ​កម្ម​ផ្សេងៗ​របស់​ខ្លួន»។​

ក្រុម​សិល្បករៈ​វ័យ​ក្មេង​ទាំង​នេះ​នឹង​ចូលរួម​ជាមួយ​សិល្បករ​ចំនួន​ជាង​១០០​នាក់​ផ្សេង​ទៀត​ពី​ប្រទេស​
កម្ពុជា នៅក្នុង​មហោស្រព​សិល្បៈ​ខ្មែរ​ដែល​នឹង​ចាប់​បើក​សម្ពោធ​ជា​ផ្លូវ​ការ​នៅថ្ងៃ​ទី​១៣​ខែ​មេសា​នេះ។​
លោក​ព្រីម ភ្លឿន​គឺ​ជានាយក​ប្រតិបត្តិ​នៃ​អង្គការ​សិល្បៈ​ខ្មែរ​អមតៈ​និង​ជា​អ្នក​រៀបចំ​មហោ​ស្រព​សិល្បៈ​ខ្មែរ​នោះ។​

«ក្មេងៗ​សម័យ​ឥឡូវ​ដែល​កំពុង​ស្វែង​យល់​អំពី​វប្បធម៌​គាត់ ហើយ​គាត់​ចាប់​ផ្តើម​មាន​ស្នាដៃ​ថ្មី​របស់​គាត់។ អញ្ចឹង​ខ្ញុំ​គិត​ថា ដល់​ពេល​ដែល​កម្ពុជា​យើង​ចាប់​ផ្តើម​បង្ហាញ​ពិភពលោក​អំពី​ស្នាដៃ​វប្បធម៌​របស់​យើង»។​
លោក​បន្ថែម​ថា​ ការ​យល់​ដឹង​របស់​ពិភពលោក​អំពី​ប្រទេស​កម្ពុជាថា​ ជា​វាល​ពិឃាត​ ឬ​របប​ប្រល័យ​ពូជសាសន៍​នោះ បាន​ក្លាយ​ជា​រឿង​កាល​ពី​៣០​ឆ្នាំ​មុន​ទៅ​ហើយ៕​
XS
SM
MD
LG