គេឃើញមានការអំពាវនាវកាន់តែច្រើនថែមទៀតនៅថ្ងៃព្រហស្បតិ៍នេះឱ្យអ៊ីស្រាអែលទទួលខុសត្រូវចំពោះការវាយប្រហារតាមអាកាសរបស់ខ្លួនលើក្បួនរថយន្តនៅក្នុងតំបន់ហ្កាហ្សា (Gaza) ដែលបានសម្លាប់បុគ្គលិកជំនួយអង្គការ World Central Kitchen ៧ នាក់។
ប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្ត្រីអ៊ីស្រាអែលលោក Benjamin Netanyahu ត្រូវគេរំពឹងថានឹងសន្ទនាគ្នាតាមទូរស័ព្ទដំបូងបង្អស់នៅថ្ងៃព្រហស្បតិ៍នេះតាំងពីការវាយប្រហារនោះបានកើតឡើងមក។
អ្នកនាំពាក្យក្រសួងការបរទេសសហរដ្ឋអាមេរិកលោក Matthew Miller បានប្រាប់អ្នកកាសែតកាលពីថ្ងៃពុធថា អ៊ីស្រាអែលចាំបាច់ត្រូវមានវិធានការប្រសើរជាងមុនដើម្បីការពារបុគ្គលិកមនុស្សធម៌និងជនស៊ីវិល។
អង្គការ World Central Kitchen បានបញ្ជាក់នៅថ្ងៃព្រហស្បតិ៍នេះថា ខ្លួនបានស្នើប្រទេសអូស្ត្រាលី ចក្រភពអង់គ្លេស កាណាដា ប៉ូឡូញ និងសហរដ្ឋអាមេរិកឱ្យទាមទារនូវ «ការស៊ើបអង្កេតដ៏ឯករាជ្យរបស់ភាគីទីបីលើការវាយប្រហារទាំងនេះ ដែលក្នុងនោះរួមទាំងថាតើការវាយប្រហារទាំងនេះត្រូវបានធ្វើឡើងដោយចេតនាឬក៏រំលោភលើច្បាប់អន្តរជាតិឬក៏អត់»។
អ្នកដែលត្រូវបានសម្លាប់នៅក្នុងការវាយប្រហារកាលពីថ្ងៃចន្ទនោះគឺមានជនជាតិប៉ាឡេស្ទីនម្នាក់ ចក្រភពអង់គ្លេស ៣ នាក់ ប៉ូឡូញម្នាក់ អូស្ត្រាលីម្នាក់ និងម្នាក់ទៀតមានសញ្ជាតិពីរគឺកាណាដានិងអាមេរិក។
នាយករដ្ឋមន្ត្រីអូស្ត្រាលីលោក Anthony Albanese បានប្រាប់អ្នកកាសែតនៅថ្ងៃព្រហស្បតិ៍នេះថា ការឆ្លើយតបរបស់អ៊ីស្រាអែលគឺមិនទាន់គ្រប់គ្រាន់ទេ «ដែលក្នុងនោះរួមទាំងការលើកឡើងថានេះគឺជាលទ្ធផលនៃសង្គ្រាមផងដែរ»។
នាយករដ្ឋមន្ត្រីប៉ូឡូញលោក Donald Tusk បានបញ្ជាក់ក្នុងសន្និសីទកាសែតនៅថ្ងៃព្រហស្បតិ៍នេះថា ប៉ូឡូញរំពឹងថានឹងទទួលបានការពន្យល់អំពីអ្វីដែលបានកើតឡើងក៏ដូចជាសំណងសម្រាប់ក្រុមគ្រួសារជនរងគ្រោះផងដែរ។
ក្រសួងការពារជាតិអាមេរិកបានលើកឡើងថា រដ្ឋមន្ត្រីការពារជាតិអាមេរិកលោក Lloyd Austin «បានបង្ហាញកំហឹងរបស់លោកលើការវាយប្រហាររបស់អ៊ីស្រាអែល» ក្នុងអំឡុងការសន្ទនាតាមទូរស័ព្ទកាលពីថ្ងៃពុធជាមួយនឹងរដ្ឋមន្ត្រីការពារជាតិអ៊ីស្រាអែលលោក Yoav Gallant៕
ព័ត៌មានខ្លះនៅក្នុងសេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន Reuters និងទីភ្នាក់ងារសារព័ត៌មាន AFP។
