ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋាភិបាល​ភូមា​ធ្វើ​ទំនាក់​ទំនង​ជាមួយ​ក្រុម​អ្នក​រិះគន់


លោក​ស្រី​ អ៊ោង​ សាន​ស៊ូជី​ (Aung​ San​ Suu Kyi)​ មេដឹកនាំ​គណបក្ស​ប្រឆាំង​ប្រទេស​ភូមា​ ថតរូបជាមួយ​​ប្រធានាធិបតី​ភូមា​លោក ថេន​ សេន​ (Thein​ Sein)​ នៅ​មុន​ពេល​ប្រជុំ​នៅក្នុង​ការិយាល័យ​ប្រធានាធិបតី​ នៅរដ្ឋធានី​ ណាយ​ពីយីដរ​ ​(Naypyidaw) នៅ​ថ្ងៃទី​១៩​ខែ​សីហា ​ឆ
លោក​ស្រី​ អ៊ោង​ សាន​ស៊ូជី​ (Aung​ San​ Suu Kyi)​ មេដឹកនាំ​គណបក្ស​ប្រឆាំង​ប្រទេស​ភូមា​ ថតរូបជាមួយ​​ប្រធានាធិបតី​ភូមា​លោក ថេន​ សេន​ (Thein​ Sein)​ នៅ​មុន​ពេល​ប្រជុំ​នៅក្នុង​ការិយាល័យ​ប្រធានាធិបតី​ នៅរដ្ឋធានី​ ណាយ​ពីយីដរ​ ​(Naypyidaw) នៅ​ថ្ងៃទី​១៩​ខែ​សីហា ​ឆ

លោក​ស្រី​ អ៊ោង​ សាន​ស៊ូជី​ (Aung​ San​ Suu Kyi)​ មេដឹកនាំ​គណបក្ស​ប្រឆាំង​របស់​ប្រទេស​ភូមា​ មាន​ប្រសាសន៍​ថា​ លោក​ស្រី​បាន​ជួប​ប្រជុំ​ជា​លើក​ដំបូង​ប្រកប​ដោយ​ភាព​វិជ្ជមាន​ជាមួយ​លោក​ប្រធានាធិបតី​ ថេន​ សេន​ (Thein​ Sein)​ កាល​ពី​សប្តាហ៍​មុន។​ កិច្ច​ប្រជុំ​នេះ​ជា​ការ​ផ្តួច​ផ្តើម​គំនិត​មួយ​ក្នុង​ចំណោម​ការ​ផ្តួច​ផ្តើម​គំនិត​មួយ​ចំនួន​ ដែល​រដ្ឋាភិបាល​ភូមា​កំពុង​អនុវត្ត​ដើម្បី​ធ្វើ​ទំនាក់​ទំនង​ជាមួយ​ក្រុម​អ្នក​រិះគន់​របស់​ខ្លួន។​ ខណៈ​ដែល​សហគមន៍​អន្តរជាតិ​បាន​ស្វាគមន៍​ការ​ទាក់​ទង​នេះ​ នៅ​មាន​ការ​មន្ទិល​សង្ស័យ​ថា​តើ​រដ្ឋាភិបាល​នឹង​ធ្វើ​សកម្មភាព​ដ៏​មាន​សារៈសំខាន់​បន្ត​ពី​ទៀត​ឬ​ដូច​ម្តេច។

លោក​ស្រី​ អ៊ោង​ សាន​ស៊ូជី បាន​ជួប​ជាមួយ​ក្រុម​អ្នក​គាំទ្រ​នៃ​គណបក្ស​សម្ព័ន្ធ​ជាតិ​ដើម្បី​លទ្ធិ​ប្រជាធិបតេយ្យ​ ឬ​ហៅ​ជា​ភាសា​អង់គ្លេស​ថា​ National​ League​ for​ Democracy​ ដើម្បី​ពិភាក្សា​អំពី​កិច្ច​សន្ទនា​របស់​លោក​ស្រី​ជាមួយ​ក្រុម​មន្ត្រី​នៅ​ឯ​រដ្ឋធានី​ ណាយ​ពីយីដរ​ (Naypyidaw)។

ខណៈ​ដែល​លោក​ស្រី​ ស៊ូជី​ បាន​ចេញ​ផ្សាយ​ព័ត៌មាន​លម្អិត​សំខាន់ៗ​តែ​បន្តិច​បន្តួច​ស្តីពី​កិច្ច​សន្ទនា​របស់​លោ​ក​ស្រី​ លោក​ស្រី​បាន​និយាយ​ថា​ការ​ជួប​ប្រជុំ​ជាមួយ​លោក​ប្រធានាធិបតី​គឺ​ជា​ឪកាស​សម្រាប់​ទាំង​សង​ខាង​ដើម្បី​បម្រើ​ផល​ប្រយោជន៍​រួម​របស់​ប្រជាពលរដ្ឋ​ភូមា​ ដោយ​ទុក​ការ​ខ្វែង​គំនិត​គ្នា​មួយ​ឡែក​សិន​។

លោក​ស្រី​បាន​ថ្លែង​ទៀត​ថា​ ភាគី​ទាំង​ពីរ​បាន​ពិភាក្សា​គ្នា​ប្រកប​ដោយ​ភាព​វិជ្ជមាន​ ដែល​មាន​ភាព​ស្មោះត្រង់​និង​ឥត​លាក់​លៀម។​ ប្រព័ន្ធ​ផ្សព្វផ្សាយ​របស់​រដ្ឋ​នៅ​ប្រទេស​ភូមា​បាន​ឲ្យ​ដឹង​ថា​ ភាគី​ទាំងពីរ​បាន​ព្យាយាម​ស្វែង​រក​មូល​ដ្ឋាន​រួម​មួយ​សម្រាប់​ធ្វើ​សហការ។

ប៉ុន្តែ​ក្រុម​គាំពារ​មតិ​ខាង​សិទ្ធិ​មនុស្ស​នៅ​ក្នុង​ប្រទេស​ថៃ​នៅ​តែ​មាន​ភាព​មន្ទិល​សង្ស័យ។​ លោក​ បូ ជី​ (Bo Kyi)​ លេខាធិការ​រួម​របស់​ក្រុម​គាំពារ​មតិ​អ្នក​ទោស​ ដែល​មាន​ឈ្មោះ​ថា ​សមាគម​ជួយ​ឧបត្ថម​អ្នក​ទោស​នយោបាយ​នៅ​ភូមា​ (Assistance​ Association​ for​ Political​ Prisoners​ Burma)​ ថ្លែង​ថា​ សញ្ញា​ដ៏​សំខាន់​សម្រាប់​ភាព​ជឿន​លឿន​ទៅ​មុខ​នោះ​គឺ​ការ​ដោះ​លែង​ជន​ដែល​ក្រុម​សិទ្ធិ​មនុស្ស​បាន​ប៉ាន់​ស្មាន​ថា​ជា​អ្នក​ទោស​នយោបាយ​ចំនួន​២​ពាន់​នាក់។

«គ្រាន់​តែ​ប្រជុំ​មួយ​មុខ​មិន​ទាន់​គ្រប់​គ្រាន់​ទេ។​ ខ្ញុំ​មិន​ទាន់​ឃើញ​មាន​សញ្ញា​ណា​មួយ​ស្តី​ពី​ការ​ដោះ​លែង​អ្នក​ទោស​នយោបាយ​ទាំង​អស់​ទេ។​ ហើយ​ការ​រំលោភ​សិទ្ធិ​មនុស្ស​នៅ​តែ​មាន​ភាព​រាល​ដាល​ដដែល។​ ហើយ​ជា​ការ​ពិត​ណាស់​ ការ​រំលោភ​សិទ្ធិ​មនុស្ស​កើត​មាន​ពាស​ពេញ​ផ្ទៃ​ប្រទេស​ភូមា»។

ក្រុម​អ្នក​វិភាគ​និយាយ​ថា​ កិច្ច​សន្ទនា​នេះ​កំណត់​ឲ្យ​ឃើញ​ពី​ការ​បោះ​ជំហាន​ដ៏​សំខាន់​មួយ​ឆ្ពោះ​ទៅ​រក​ការ​ផ្សះ​ផ្សា​វាង​ក្រុម​អ្នក​គាំទ្រ​លទ្ធិប្រជាធិបតេយ្យ​របស់​លោក​ស្រី​ អ៊ោង​ សាន​ស៊ូជី​ និង​រដ្ឋាភិបាល​ដែល​គាំទ្រ​ដោយ​កង​យោធា។​ រដ្ឋាភិបាល​ថ្មី​ ដែល​មាន​តែ​ឈ្មោះ​ថា​ជា​រដ្ឋាភិបាល​ស៊ីវិល​ ត្រូវ​បាន​ជ្រើស​រើស​នៅ​ក្នុង​ការ​បោះ​ឆ្នោត​ កាល​ពី​ឆ្នាំ​មុន​ ដែល​ប្រទេស​នៅ​ខាង​ក្រៅ​បាន​ពណ៌នា​ថា​ជា​រឿង​ក្លែង​ក្លាយ​ ដែល​មាន​គោល​បំណង​ដើម្បី​រក្សា​ក្រុម​យោធា​ឲ្យ​នៅ​កាន់​អំណាច​ដដែល។

អ្នក​ស្រី​ ដេប៊ី​ ស្តូហាឌ​ (Debbie​ Stohard)​ អ្នក​នាំ​ពាក្យ​របស់​ក្រុម​សិទ្ធិ​មនុស្ស​ឈ្មោះ​ បណ្តាញ​ឆ្លាស់​គ្នា​របស់​អាស៊ាន​ (Alternative​ ASEAN​ Network)​ ថ្លែង​ថា ​រដ្ឋាភិបាល​សង្ឃឹម​ថា​នឹង​ទទួល​បាន​ការ​គាំទ្រ​ពី​អន្តរជាតិ​ក្នុង​កិច្ច​ប្រឹង​ប្រែង​ដើម្បី​ធ្វើជា​អ្នក​ទទួលភ្ញៀវ​ក្នុង​កិច្ច​ប្រជុំ​របស់​ប្រទេស​សមាគម​ប្រជាជាតិ​អាស៊ី​អាគ្នេយ៍​ (Association​ of​ South​ East​ Asian​ Nations)​ នៅ​ឆ្នាំ​២០១៤​ និង​ដើម្បី​បន្ធូរ​បន្ថយ​ទណ្ឌកម្ម​ទៅ​លើ​ប្រវតិ្ត​សិទ្ធិ​មនុស្ស​របស់​ខ្លួន។

«របប​នេះ​កំពុង​ព្យាយាម​ខំ​បញ្ចេញ​ស្នេហ៍​មុខ​យ៉ាង​សកម្ម​ ដោយ​សារ​តែ​ពួក​គេ​ចង់​រារាំង​អង្គការ​សហប្រជាជាតិ​មិន​ឲ្យ​ចាប់​ផ្តើម​រៀបចំ​គណៈកម្មការ​មួយ​ស្តី​ពី​ឧក្រិដ្ឋកម្ម​សង្រ្គាម​និង​ឧក្រិដ្ឋកម្ម​ប្រឆាំង​មនុស្ស​ជាតិ​នៅ​ភូមា។​ ពួកគេ​ចង់​ធានា​ឲ្យ​បាន​ទទួល​ដំណែង​ជា​ប្រធាន​អាស៊ាន​សម្រាប់​ឆ្នាំ​២០១៤​ ហើយ​ពួក​គេ​កំពុង​ខំ​ធ្វើ​ការ​យ៉ាង​ខ្លាំង​ដើម្បី​ដក​ទណ្ឌកម្ម​សេដ្ឋកិច្ច​ចេញ»។

សមាជិក​អាស៊ាន​បាន​ជំរុញ​ឲ្យ​សហរដ្ឋ​អាមេរិក​និង​អឺរ៉ុប​ដក​ទណ្ឌកម្ម​សេដ្ឋកិច្ច​ចេញ​ពី​ភូមា​ ដោយ​និយាយ​ថា​ប្រទេស​នេះ​ធ្វើ​ឲ្យ​មាន​ភាព​រីក​ចម្រើន​ខាង​កំណែ​ទម្រង់​នយោបាយ​ក្នុង​អំឡុង​ឆ្នាំ​កន្លង​ទៅ។

ផ្នែក​មួយ​នៃ​កិច្ច​ប្រឹង​ប្រែង​ដើម្បី​វាយ​តម្លៃ​ពី​ការ​រីក​ចម្រើន​របស់​រដ្ឋាភិបាល​ថ្មី​ស្តី​ពី​កំណែ​ទម្រង់​នយោបាយ​និង​បញ្ហា​សិទ្ធិ​មនុស្ស កំពុង​កើត​មាន​ឡើង​នៅ​ក្នុង​សប្តាហ៍​នេះ​ ដោយ​មាន​ដំណើរ​ទស្សនកិច្ច​រយៈពេល​ប្រាំ​ថ្ងៃ​របស់​ លោក​ ថូម៉ាស់​ អូចេ​ គ្វីនតាណា​ (Tomas​ Ojea​ Quintana)​ បេសក​ជន​សិទ្ធិ​មនុស្ស​របស់​អង្គការ​សហប្រជាជាតិ។​ នេះ​ជា​លើក​ដំបូង​ក្នុង​រយៈពេល​១៨​ខែ ​ដែល​រដ្ឋាភិបាល​ផ្តល់​ការ​អនុញ្ញាត​ឲ្យ​លោក​ទៅ​ធ្វើ​ទស្សនកិច្ច។

លោក​គ្រោង​នឹង​ជួប​ជាមួយ​ក្រុម​មន្ត្រី​រដ្ឋាភិបាល​ ព្រម​ទាំង​លោក​ស្រី​ អ៊ោង​ សានស៊ូជី​ ផង​ដែរ។

លោក​ បូ ជី​ អ្នក​គាំពារ​មតិ​ដើម្បី​សិទ្ធិ​អ្នកទោស​ មាន​ប្រសាសន៍​ថា​ លោក​ គ្វីនតាណា​ គួរ​តែ​អំពាវនាវ​ឲ្យ​មាន​ការ​ផ្លាស់​ប្តូរ​មួយ​ចំនួន​ដើម្បី​ធ្វើ​ឲ្យ​សភាពការណ៍​សិទ្ធិ​មនុស្ស​បាន​ប្រសើរ​ឡើង​នៅ​ភូមា ដោយ​រាប់​ទាំង​ប្រព័ន្ធ​តុលាការ​ឯករាជ្យ​ជាដើម។

«គេ​ពិបាក​នឹង​មើល​ឃើញ​ថា​មាន​ការ​ផ្លាស់​ប្តូរ​ជា​វិជ្ជមាន​នៅ​ក្នុង​ដំណើរ​ទស្សនកិច្ច​របស់​លោក​ គ្វីនតាណា​លើក​នេះ។​ អ្វី​ដែល​លោក​អាច​ធ្វើ​បាន​គឺ​ ស្នើ​សុំ​ទៅ​របប​យោធា​ភូមា​ឲ្យ​ធ្វើ​កិច្ចការ​អ្វី​មួយ។​ ប្រសិន​បើ​រដ្ឋាភិបាល​ភូមា​អនុវត្ត​តាម​អនុសាសន៍​របស់​លោក​ យើង​នឹង​អាច​មើល​ឃើញ​រឿង​វិជ្ជមាន​ខ្លះៗ​ ជា​ពិសេស​លោក​ គ្វីនតាណា​ នឹង​ធ្វើ​ការ​ស្នើ​សុំ​ឲ្យ​របប​ភូមា​ដោះ​លែង​អ្នក​ទោស​នយោបាយ​ទាំង​អស់​ដើម្បី​ផ្លាស់​ប្តូរ​ប្រព័ន្ធ​តុលាការ​ ដោយ​សារ​តែ​គ្មាន​ប្រព័ន្ធ​តុលាការ​ឯករាជ្យ​នៅ​ភូមា​ទេ»។

លោក​ គ្វីនតាណា​ ត្រូវ​បាន​រំពឹង​ថា​ នឹង​ធ្វើ​ការ​កត់​សំគាល់​បឋម​របស់​លោក​នៅ​ឯ​សន្និសីទ​សារព័ត៌មាន​មួយ​នៅ​ថ្ងៃ​ព្រហស្បតិ៍​ក្នុង​ទី​ក្រុង​រ៉ង់ហ្គោន​ (Rangoon)៕

ប្រែសម្រួល​ដោយ​ លី សុខ​ឃាង

XS
SM
MD
LG