ទីតាំងសាលាក្តីខ្មែរក្រហមដែលត្រូវបានប្រើប្រាស់សម្រាប់ការងារកាត់ក្តីអតីតមេដឹកនាំខ្មែរក្រហមក្នុងរយៈពេលប្រមាណ ១៦ ឆ្នាំមកហើយនោះ ត្រូវបានផ្ទេរមកនៅក្រោមការគ្រប់គ្រងរបស់បញ្ជាការដ្ឋានកងទ័ពជើងគោកវិញ។ ប៉ុន្តែលោក ខៀវ សំផន អាយុ ៩១ ឆ្នាំ អតីតប្រមុខរដ្ឋនៃរបបកម្ពុជាប្រជាធិបតេយ្យដែលនៅរស់រានមានជីវិត នៅបន្តស្នាក់នៅមន្ទីរឃុំឃាំងនៅសាលាក្តីខ្មែរក្រហម ដោយរង់ចាំការផ្ទេរទៅពន្ធនាគារខេត្តកណ្តាល។
ពិធីផ្ទេរ-ទទួលទីតាំងអតីតសាលាក្តីខ្មែរក្រហម ដែលស្ថិតនៅតាមបណ្តោយផ្លូវជាតិលេខ ៤ ក្នុងសង្កាត់ចោមចៅ ខណ្ឌពោធិ៍សែនជ័យ ត្រូវបានធ្វើឡើង កាលពីថ្ងៃពុធ ទី ២៨ ខែធ្នូ ឆ្នាំ ២០២២ ក្រោមអធិបតីភាពរបស់លោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ។
លោក ហ៊ុន ម៉ាណែត បានថ្លែងក្នុងពិធីនោះថា ការផ្ទេរ-ទទួលអគារគឺជាសក្ខីភាពនៃការបិទបញ្ចប់ទាំងស្រុងនៃដំណើរការរបស់សាលាក្តីខ្មែរក្រហម ដោយប្រែក្លាយពីទីកន្លែងផ្តល់យុត្តិធម៌ទៅជាទីកន្លែងសម្រាប់បន្តការងារការពារជាតិវិញ បន្ទាប់ពីរាជរដ្ឋាភិបាលបានប្រគល់មួយផ្នែកនៃទីតាំងយោធានេះសម្រាប់បម្រើឱ្យដំណើរការកាត់ក្តីខ្មែរក្រហម ចាប់តាំងពីឆ្នាំ ២០០៦ មក។
លោក នេត្រ ភក្រ្តា អ្នកនាំពាក្យរបស់សាលាក្តីខ្មែរក្រហម ប្រាប់វីអូអេនៅថ្ងៃព្រហស្បតិ៍នេះថា សាលាក្តីខ្មែរក្រហមនៅមានការងារសេសសល់ដែលត្រូវអនុវត្តក្នុងរយៈពេល ៣ ឆ្នាំខាងមុខទៀត គឺចាប់ពីឆ្នាំ ២០២៣ ដល់ឆ្នាំ ២០២៥ ដែលការងារទាំងនោះ រួមមានការគ្រប់គ្រង និងការផ្សព្វផ្សាយបណ្ណសារស្តីពីសំណុំរឿងរបស់សាលាក្តីនេះឱ្យបានទូលំទូលាយ និងការអប់រំ និងការផ្សព្វផ្សាយស្តីពីសមិទ្ធផល និងកេរដំណែលរបស់សាលាក្តី និងការពិនិត្យតាមដានការអនុវត្តសំណង ដែលមានលក្ខណៈផ្លូវចិត្ត និងសមូហភាពដល់ដើមបណ្តឹងរដ្ឋប្បវេណី។
កាលពីខែកញ្ញា ឆ្នាំ ២០២២ អង្គជំនុំជម្រះនៃតុលាការកំពូលសាលាក្តីខ្មែរក្រហម បានប្រកាសរក្សាសាលក្រមរបស់សាលាដំបូង ដោយផ្ដន្ទាទោសដាក់ពន្ធនាគារអស់មួយជីវិតលើលោក ខៀវ សំផន។ នេះជាសេចក្តីសម្រេចចុងក្រោយលើអតីតមេដឹកនាំខ្មែរក្រហមតែម្នាក់គត់ ដែលនៅរស់រានមានជីវិត និងជាការឈានទៅដល់ការបិទបញ្ចប់នៃដំណើរការកាត់ទោសមេដឹកនាំខ្មែរក្រហមជាន់ខ្ពស់ ដែលបានដំណើរការក្នុងរយៈពេលប្រមាណ ១៦ ឆ្នាំ។
ដោយសារលោក ខៀវ សំផន មានភាពចាស់ជរា និងសុខភាពទ្រុឌទ្រោមខ្លាំង មេធាវីរបស់លោកបានស្នើសុំកន្លែងដាច់ដោយឡែក និងមានអ្នកមើលថែរូបលោកនៅពន្ធនាគារខេត្តកណ្តាល។
លោក នេត្រ ភក្រ្តា អ្នកនាំពាក្យរបស់សាលាក្តីខ្មែរក្រហម បញ្ជាក់ថា៖ «សំណើនេះស្ថិតក្នុងការពិចារណា»នៅឡើយ រហូតមកដល់ពេលនេះ៕
