ប្រធានាធិបតីប្រទេសនីហ្សេរីយ៉ាលោក Muhammadu Buhari បានវិលត្រឡប់មកកាន់ប្រទេសវិញហើយក្រោយចំណាយពេលស្នាក់នៅបន្ថែមក្នុងទីក្រុងឡុងដ៏ដើម្បីព្យាបាលជំងឺដែលគេមិនប្រាប់ឲ្យដឹងនោះ។ នេះបើតាមការឲ្យដឹងរបស់អ្នកនាំពាក្យនៅថ្ងៃសៅរ៍នេះ។
លោកប្រធានាធិបតីបានចាកចេញពីប្រទេសចាប់តាំងពីថ្ងៃទី៧ ខែឧសភាម្ល៉េះ ហើយពលរដ្ឋនីហ្សេរីយ៉ាជាច្រើនបានចាប់ផ្តើមទាមទារឲ្យលោកប្រធានាធិបតីវិលត្រឡប់មកធ្វើការវិញឬក៏ចុះចេញពីមុខតំណែង។
លោក Buhari បានចាកចេញពីប្រទេសដំបូងទៅកាន់ប្រទេសអង់គ្លេសកាលពីខែមករាដើម្បីព្យាបាលជំងឺ។ លោកបានស្នាក់នៅទីនោះអស់រយៈពេលជិត២ខែមុនពេលត្រឡប់មកកាន់ប្រទេសវិញ។ ហើយលោកចាកចេញម្តងទៀតកាលពីដើមខែឧសភា។ ក្នុងពេលចាកចេញម្តងៗលោកបានផ្ទេរអំណាចដល់លោកអនុប្រធានាធិបតី Yemi Osinbajo។
នៅដើមសប្តាហ៍នេះក្រុមបាតុករបានធ្វើការតវ៉ាក្នុងរដ្ឋធានី Abuja ដោយលើកបដាដែលគេសរសេរថា៖ «បន្តការងារឬលាឈប់»។ បាតុកម្មនេះមានការប្រឈមមុខនឹងក្រុមអ្នកគាំទ្រដែរ។ នេះបើតាមការឲ្យដឹងរបស់ប៉ូលិស៕
