អ្នកវិទ្យាសាស្ត្រអង់គ្លេសលើកឡើងថា វីរុសកូរ៉ូណាទម្រង់ថ្មី ដែលត្រូវបានគេរកឃើញជាលើកដំបូងក្នុងប្រទេសអង់គ្លេសកាលពីចុងឆ្នាំ២០២០នោះ «កំពុងឆ្លងរាលដាលក្នុងប្រទេសអង់គ្លេស» ហើយអាចនឹង «រាលដាលឆ្លងទៅក្នុងប្រទេសផ្សេងៗទៀតក្នុងពិភពលោក» ផងដែរ។
អ្នកស្រី Sharon Peacock ប្រធានទីភ្នាក់ងារស្តីពីហ្សែនជំងឺកូវីដ១៩របស់អង់គ្លេស បានប៉ាន់ស្មានយ៉ាងដូចនេះកាលពីថ្ងៃពុធ នៅក្នុងបទសម្ភាសន៍មួយជាមួយទូរទស្សន៍ BBC។
ជំងឺកូវីដ១៩ទម្រង់ថ្មីដែលមានលក្ខណៈឆ្លងខ្លាំងនោះ ត្រូវបានគេរកឃើញជាលើកដំបូងក្នុងស្រុក Kent ដែលស្ថិតនៅភាគខាងត្បូងប្រទេសអង់គ្លេស កាលពីខែកញ្ញា ឆ្នាំ២០២០ ហើយបន្ទាប់ពីនោះ ត្រូវបានគេរកឃើញជាបន្តបន្ទាប់ក្នុងប្រទេសជាង៥០ ដែលក្នុងនោះក៏មានសហរដ្ឋអាមេរិកផងដែរ។
ទីភ្នាក់ងារស្រាវជ្រាវទាក់ទងនឹងហ្សែនជំងឺកូវីដ១៩របស់អង់គ្លេស តាមដានត្រួតពិនិត្យដំណើរការផ្លាស់ប្តូរនិងការវិវត្តន៍របស់វីរុសកូរ៉ូណា។ អ្នកស្រី Peacock បញ្ជាក់ថា ការផលិតវ៉ាក់សាំងបង្ការថ្មីៗ មានប្រសិទ្ធភាពប្រឆាំងនឹងការវិវត្តន៍នៃវីរុសកូរ៉ូណា ប៉ុន្តែអ្នកស្រីព្រមានថា ក្រុមអ្នកវិទ្យាសាស្ត្រ អាចតាមដានការវិវត្តន៍បម្លែងរូបនៃវីរុសនេះបាន នៅទសវត្សរ៍ក្រោយ រហូតដល់វីរុសនេះ «ប្រែរូបភាពចេញពីភាពកាចសាហាវរបស់ខ្លួន»។
ការសិក្សាថ្មីមួយ បង្ហាញថា ថ្នាំ steroid ដែលជាទូទៅគេប្រើសម្រាប់ព្យាបាលជំងឺហឺតអាចជួយកាត់បន្ថយការព្យាបាលមនុស្សដែលឆ្លងជំងឺកូវីដ១៩ផងដែរ៕
