ការឈ្លានពានរបស់រុស្ស៊ីនៅក្នុងប្រទេសអ៊ុយក្រែនកំពុងធ្វើឲ្យមានការចំណាយធនធានយោធាក្នុងស្រុកដ៏ច្រើនលើសលុបរបស់រុស្ស៊ីនិងកំពុងធ្វើឱ្យចុះខ្សោយសមត្ថភាពរបស់ខ្លួនដើម្បីរក្សាវិស័យការពារជាតិជាមូលដ្ឋាននៅទូទាំងតំបន់ដ៏ធំល្វឹងល្វើយ។ នេះបើតាមក្រសួងការពារជាតិចក្រភពអង់គ្លេសដែលបាននិយាយនៅក្នុងរបាយការណ៍ស៊ើបការណ៍សម្ងាត់ប្រចាំថ្ងៃរបស់ខ្លួនអំពីជម្លោះនៅក្នុងប្រទេសអ៊ុយក្រែន។
ក្រសួងនោះបាននិយាយកាលពីថ្ងៃព្រហស្បតិ៍ថាការវិភាគនៃរបាយការណ៍កាលពីពេលថ្មីៗនេះអំពីការបាត់បង់ប្រព័ន្ធកាំជ្រួចមីស៊ីលវង់ប្រតិបត្តិឆ្ងាយបាញ់ពីដីទៅអាកាសSA-21ជាច្រើនចង្អុលបង្ហាញថាចំពោះរុស្ស៊ីដើម្បីបន្តការធានារ៉ាប់រងរបស់ខ្លួននៅក្នុងប្រទេសអ៊ុយក្រែន រុស្ស៊ីនឹងទំនងត្រូវការទុកប្រព័ន្ធកាំជ្រួចSAM ដោយឡែកសម្រាប់ប្រើប្រាស់ដើម្បីការពារតំបន់ឆ្ងាយៗរបស់រុស្ស៊ី។
កំជ្រួចវង់ប្រតិបត្តិការវែងSAM ដូចជាSA-21 អាចបាញ់ចំទីដៅរហូតដល់ចម្ងាយ ៤០០គីឡូម៉ែត្រ។ នេះបើតាមរបាយការណ៍ប្រចាំថ្ងៃរបស់អង់គ្លេស។ កាំជ្រួចSA-21របស់រុស្ស៊ីត្រូវដាក់នៅទូទាំងប្រទេសរុស្ស៊ី រួមមាននៅតាមបណ្តោយព្រំដែន។ ក្រសួងការពារជាតិចក្រភពអង់គ្លេសថាការដកកាំជ្រួចនេះចេញនឹងស្ទើរតែប្រាកដថាធ្វើឱ្យចុះខ្សោយទីតាំងការពារដែនអាកាសរបស់រុស្ស៊ី។
ក្រសួងការពារជាតិអង់គ្លេសបានឱ្យដឹងទៀតថាប្រសិនបើរុស្ស៊ីប្រាកដជាយកប្រព័ន្ធកាំជ្រួច SAMណាមួយចេញ គឺចំណាត់ការនេះបង្ហាញថាជម្លោះនៅក្នុងប្រទេសអ៊ុយក្រែនបន្តស្រូបយកការចំណាយយោធារបស់រុស្ស៊ីយ៉ាងច្រើន។
ក្នុងតំបន់ភាគខាងកើតប្រទេសអ៊ុយក្រែន រុស្ស៊ីកំពុងពង្រីកការវាយប្រហាររបស់ខ្លួនលើទីក្រុងAvdiika។ រុស្ស៊ីបានផ្តោតលើតំបន់Donetsk និង Luhanskចាប់តាំងពីការ ឈ្លានពានដំបូងរបស់ខ្លួននៅពេលដែលការរុញច្រានរបស់ខ្លួនចូលក្នុងរដ្ឋធានីកៀវបានបរាជ័យ។ ទីក្រុង Avdiikaជាច្រកផ្លូវទៅកាន់ទីក្រុង Donetskដែលមានចម្ងាយ ២០គីឡូម៉ែត្រភាគខាងកើតបានស្ថិតនៅក្រោមការវាយប្រហាររបស់រុស្ស៊ីចាប់តាំងពីពាក់កណ្តាលខែតុលាមក។
ប្រធានរដ្ឋបាលយោធានៅទីក្រុង Avdiikaបាននិយាយថាកងទ័ពរុស្ស៊ីបានបាញ់ផ្តក់ដាក់តំបន់នោះ ក៏ប៉ុន្តែ ទាហានថ្មើជើងរបស់ពួកគេបានត្រូវផ្អាកដោយសារដីសើមបន្ទាប់ពីភ្លៀងធ្លាក់ជាច្រើនថ្ងៃមក៕
ព័ត៌មានខ្លះនៃសេចក្តីរាយការណ៍នេះផ្តល់ដោយទីភ្នាក់ងារសារព័ត៌មាន Reuters។
