ភ្នំពេញ —
ក្នុងខណៈពេលដែលរលកកម្តៅនយោបាយក្នុងប្រទេសកម្ពុជាបានចាប់ផ្តើមកម្រើកឡើងវិញក្រោយពីបានស្ងប់ស្ងាត់អស់រយៈពេលជិតពីរខែ ប្រទេសអង់គ្លេសបានជំរុញឱ្យគណបក្សប្រជាជនកម្ពុជានិងគណបក្សសង្គ្រោះជាតិបន្តពិភាក្សាគ្នាទៀតដើម្បីដោះស្រាយវិបត្តិនយោបាយដែលបានជាប់គាំងក្រោយពីការបោះឆ្នោតកាលពីខែកក្កដាឆ្នាំ២០១៣។
លោក កុយ គួង អ្នកនាំពាក្យក្រសួងការបរទេសបានអះអាងដូចនេះប្រាប់ក្រុមអ្នកកាសែតបន្ទាប់ពីជំនួបគ្នានៅថ្ងៃសុក្រនេះរវាងលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសនិង លោក William Jesse Longhurst ឯកអគ្គរាជទូតអង់គ្លេសដែលទើបទទួលបានការតែងតាំងថ្មីប្រចាំប្រទេសកម្ពុជាថាលោកឯកអគ្គរាជទូតអង់គ្លេសស្វាគមន៍ឱ្យគណបក្សទាំងពីរបន្តជួបប្រជុំគ្នានិងជំរុញឱ្យគណបក្សសង្គ្រោះជាតិគួរតែចូលរួមប្រជុំសភាដើម្បីដោះស្រាយបញ្ហាផ្សេងៗតាមផ្លូវច្បាប់។
លោកនិយាយថា៖ «លោកស្វាគមន៍ឱ្យមានការជួបប្រជុំគ្នារវាងគណបក្សទាំងពីរហើយដោះស្រាយបញ្ហាផ្សេងៗហើយដោះស្រាយនៅតាមសភាពីព្រោះឯកឧត្តមឧបនាយករដ្ឋមន្ត្រីលោកបានបញ្ជាក់ហើយថាការកែទម្រង់ផ្សេងៗត្រូវការឱ្យមានការប្រជុំនៅឯសភា។ដូច្នេះហើយមិនអាចដោះស្រាយផ្លូវគ្រាន់តែស្រែកនោះបានទេ»។
មន្ត្រីស្ថានទូតអង់គ្លេសប្រចាំប្រទេសកម្ពុជាមិនអាចស្នើសុំដើម្បីទំនាក់ទំនងបានទេនៅពេលដែលវីអូអេបានព្យាយាមសាកសួរតាមប្រព័ន្ធសារអេឡិកត្រូនិកឬអ៊ីម៉ែលថាតើចក្រភពអង់គ្លេសបានស្នើសុំឱ្យគណបក្សទាំងពីរបន្តចរចាគ្នាដែរឬយ៉ាងណា?
មន្ត្រីគណបក្សសង្គ្រោះជាតិរួមមាន លោក សម រង្ស៊ី លោក កឹម សុខានិងមន្ត្រីគណបក្សប្រជាជនកម្ពុជាមានលោក ជាម យៀប និងលោក ឈាង វ៉ុន មិនអាចស្នើសុំដើម្បីទំនាក់ទំនងបានទេនៅថ្ងៃសុក្រនេះ។
គណបក្សសង្គ្រោះជាតិបានប្រកាសថានៅថ្ងៃអាទិត្យខាងមុខនេះនឹងដឹកនាំធ្វើសមាជមហាជនសារជាថ្មីនៅទីលានប្រជាធិបតេយ្យ។
គោលបំណងនៃការធ្វើសមាជមហាជនគឺដើម្បីបូកសរុបលទ្ធផលសេចក្តីសម្រេចមហាសមាជលើកដំបូងកាលពីថ្ងៃទី៦ខែតុលាឆ្នាំ២០១៣ និងបញ្ជាក់ពីគោលជំហរនិងលទ្ធផលនៃកិច្ចចរចារវាងគណបក្សសង្គ្រោះជាតិនិងគណបក្សប្រជាជនកម្ពុជាព្រមទាំងសុំមតិយោបល់ពីប្រជាពលរដ្ឋដើម្បីឱ្យគណបក្សសង្គ្រោះជាតិអនុវត្តន៍គោលនយោបាយបន្ត។ នេះបើតាមសេចក្តីប្រកាសព័ត៌មានរបស់គណបក្សសង្គ្រោះជាតិ។
លោកនាយករដ្ឋមន្ត្រីហ៊ុន សែនកាលពីថ្ងៃព្រហស្បតិ៍បានព្រមានដល់គណបក្សសង្គ្រោះជាតិមិនឱ្យបង្កហិង្សាដោយលោកអះអាងថាវាអាចនឹងបង្កសង្គ្រាមស៊ីវិលសារជាថ្មីទៀតនៅក្នុងប្រទេសកម្ពុជា។
រលកតានតឹងនយោបាយនៃគណបក្សគូជម្លោះទាំងពីរបានកើតមានឡើងបន្ទាប់ពីកិច្ចប្រជុំគណៈកម្មការចម្រុះត្រូវបានផ្អាកមួយរយៈដោយសារតែភាគីទាំងពីរមានចំណុចផ្ទុយគ្នាពាក់ព័ន្ធនឹងកំណែទម្រង់ការបោះឆ្នោត។
ក្រោយពីការបោះឆ្នោតជាតិកាលពីខែកក្កដាឆ្នាំ២០១៣ គណបក្សសង្គ្រោះជាតិបន្តធ្វើពហិការមិនចូលរួមប្រជុំសភានិងទាមទារឱ្យធ្វើកំណែទម្រង់គណៈកម្មការជាតិរៀបចំការបោះឆ្នោតនិងបោះឆ្នោតឡើងវិញ។ដោយសារតែគណបក្សនេះបានចោទប្រកាន់ថាស្ថាប័នបោះឆ្នោតមានភាពលម្អៀងទៅរកគណបក្សកាន់អំណាច។
កងកម្លាំងប្រដាប់អាវុធរបស់រដ្ឋាភិបាល ធ្លាប់បានបង្ក្រាបក្រុមបាតុករជាបន្តបន្ទាប់ក្រោយពីការបោះឆ្នោតខែកក្កដា។ មានមនុស្សយ៉ាងតិចចំនួន៦នាក់បានស្លាប់ និងជាច្រើននាក់ផ្សេងទៀតរងរបួសព្រមទាំងត្រូវចាប់ខ្លួនដាក់ពន្ធនាគារ៕
លោក កុយ គួង អ្នកនាំពាក្យក្រសួងការបរទេសបានអះអាងដូចនេះប្រាប់ក្រុមអ្នកកាសែតបន្ទាប់ពីជំនួបគ្នានៅថ្ងៃសុក្រនេះរវាងលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេសនិង លោក William Jesse Longhurst ឯកអគ្គរាជទូតអង់គ្លេសដែលទើបទទួលបានការតែងតាំងថ្មីប្រចាំប្រទេសកម្ពុជាថាលោកឯកអគ្គរាជទូតអង់គ្លេសស្វាគមន៍ឱ្យគណបក្សទាំងពីរបន្តជួបប្រជុំគ្នានិងជំរុញឱ្យគណបក្សសង្គ្រោះជាតិគួរតែចូលរួមប្រជុំសភាដើម្បីដោះស្រាយបញ្ហាផ្សេងៗតាមផ្លូវច្បាប់។
លោកនិយាយថា៖ «លោកស្វាគមន៍ឱ្យមានការជួបប្រជុំគ្នារវាងគណបក្សទាំងពីរហើយដោះស្រាយបញ្ហាផ្សេងៗហើយដោះស្រាយនៅតាមសភាពីព្រោះឯកឧត្តមឧបនាយករដ្ឋមន្ត្រីលោកបានបញ្ជាក់ហើយថាការកែទម្រង់ផ្សេងៗត្រូវការឱ្យមានការប្រជុំនៅឯសភា។ដូច្នេះហើយមិនអាចដោះស្រាយផ្លូវគ្រាន់តែស្រែកនោះបានទេ»។
មន្ត្រីស្ថានទូតអង់គ្លេសប្រចាំប្រទេសកម្ពុជាមិនអាចស្នើសុំដើម្បីទំនាក់ទំនងបានទេនៅពេលដែលវីអូអេបានព្យាយាមសាកសួរតាមប្រព័ន្ធសារអេឡិកត្រូនិកឬអ៊ីម៉ែលថាតើចក្រភពអង់គ្លេសបានស្នើសុំឱ្យគណបក្សទាំងពីរបន្តចរចាគ្នាដែរឬយ៉ាងណា?
មន្ត្រីគណបក្សសង្គ្រោះជាតិរួមមាន លោក សម រង្ស៊ី លោក កឹម សុខានិងមន្ត្រីគណបក្សប្រជាជនកម្ពុជាមានលោក ជាម យៀប និងលោក ឈាង វ៉ុន មិនអាចស្នើសុំដើម្បីទំនាក់ទំនងបានទេនៅថ្ងៃសុក្រនេះ។
គណបក្សសង្គ្រោះជាតិបានប្រកាសថានៅថ្ងៃអាទិត្យខាងមុខនេះនឹងដឹកនាំធ្វើសមាជមហាជនសារជាថ្មីនៅទីលានប្រជាធិបតេយ្យ។
គោលបំណងនៃការធ្វើសមាជមហាជនគឺដើម្បីបូកសរុបលទ្ធផលសេចក្តីសម្រេចមហាសមាជលើកដំបូងកាលពីថ្ងៃទី៦ខែតុលាឆ្នាំ២០១៣ និងបញ្ជាក់ពីគោលជំហរនិងលទ្ធផលនៃកិច្ចចរចារវាងគណបក្សសង្គ្រោះជាតិនិងគណបក្សប្រជាជនកម្ពុជាព្រមទាំងសុំមតិយោបល់ពីប្រជាពលរដ្ឋដើម្បីឱ្យគណបក្សសង្គ្រោះជាតិអនុវត្តន៍គោលនយោបាយបន្ត។ នេះបើតាមសេចក្តីប្រកាសព័ត៌មានរបស់គណបក្សសង្គ្រោះជាតិ។
លោកនាយករដ្ឋមន្ត្រីហ៊ុន សែនកាលពីថ្ងៃព្រហស្បតិ៍បានព្រមានដល់គណបក្សសង្គ្រោះជាតិមិនឱ្យបង្កហិង្សាដោយលោកអះអាងថាវាអាចនឹងបង្កសង្គ្រាមស៊ីវិលសារជាថ្មីទៀតនៅក្នុងប្រទេសកម្ពុជា។
រលកតានតឹងនយោបាយនៃគណបក្សគូជម្លោះទាំងពីរបានកើតមានឡើងបន្ទាប់ពីកិច្ចប្រជុំគណៈកម្មការចម្រុះត្រូវបានផ្អាកមួយរយៈដោយសារតែភាគីទាំងពីរមានចំណុចផ្ទុយគ្នាពាក់ព័ន្ធនឹងកំណែទម្រង់ការបោះឆ្នោត។
ក្រោយពីការបោះឆ្នោតជាតិកាលពីខែកក្កដាឆ្នាំ២០១៣ គណបក្សសង្គ្រោះជាតិបន្តធ្វើពហិការមិនចូលរួមប្រជុំសភានិងទាមទារឱ្យធ្វើកំណែទម្រង់គណៈកម្មការជាតិរៀបចំការបោះឆ្នោតនិងបោះឆ្នោតឡើងវិញ។ដោយសារតែគណបក្សនេះបានចោទប្រកាន់ថាស្ថាប័នបោះឆ្នោតមានភាពលម្អៀងទៅរកគណបក្សកាន់អំណាច។
កងកម្លាំងប្រដាប់អាវុធរបស់រដ្ឋាភិបាល ធ្លាប់បានបង្ក្រាបក្រុមបាតុករជាបន្តបន្ទាប់ក្រោយពីការបោះឆ្នោតខែកក្កដា។ មានមនុស្សយ៉ាងតិចចំនួន៦នាក់បានស្លាប់ និងជាច្រើននាក់ផ្សេងទៀតរងរបួសព្រមទាំងត្រូវចាប់ខ្លួនដាក់ពន្ធនាគារ៕
