ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

មូលដ្ឋាន​ទ័ព​​ចក្រ​ភព​អង់គ្លេស​ក្នុង​តំបន់​អាស៊ី​អាគ្នេយ៍ ​នឹង​​រំខាន​ប្រទេស​ចិន


រូប​ឯកសារ៖ នាវា​ HMS Albion របស់​កង​ទ័ព​ជើង​ទឹក​ចក្រ​ភព​អង់គ្លេស​ បាន​មក​ដល់​កំពង់​ផែ Harumi Pier ក្នុង​ទីក្រុង​តូក្យូ ប្រទេស​ជប៉ុន កាល​ពី​ខែ​សីហា ឆ្នាំ​២០១៨។
រូប​ឯកសារ៖ នាវា​ HMS Albion របស់​កង​ទ័ព​ជើង​ទឹក​ចក្រ​ភព​អង់គ្លេស​ បាន​មក​ដល់​កំពង់​ផែ Harumi Pier ក្នុង​ទីក្រុង​តូក្យូ ប្រទេស​ជប៉ុន កាល​ពី​ខែ​សីហា ឆ្នាំ​២០១៨។

ចក្រភព​អង់គ្លេស​ដែល​ជា​សម្ព័ន្ធ​មិត្ត​របស់​សហរដ្ឋ​អាមេរិក ​អាច​ប្រើ​​មូល​ដ្ឋាន​យោ​ធា​អាស៊ី​ដើម្បី​ឃ្លាំ​មើល​ការ​វាទ​ទី​របស់​ចិន​នៅ​ក្នុងសមុទ្រ​មាន​ជម្លោះ។

នាវា​ចំបាំង​ដ៏​ធំមួយ​របស់​ចក្រ​ភព​អង់គ្លេស​បាន​ឆ្លង​កាត់​សមុទ្រ​ចិន​ខាង​ត្បូង​កាល​ពី​ខែ​សីហា​ ឆ្នាំ​ទៅ​ហើយ​ចិន​ដែល​ជា​មហា​អំណាច​ខាង​យោធា​ដ៏​ខ្លាំង​បំផុត​មួយ​នៅ​តំបន់​អាស៊ី​ដែល​បាន​ទាម​ទារ​សមុទ្រ​នោះ​ស្ទើរ​តែ​ទាំង​អស់​នោះ ​បាន​បណ្តេញនាវា​នោះ​ចេញ​ពីដែន​ទឹក។ ឥឡូវ​នេះ ​ប្រទេស​នៅ​អឺរ៉ុប​មួយ​នេះ​ដែល​កាល​ពី​ពេល​មុនជា​ប្រទេស​អណានិគម​ដ៏​មាន​អំណាច​មួយ​នៅ​ក្នុង​ទ្វីប​អាស៊ី​ចង់​បង្កើត​ទីតាំង​យោធា​ថ្មី​មួយ​នៅ​ក្នុង​តំបន់ ​នេះ​តាម​របាយការណ៍​ព័ត៌មាន​ដែល​បាន​ដក​ស្រង់​សម្តី​របស់​រដ្ឋ​មន្រ្តីការ​ពារ​ប្រទេស​ចក្រ​ភព​អង់គ្លេស។

ទីតាំង​យោ​ធា​ចក្រ​ភព​អង់គ្លេស​នៅ​ក្នុង​តំបន់​អាស៊ី​អាគ្នេយ៍ ​ដែល​នៅ​ទី​នោះ​ប្រ​ទេស​៤​មាន​ជម្លោះ​ទាម​ទារ​ដែន​សមុទ្រ​ជាមួយ​ចិន ​នឹង​អនុញ្ញាត​ឲ្យ​នាវា​ចេញ​ចូល​កាន់​តែ​រហ័ស​ឡើង​សម្រាប់​បេសកកម្ម​ណា​មួយ​ដូចជា​បេសកកម្ម​កាល​ពី​ថ្ងៃ​ទី៣១ ​ខែ​សីហា ​ឆ្នាំ​ទៅ។

ពួក​អ្នក​ជំនាញ​ខាង​នយោបាយ​អាស៊ី ​និយាយ​ថា ​ការណ៍​នេះ ​នឹង​អនុញ្ញាត​ឲ្យ​ចក្រ​ភព​អង់គ្លេស​ប្រឆាំង​នឹងឥទ្ធិពល​របស់​ចិន​ ហើយ​នឹង​អនុញ្ញាត​ឲ្យ​ចិន​ប្រឆាំង​នឹង​ឥទ្ធិពល​របស់​អង់គ្លេស​វិញ​នៅ​ក្នុង​សមុទ្រ​ដែល​សម្បូរ​ទៅ​ដោយប្រភពធន​ធាន​ដោយ​ការ​ជួយ​នាវា​អង់គ្លេស​ឲ្យ​ចូល​រួម​ជាមួយ​នាវា​សម្ព័ន្ធមិត្ត​អាមេរិកាំង​សម្រាប់​ការ​ធ្វើ​សមយុទ្ធ​ម្តងៗ។ ពួក​អ្នក​ជំនាញ​ខាង​នយោបាយនិយាយ​ទៀត​ថា ​អង់គ្លេស​តែ​ម្នាក់​ឯង​ខ្វះ​ខាត​ប្រាក់​កាសហើយ​ត្រូវ​តែ​មាន​ទំនាក់​ទំនង​ជាមួយ​អតីត​អណានិគម​របស់​ខ្លួន​នៅ​ក្នុង​តំបន់​អាស៊ី​អាគ្នេយ៍។

​លោក​ Eduardo Araral​ ជា​សាស្រ្តា​ចារ្យ​ជំនួយ​នៅ​ឯ​សាលា​គោល​នយោបាយ​សា​ធារ​ណៈ​របស់​សាកល​វិទ្យាល័យ​ជាតិ​នៃ​ប្រទេស​សិង្ហបុរីនិយាយ​ថា៖ «អង់គ្លេស នឹងត្រូវ​ចូល​រួម​ជាមួយ​សហរដ្ឋ​អាមេរិក។ បើ​ពុំ​ដូច្នេះ​ទេ ​វា​ជាការអត់​ប្រ​យោជន៍។ ពួកគេនឹង​ចូល​រួម​ជាមួយ​សហរដ្ឋ​អាមេរិក​នៅ​ក្នុង​អ្វី​ដែល​ហៅ​ថា ​សេរីភាព​នៃ​កិច្ច​ប្រតិបត្តិការ​នៃ​ការ​ធ្វើ​នាវា​ចរណ៍»។

លោក ​Gavin Williamson ​រដ្ឋមន្រ្តីការ​ពារ​ប្រទេស ​បាន​ប្រាប់​បណ្តាញ​ផ្សាយ​ព័ត៌មានអង់គ្លេស​ The Telegraph ​កាល​ពី​ខែ​ធ្នូ​ ឆ្នាំ​ទៅ​ថា ប្រទេស​របស់​លោក​បាន​ស្វែង​រកទីតាំង​យោ​ធា​ថ្មី​មួយ​នៅ​តំបន់​អាស៊ី​អាគ្នេយ៍។

ប្រទេស​ព្រុយណេ​ ហ្វីលីពីន ​កោះ​តៃ​វ៉ាន់​និង​ប្រទេស​វៀត​ណាម ​បាន​ប្រកួត​ប្រ​ជែង​ក្នុង​ការទាម​ទារ​អធិបតេយ្យ​ភាព​ដែន​សមុទ្រ​ជាមួយ​ចិន​ ប៉ុន្តែ ​បាន​បន្ត​ចាញ់​ប្រៀប​ចាប់​តាំង​ពី​ឆ្នាំ​២០១០​មក ​នៅ​ពេល​ដែល​រដ្ឋាភិបាល​ក្រុង​ប៉េកាំង​ប្រើ​អត្ថៈ​ប្រយោជន៍​ខាង​បច្ចេក​វិទ្យា​និង​សេដ្ឋ​កិច្ច​ដើម្បី​ពង្រីក​ការ​វាត​ទី​នៅ​សមុទ្រ។ ចិន​បានចាក់​ដីពង្រីក​កោះ​តូចៗ ​ដែល​កោះ​ខ្លះបាន​ត្រូវ​ប្រើ​សម្រាប់​គោល​បំណង​ខាង​យោធា។

ចិន​បាន​ទាម​ទារសមុទ្រ​ប្រហែល​៩០​ភាគរយ​ដែល​លាត​សន្ធឹង​ពី​កោះ​ហុងកុង​ដល់​កោះ Borneo ​ដែល​មានទំហំ​៣​លាន​៥​សែន​គីឡូម៉ែត្រ​ការ៉េ។ ចិន​និង​គូ​ប្រកួត​ប្រជែង​ឯ​ទៀត​ក្នុង​តំបន់​អាស៊ី​ចាត់​ទុក​សមុទ្រ​នោះ​សម្បូរ​ត្រី​និង​អណ្តូង​ប្រេង។ រដ្ឋាភិបាល​អង់គ្លេស ​មិន​បាន​ទាមទារ​សមុទ្រ​នោះ​ទេ។

រដ្ឋាភិបាល​ក្រុង​វ៉ាស៊ីនតោន ​ជា​ទូទៅ ​បាន​បញ្ជូន​នាវា​ទៅ​កាន់​សមុទ្រ​នោះ​ដើម្បីដាក់​ការ​គាប​សង្កត់លើ​ប្រទេស​ចិន។ រដ្ឋាភិបាល​ក្រុង​វ៉ាស៊ីនតោន ​ហៅ​បេសកកម្ម​នេះ​ថា​«ជាសេរីភាព​នៃកិច្ច​ប្រតិបត្តិ​នាវាចរណ៍»។ នៅ​ដើម​ខែមករា​នេះ ​នាវា​ចំបាំង​សហរដ្ឋ​អាមេរិក បាន​ឆ្លង​កាត់ផ្ទៃ​ទឹក​ទល់​មុខ​ប្រជុំ​កោះ​ Paracelរបស់​សមុទ្រ​នោះ ​ដែល​ចិន​ត្រួតត្រា ​ថ្វីបើ​មាន​ការទាម​ទារ​ពី​ប្រទេស​វៀត​ណាម​ក៏ដោយ។

​អ្នក​សិក្សា​ស្រាវ​ជ្រាវ​បាន​និយាយ​ថា ប្រទេស​ជប៉ុន​និង​អូស្រ្តាលី ​បាន​បញ្ជូន​នាវា​ផ្ទាល់​របស់​ខ្លួនដើម្បី​បញ្ឈប់​ចិន ​តែមិន​សូវ​ញឹក​ញាប់​ទេ។ ចក្រភព​អង់គ្លេស ​នឹង​ធ្វើ​ឲ្យ​ចិន​ខឹង​សម្បារ ប្រសិន​បើ ខ្លួន​ធ្វើ​ដូច​គ្នា​នោះ​ដែរ។

លោក ​Oh Ei Sun ​អ្នក​សិក្សា​ស្រាវជ្រាវ​ជាន់​ខ្ពស់​នៅ​វិទ្យា​ស្ថាន​កិច្ចការ​អន្តរជាតិក្នុង​ប្រទេស​សិង្ហបុរី​ បាន​និយាយ​ថា «ចិន​ពិតជា​ជំទាស់​ប្រឆាំង​យ៉ាង​ខ្លាំង ​ក៏ប៉ុន្តែ ​ខ្ញុំ​គិតថា ​សម្រាប់​ប្រទេស​ផ្សេង​ៗ​ទៀត​នៅ​តំបន់​អាស៊ី​អាគ្នេយ៍ ​ការណ៍​នេះមិនមែន​ជារឿង​ថ្មី​ទេ»។

​កាល​ពី​ខែ​កញ្ញា ​ឆ្នាំ​ទៅ ​រដ្ឋាភិបាល​ក្រុង​ប៉េកាំងបាន​ចាត់​ទុក​នាវាHMS Albion ​របស់​ចក្រភព​អង់គ្លេស​ថា​ បាន​រំលោភ​ចូល​ក្នុង​អធិបតេយ្យ​ភាព​របស់​ចិន។​បណ្តាញ Gbtimes.comដែល​កាន់​កាប់​ដោយ​រដ្ឋ​ចិន ​បាន​រាយការណ៍ ដោយ​ដក​ស្រង់​សម្តី​លោកស្រី Hua Chunying ​អ្នកនាំ​ពាក្យ​ក្រសួងការ​បរទេស​ចិន​មក​ចុះ​ផ្សាយ​ថា​ ​នាវា​នោះ​បាន​ចូល​ក្នុងដែន​សមុទ្រ​របស់​ចិន​ដោយ​មិនមានការ​យល់​ព្រមពីរដ្ឋាភិបាល​ចិន។

លោកOh ​និយាយ​ទៀត​ថា ចក្រ​ភព​អង់គ្លេស ​ប្រហែល​ខ្វះ​ថវិកា​សម្រាប់​កិច្ច​ផ្តួច​ផ្តើម​ដ៏​សំ​ខាន់​នៅ​សមុទ្រ​ចិន​ខាង​ត្បូង។​លោក​បាន​និយាយ​ទៀត​ថា​ «ខ្ញុំ​គិតថា ​យើង​ត្រូវ​តែ​មានទស្សនៈ​ប្រាកដ​និយម​អំពី​រឿង​នេះ។កងនាវាអង់​គ្លេស​មិន​ដូច​ក្នុង​អំឡុង​នៃ​អាណា​ចក្រ​អង់គ្លេស​ទេ»។

លោក Carl Thayer ​សាស្រ្តាចារ្យ​នៅឯ​សាកល​វិទ្យា​ល័យNew South Wales ​ក្នុង​ទីក្រុង Canberra ​នៃ​ប្រទេស​អូស្រ្តាលី​ ​និយាយថា អង់គ្លេស ​អាច​កំពុង​រៀប​ចំ​ផែនការ​ដើម្បី​បង្កើត​ទីតាំង​យោធា​ដើម្បី​ពង្រីកយុទ្ធ​សាស្រ្ត​និង​សេដ្ឋ​កិច្ច​នៅ​តំបន់​អាស៊ី «​ជា​តួឯក​ឯករាជ្យ»បន្ទាប់​ពីការ​ចាក​ចេញ​ពី​សហភាព​អឺរ៉ុប។

លោកThayerនិយាយ​ទៀត​ថា ​នៅ​ឆ្នាំ​២០១៦ លោកស្រីTheresa May នាយក​រដ្ឋ​មន្រ្តី​ចក្រ​ភព​អង់គ្លេស​និងអតីត​រដ្ឋ​មន្រ្តីការ​បរទេស ​«បាន​ចាប់​ផ្តើម​បំផុស​គំនិត​សាកល របស់​អង់គ្លេស​ក្នុង​សករាជក្រោយ​ពីការ​ចាក​ចេញ​ពី​សហភាព​អឺរ៉ុប»។

ប្រទេស​នានា​នៅ​តំបន់​អាស៊ី​អាគ្នេយ៍ ​ប្រហែលជាពិបាកទទួល​យក​ទីតាំង​យោ​ធា​របស់​អង់គ្លេស​នេះ។

កាសែត ​Telegraph​ បាន​ប្រាប់​ឲ្យ​ដឹង​ថា ចក្រភព​អង់គ្លេស ​មើល​ឃើញ​ប្រទេស​សិង្ហបុរី​និង​ប៊ុ្រយណេ​ជា​បេក្ខជន​សម្រាប់ទីតាំង​យោធា​នេះ។

អ្នក​សិក្សា​ស្រាវជ្រាវ​ជាន់​ខ្ពស់ ​និយាយ​ថា ពួក​មេដឹកនាំ​តំបន់​អាស៊ី​អាគ្នេយ៍ ​នឹង​ព្រួយ​បារម្ភ​ថា ការ​អនុញ្ញាត​ឲ្យ​មាន​ទីតាំង​យោធា​នោះ​ធ្វើ​ឲ្យ​នឹក​ឃើញ​ឡើង​វិញ​ពី​អាណានិ​គម​និយម​ឬ​ការ​ត្រួតត្រាផ្សេង​ទៀត​របស់​បរទេស។ ប្រទេស​ព្រុយណេ ​ម៉ាឡេស៊ី​ មីយ៉ាន់​ម៉ា​និង​ប្រទេស​សិង្ហបុរី ​ជា​អតីត​អណានិគម​អង់គ្លេសក្នុង​តំបន់​អាស៊ី​អា គ្នេយ៍។

លោក​ Collin Koh​ ជាអ្នក​ស្រាវ​ជ្រាវ​ជាន់​ខ្ពស់​ខាងសន្តិសុខ​សមុទ្រ​នៅ​សាកល​វិទ្យា​ល័យបច្ចេក​វិទ្យា ​Nanyang​ ក្នុង​ប្រទេស​សិង្ហបុរី​បាន​និយាយថា៖ «ជានិច្ចកាល​ មានហេតុផលក្នុង​ស្រុករបស់​ប្រទេស​ដែល​ទទួល​មូលដ្ឋាន​យោធា​នោះ»។

លោក​បាន​និយាយ​ទៀត​ថា៖ «ឧទាហរណ៍ ជាទូទៅ ការណ៍​នេះ​ នឹង​មានផល​ប៉ះ​ពាល់​មិនល្អ​ដល់​អធិបតេយ្យ​ភាព ​ហើយ​ជាការពិត ​ពលរដ្ឋ ​នឹង​ចាប់​ផ្តើមសួរ​ថា​តើ​រដ្ឋាភិបាល​នឹង​អនុញ្ញាត​ឲ្យ​មានបរទេស​ធ្វើ​វិទ្ធង្សនា​គោលនយោ​បាយ​ការបរទេស​របស់​យើង​ដែរ​ឬទេ»។

លោក​និយាយ​បន្ថែម​ទៀត​ថា ប្រទេស​នានា​ដូចជា ប៊្រុយណេ​ ក៏ត្រូវ​គិត​ពី​ចំណង​ទាក់​ទងដ៏​សំខាន់​ដែល​កំពុង​រីកកាន់​តែធំ​ឡើង​ខាង​សេដ្ឋ​កិច្ច​ជាមួយ​ចិន ​មុន​ពេល​ធ្វើ​កិច្ច​ព្រម​ព្រៀង​ខាង​យោ​ធា​ដែល​ជំទាស់​ប្រឆាំង​ដោយ​រដ្ឋាភិបាល​ក្រុង​ប៉េកាំង​នោះ។

ចក្រភព​អង់គ្លេស​ឥឡូវនេះ​ មាន​ទីតាំង​ភស្តភា​នៅឯ​ទីតាំង​នាវាSembawang ក្នុង​ប្រទេស​សិង្ហបុរី។

នៅ​កោះ​តៃវ៉ាន់ ​លោកស្រី​ប្រធានា​ធិបតី Tsai – Ing-wenបាន​បង្ហាញ​នូវការ​គាំទ្រ​កាល​ពី​ថ្ងៃ​សៅរ៍​ដល់​វត្ត​មាន​របស់​អង់គ្លេស​នៅ​ជិត​សមុទ្រ​ចិន​ខាង​ត្បូង។ កោះ​តៃ​វ៉ាន់ ​បាន​ទាម​ទារ​សមុទ្រ​ទាំង​មូល ​ក៏ប៉ុន្តែ កាន់​កាប់​កោះតូច​ៗ​ចំនួន​តែ២​ប៉ុណ្ណោះ​ក្នុង​ចំណោម​កោះ​តូច​ៗរាប់​រយ​ដែល​មាន​ជម្លោះ។ ​កោះ​តៃវ៉ាន់ ​មាន​បញ្ហា​ទឹក​ដី​របស់​ខ្លួន​ផ្ទាល់​ជាមួយ​ចិន​ហើយ​លោកស្រី​ប្រធានា​ធិបតី ​Tsai​ បាន​សុំ​ឲ្យ​ប្រទេស​ផ្សេង​ៗ​ទៀត​ជួយ​ទប់​ទល់​នឹង​ចិន។

លោក​ស្រី​ប្រធានា​ធិបតីតៃ​វ៉ាន់ ​បាន​ប្រាប់​ពួក​អ្នក​យក​ព័ត៌មាន​កាល​ពី​សប្តាហ៍​មុនថា៖ «យើង​គោរព​ប្រទេស​ណា​ដែល​អនុវត្តនូវ​សិទ្ធិ​នៃ​សេរីភាព​នៃ​ការ​ធ្វើ​នាវាចរណ៍​នៅ​ក្នុង​ប្រទេស​សមុទ្រ​ចិនខាង​ត្បូង ​ហើយ​យើង យកចិត្ត​ទុកដាក់បញ្ហាទាំង​នេះ​ដរាបណា វា ជួយ​ថែរក្សា​សន្តិភាព​នៅ​ក្នុង​តំបន់​នោះ»៕

ប្រែ​សម្រួល​ដោយជឹង ប៉ូជីន

XS
SM
MD
LG