ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

ព្រឹទ្ធសភា​អាមេរិក​រំពឹង​ថា​នឹង​បោះឆ្នោត​សម្រេច​លើ​ការ​តែងតាំង​បេក្ខជន​ចៅក្រម​តុលាការ​កំពូល​នៅ​សប្តាហ៍​នេះ


លោកស្រី​ចៅក្រម​ Ketanji Brown Jackson ថ្លែង​ក្នុង​អំឡុង​​សវនាការ​សម្រេច​អំពី​បេក្ខភាព​របស់​លោកស្រី​នៅ​រដ្ឋធានី​វ៉ាស៊ីនតោន កាល​ពី​ថ្ងៃ​ទី​២១ ខែ​មីនា ឆ្នាំ​២០២២។

​លោកស្រី​ចៅក្រម​ Ketanji Brown Jackson កាន់តែ​ខិតជិត​ដល់​ការ​ក្លាយខ្លួន​ជា​ចៅក្រម​តុលាការ​កំពូល​របស់​សហរដ្ឋ​អាមេរិក​កាល​ពី​ថ្ងៃចន្ទ នៅ​ពេល​ដែល​គណៈកម្មាធិការ​សភា​សំខាន់​មួយ​ បាន​បញ្ជូន​ការតែងតាំង​លោកស្រី​ទៅ​ឲ្យ​ព្រឹទ្ធសភា​អាមេរិក​ទាំងមូល បោះឆ្នោត​នៅ​សប្តាហ៍​នេះ។

បេក្ខជន​ដែល​លោក​ប្រធានាធិបតី​សហរដ្ឋ​អាមេរិក Joe Biden បាន​តែងតាំង​ឲ្យ​កាន់​តំណែង​ជា​ចៅក្រម​តុលាការ​កំពូល​របស់​ប្រទេសជាតិ​រូបនេះ ថែម​ទាំង​បាន​ទទួល​ការ​គាំទ្រ​ពី​សំណាក់​សមាជិក​ព្រឹទ្ធសភា​ខាង​គណបក្ស​សាធារណរដ្ឋ​២នាក់​ថែមទៀត កាលពី​ថ្ងៃចន្ទ នៅ​ពេល​ដែល​លោកស្រី Lisa Murkowski និង​លោក Mitt Romney បាន​ប្រកាស​ថា​ខ្លួន​គ្រោង​បោះឆ្នោត​គាំទ្រ​ការ​តែងតាំង​លោកស្រី Jackson។ សមាជិក​ព្រឹទ្ធសភា​ខាង​គណបក្ស​សាធារណរដ្ឋ លោកស្រី Susan Collins កាល​ពី​សប្តាហ៍​មុន បាន​ថ្លែងថា​ លោកស្រី ​ក៏​នឹង​បោះឆ្នោត​គាំទ្រ​លោកស្រី Jackson ដែរ។

សំឡេង​ឆ្នោត​គាំទ្រ​របស់​អ្នកទាំង៣ បូក​ជាមួយ​សំឡេង​គាំទ្រ​របស់​សមាជិកព្រឹទ្ធសភា​ខាង​គណបក្ស​ប្រជាធិបតេយ្យ​៤៨​នាក់ និង​សមាជិក​ព្រឹទ្ធសភា​ឯករាជ្យ​២នាក់​ទៀត នឹង​នាំឲ្យ​លោកស្រី Jackson ទទួល​បាន​សំឡេង​ច្រើន​លើស​សេចក្តី​ត្រូវការ ដើម្បី​ក្លាយជា​ចៅក្រម​តុលាការ​កំពូល ​ដែល​ជា​ស្ត្រី​អាមេរិកាំង​ដើមកំណើត​អាហ្រ្វិក​ទីមួយ នៅ​ក្នុង​ប្រវត្តិសាស្ត្រ​របស់​សហរដ្ឋ​អាមេរិក។

លោកស្រី Jackson ដែលមាន​អាយុ​៥១ឆ្នាំ បាន​កាន់​តំណែង​ជាចៅក្រម​អស់ពេល​ជិត​ដប់ឆ្នាំ ហើយ​មាន​បទពិសោធន៍​ក្នុង​ប្រព័ន្ធ​តុលាការ​សហព័ន្ធ​អាមេរិកគ្រប់​ជាន់ថ្នាក់ ដែល​មានរួមទាំង​ក្នុង​តុលាការ​កំពូល ក្នុង​តំណែង​ជា​ជំនួយការ​របស់​ចៅក្រមតុលាការ​កំពូល​លោក​ Stephen Breyer ដែល​លោកស្រី​បាន​ទទួល​ការតែងតាំង​ឲ្យ​ឡើង​កាន់តំណែង​ជំនួស​ផង។ ប្រសិន​បើ​ជាប់​ការ​តែងតាំង លោកស្រី Jackson ​ក៏​នឹង​ក្លាយ​ជា​ចៅក្រម​តុលាការ​កំពូល​ទីមួយ​ដែល​មាន​បទពិសោធន៍​ជា​មេធាវី​ការពារក្តី​ផងដែរ។

ព្រឹទ្ធសភា​អាមេរិកត្រូវគេ​រំពឹង​ថា​នឹង​ចាប់ផ្តើម​ជជែក​ដេញដោល ហើយ​ធ្វើ​ការបោះឆ្នោត​សម្រេច​លើ​ការ​តែងតាំង​លោកស្រី មុន​វិស្សមកាល​បុណ្យ Easter នៅ​ចុងសប្តាហ៍​នេះ៕

XS
SM
MD
LG