ភ្ជាប់​ទៅ​គេហទំព័រ​ទាក់ទង

លោក Biden ថា សហរដ្ឋ​អាមេរិក​នឹង​មិន​ដក​ទណ្ឌកម្ម​ប្រឆាំង​នឹង​អ៊ីរ៉ង់​ចេញ​ជា​មុន​នោះ​ទេ


រូបឯកសារ៖ ប្រធានាធិបតីសហរដ្ឋអាមេរិកលោក Joe Biden ថ្លែងអំពីគោលនយោបាយការបរទេសរបស់សហរដ្ឋអាមេរិកជាលើកដំបូង នៅក្រសួងការបរទេសអាមេរិក ក្នុងរដ្ឋធានីវ៉ាស៊ីនតោន កាលពីថ្ងៃទី៤ ខែកុម្ភៈ ឆ្នាំ២០២១។

ប្រធានាធិបតី​សហរដ្ឋ​អាមេរិក​លោក Joe Biden បាន​មាន​ប្រសាសន៍​ថា លោក​នឹង​មិន​លុបចោល​ទណ្ឌកម្ម​សេដ្ឋកិច្ច​ប្រឆាំង​នឹង​ប្រទេស​អ៊ីរ៉ង់​ទេ ប្រសិនបើ​រដ្ឋាភិបាល​ក្រុង​តេហេរ៉ង់​មិន​កាត់​បន្ថយ​ជា​មុន​នូវ​ការ​សម្រិត​សម្រាំង​សារធាតុ​អ៊ុយរ៉ានីញ៉ូម​របស់​ខ្លួន​ ឲ្យ​ដល់​កម្រិត​មួយ​ដែល​ខ្លួន​បាន​ព្រមព្រៀង​នៅ​ក្នុង​កិច្ច​ព្រមព្រៀង​នុយក្លេអ៊ែរ​អ៊ីរ៉ង់​ឆ្នាំ ២០១៥។

លោក Biden បាន​និយាយ​ថា លោក​ចង់​ឲ្យ​សហរដ្ឋ​អាមេរិក​ចូលរួម​ឡើង​វិញ​នៅ​ក្នុង​កិច្ច​ព្រមព្រៀង​នុយក្លេអ៊ែរ​អ៊ីរ៉ង់ ដែល​លោក​អតីត​ប្រធានាធិបតី Donald Trump បាន​ដក​សហរដ្ឋ​អាមេរិក​ចេញ។

ក៏​ប៉ុន្តែ នៅ​ពេល​ដែល​សួរ​ដោយ​ផ្ទាល់​នៅ​ក្នុង​កិច្ច​សម្ភាសន៍​មួយ​ជាមួយ​ទូរទស្សន៍ CBS News ដែល​បាន​ចាក់ផ្សាយ​កាលពី​ថ្ងៃ​អាទិត្យ​ម្សិលមិញ​ថា​ តើ​សហរដ្ឋ​អាមេរិក​នឹង​ដក​ទណ្ឌកម្ម​ចេញ​ជាមុន​ ដើម្បី​ឲ្យ​អ៊ីរ៉ង់​វិល​ទៅ​កាន់​តុ​ចរចា​វិញ ឬ​ក៏​យ៉ាង​ណា​នោះ លោក Biden បាន​ឆ្លើយ​ថា «ទេ»។

លោក​បាន​ងក់​ក្បាល​យល់ស្រប​ជាមួយ​នឹង​អ្នក​ផ្សាយ​ព័ត៌មាន​ទូរទស្សន៍ CBS អ្នកស្រី Norah O'Donnell ថា រដ្ឋាភិបាល​អ៊ីរ៉ង់​ត្រូវតែ​បញ្ឈប់​ជា​មុន​សិន​នូវ​ការ​សម្រិត​សម្រាំង​សារធាតុ​អ៊ុយរ៉ានីញ៉ូម​ ដែល​មាន​កម្រិត​ខ្ពស់​ជាង​ការ​អនុញ្ញាត​ឲ្យ​នៅ​ក្រោម​កិច្ច​ព្រមព្រៀង។

កិច្ច​ព្រមព្រៀង​នេះ​បាន​អនុញ្ញាត​ឲ្យ​អ៊ីរ៉ង់​សម្រិត​សម្រាំង​សារធាតុ​អ៊ុយរ៉ានីញ៉ូម​ក្នុង​កម្រិត ៣,៦៧%។ ប៉ុន្តែ​ចាប់តាំងពី​ពាក់​កណ្តាល​ឆ្នាំ ២០១៩ មក អ៊ីរ៉ង់​បាន​សម្រិត​សម្រាំង​សារធាតុ​អ៊ុយរ៉ានីញ៉ូម​ទៅ​ដល់​កម្រិត ៤,៥% ហើយ​បន្ទាប់មក​កាលពី​ខែ​មុន​ទៅ​ដល់​កម្រិត ២០% ដែលជា​កម្រិត​មួយ​ដែល​ខ្លួន​សម្រេច​បាន​មុន​ពេល​មាន​កិច្ច​ព្រមព្រៀង។

មេដឹកនាំ​កំពូល​អ៊ីរ៉ង់​លោក Ayatollah Ali Khamenei បាន​និយាយ​កាលពី​ថ្ងៃ​អាទិត្យ​ថា ប្រសិនបើ​សហរដ្ឋ​អាមេរិក​ចង់​ឲ្យ «ប្រទេស​អ៊ីរ៉ង់​ងាក​ទៅ​រក​ការ​ប្ដេជ្ញា​របស់​ខ្លួន​ឡើង​វិញ សហរដ្ឋ​អាមេរិក​ត្រូវតែ​ដក​ទណ្ឌកម្ម​ទាំង​អស់​ចេញ បន្ទាប់មក​យើង​នឹង​ធ្វើ​ការ​ផ្ទៀងផ្ទាត់​និង​មើល​ថា​តើ​ទណ្ឌកម្ម​ទាំង​នោះ​ត្រូវ​បាន​ដក​ចេញ​ត្រឹមត្រូវ​ដែរ​ ឬ​ក៏​អត់ នោះ​យើង​នឹង​ងាក​ទៅ​រក​ការ​ប្ដេជ្ញា​របស់​យើង​ឡើង​វិញ»។

ការ​លើកឡើង​របស់​លោក Khamenei នេះ​គឺ​ជា​ការ​លើកឡើង​ដំបូង​បង្អស់​របស់​លោក តាំងពី​លោក Biden បាន​ស្បថ​ចូល​កាន់​តំណែង​ជា​ប្រធានាធិបតី​សហរដ្ឋ​អាមេរិក​មក៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG