ប្រធានាធិបតីសហរដ្ឋអាមេរិកលោក Joe Biden និងអនុប្រធានាធិបតីលោកស្រី Kamala Harris និងមន្រ្តីយោធាជាន់ខ្ពស់នឹងចូលរួមក្នុងពិធីដាក់កម្រងផ្កានៅថ្ងៃច័ន្ទនេះនៅឯទីបញ្ចុះសពនៅក្រុង Arlington ខណៈដែលប្រទេសនេះប្រារព្ធថ្ងៃឈប់សម្រាកប្រចាំឆ្នាំដើម្បីឧទ្ទិសដល់ពលីជនក្នុងសង្គ្រាម។
លោក Biden រដ្ឋមន្រ្តីក្រសួងការពារជាតិ លោក Lloyd Austin និងនាយអគ្គសេនាធិការចម្រុះលោកឧត្តមសេនីយ៍ Mark Milley នឹងថ្លែងសុន្ទរកថានៅក្នុងពិធីរំឭកគោរពវិញ្ញាណក្ខន្ធនៅទីបញ្ចុះសពស្ថិតនៅខាងក្រៅរដ្ឋធានីវ៉ាស៊ីនតោន។
លោក Biden បាននិយាយកាលពីថ្ងៃអាទិត្យថា «យើងត្រូវតែចងចាំតម្លៃដែលបានលះបង់ដើម្បីសេរីភាពរបស់យើង។ យើងត្រូវតែចងចាំគុណបំណាច់ដែលយើងជំពាក់អ្នកដែលបានពលីចោលគ្រួសារពួកគេ។ ខ្ញុំមានការឈឺចាប់ណាស់ចំពោះការបាត់បង់នេះ»។
លោក Biden បានថ្លែងដូច្នេះក្នុងសុន្ទរកថាទៅកាន់អតីតយុទ្ធជន និងគ្រួសារអតីតយុទ្ធជន។
សុន្ទរកថារបស់លោក Biden ធ្វើឡើងនៅខួបលើកទី៦នៃការស្លាប់របស់កូនប្រុសរបស់លោកឈ្មោះ Beau ដែលបានធ្វើជាវរសេនីត្រីនៃកងទ័ពឆ្មាំជាតិនៃរដ្ឋ Delaware និងដែលបានបំពេញបេសកកម្មនៅអ៊ីរ៉ាក់ មុនពេលស្លាប់ដោយសារជំងឺមហារីកក្នុងឆ្នាំ២០១៥ផងដែរ។
លោក Biden និយាយថា៖ «ខ្ញុំដឹងថា ការបាត់បង់នេះវាឈឺចាប់យ៉ាងណា។ ខ្ញុំដឹងថា វាធ្វើឲ្យនេះដូងអ្នកធ្លុះធ្លាយ។ ខ្ញុំមានអារម្មណ៍ថា វាធ្វើឲ្យអ្នកជាប់ក្នុងទុក្ខសោកនេះ មិនអាចចេញវិញបានទេ»។
លោកបានថ្លែងទៀតថា៖ «អ្នកទាំងអស់គ្នាដឹងទេ? ទោះជាយើងឈឺចាប់យ៉ាងណា ខ្ញុំដឹងអំពីអារម្មណ៍មោទនភាពរបស់អ្នកចំពោះអ្នកជាទីស្រឡាញ់របស់អ្នក ដែលអ្នកបាត់បង់ និងអ្នកដែលកំពុងបម្រើប្រទេសរបស់យើង គឺមោទនភាពនិងសេចក្តីក្លាហានក្នុងការបម្រើជនជាតិដ៏អស្ចារ្យរបស់យើង»។
សហរដ្ឋអាមេរិកប្រារព្ធពិធីរំឭកទិវាអតីតយុទ្ធជននៅចុងខែឧសភាចាប់តាំងពីឆ្នាំ១៨៦៨មក បន្ទាប់ពីសង្គ្រាមស៊ីវិល។ ឥឡូវនេះ ថ្ងៃបុណ្យជាតិនេះធ្វើឡើងនៅថ្ងៃច័ន្ទចុងក្រោយនៃខែឧសភាជារៀងរាល់ឆ្នាំ៕
