ប្រធានាធិបតីសហរដ្ឋអាមេរិកលោក Joe Biden នឹងទទួលស្វាគមន៍នាយករដ្ឋមន្ត្រីចក្រភពអង់គ្លេសលោក Rishi Sunak ដើម្បីធ្វើការពិភាក្សានៅឯសេតវិមាននៅថ្ងៃព្រហស្បតិ៍នេះ ដែលត្រូវគេរំពឹងថានឹងផ្ដោតលើបញ្ហាទំនាក់ទំនងសេដ្ឋកិច្ចនិងការគាំទ្រប្រទេសអ៊ុយក្រែននៅក្នុងការការពារប្រឆាំងនឹងការឈ្លានពានរបស់រុស្ស៊ី។
ទស្សនកិច្ចរបស់លោក Sunak នេះគឺជាទស្សនកិច្ចលើកដំបូងបង្អស់របស់លោកមកកាន់សហរដ្ឋអាមេរិកតាំងពីពេលលោកបានក្លាយជានាយករដ្ឋមន្ត្រីរបស់ចក្រភពអង់គ្លេសកាលពីខែតុលាឆ្នាំមុនមក ប៉ុន្តែលោកនិងលោក Biden បានជួបគ្នា ៣ ដងរួចមកហើយនៅក្នុងឆ្នាំនេះ។
អ្នកនាំពាក្យសេតវិមានអ្នកស្រី Karine Jean-Pierre បានប្រាប់អ្នកយកព័ត៌មានកាលពីថ្ងៃពុធថា៖ «មេដឹកនាំទាំងពីរនឹងពិនិត្យលើបញ្ហាជាច្រើននៅលើសាកលលោក ដែលក្នុងនោះរួមមានទាំងភាពជាដៃគូសេដ្ឋកិច្ចរបស់យើង ការគាំទ្ររួមគ្នារបស់យើងចំពោះអ៊ុយក្រែននៅពេលដែលអ៊ុយក្រែនការពារខ្លួនប្រឆាំងនឹងសង្គ្រាមឈ្លានពានដ៏ឃោរឃៅរបស់រុស្ស៊ី និងវិធានការបន្ថែមដើម្បីពន្លឿនការផ្លាស់ប្ដូរទៅរកថាមពលស្អាតផងដែរ»។
នៅមុនការពិភាក្សានៅថ្ងៃព្រហស្បតិ៍នេះ លោក Sunak បាននិយាយថា លោកនឹងជំរុញឱ្យមានទំនាក់ទំនងសេដ្ឋកិច្ចកាន់តែជិតស្និទ្ធជាងមុននៅក្នុងស្មារតីដូចទៅនឹងកិច្ចសហប្រតិបត្តិការផ្នែកការពារនិងសន្តិសុខរបស់ប្រទេសទាំងពីរ៕
អ្នកឆ្លើយឆ្លងព័ត៌មានរបស់ VOA ប្រចាំសេតវិមានអ្នកស្រី Anita Powell បានរួមចំណែកនៅក្នុងសេចក្ដីរាយការណ៍នេះ។ ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP និង Reuters។
