ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Biden កំពុង​សម្លឹង​​​មើល​ប្រទេស​ចិន​ ខណៈ​លោក​ចាកចេញ​ទៅ​កាន់​ប្រទេស​កូរ៉េ​ខាង​ត្បូង​និង​ជប៉ុន


ប្រធានាធិបតី​សហរដ្ឋ​អាមេរិក​ លោក Joe Biden ថ្លែង​សុន្ទរកថា នៅ​មជ្ឈមណ្ឌល​ Delavan Grider Community ទីក្រុង Buffalo រដ្ឋ​ញូវយ៉ក សហរដ្ឋ​អាមេរិក ថ្ងៃទី ១៧ ខែឧសភា ឆ្នាំ២០២២។ (REUTERS/Leah Millis)
ប្រធានាធិបតី​សហរដ្ឋ​អាមេរិក​ លោក Joe Biden ថ្លែង​សុន្ទរកថា នៅ​មជ្ឈមណ្ឌល​ Delavan Grider Community ទីក្រុង Buffalo រដ្ឋ​ញូវយ៉ក សហរដ្ឋ​អាមេរិក ថ្ងៃទី ១៧ ខែឧសភា ឆ្នាំ២០២២។ (REUTERS/Leah Millis)

ប្រធានាធិបតី​សហរដ្ឋ​អាមេរិក​លោក Joe Biden ធ្វើ​ដំណើរ​ទៅកាន់​ប្រទេសកូរ៉េខាង​ត្បូង​និង​ជប៉ុន​រយៈពេល៦ថ្ងៃ​ដើម្បី​បង្កើន​ទំនាក់​ទំនងជា​មួយមេដឹកនាំនៃ​ប្រទេស​ទាំង​ពីរ ខណៈដែល​បញ្ជូន​សារ​ដ៏​ច្បាស់​មួយដល់​ប្រទេស​ចិន​ផង​ដែរពី​ផលវិបាក​នៃ​ការចូលឈ្លាន​ពាន​របស់​រុស្ស៊ី​ទៅ​លើអ៊ុយក្រែន​អាចផ្តល់ឱ្យ​រដ្ឋាភិបាល​ក្រុង​ប៉េកាំង​គិតពិចារណា​ឡើងវិញ​ពី​ការបង្ហាញ​ឥទ្ធិ ពល​យោធា​របស់​ខ្លួនក្នុង​តំបន់​ប៉ាស៊ីហ្វិក។ នេះ​បើតាម​សេចក្តី​រាយការណ៍​របស់​ទីភ្នាក់ងារ​ព័ត៌ មាន AP។

លោកBiden នឹង​ចេញ​ដំណើរនៅ​ថ្ងៃ​ព្រហស្បតិ៍​នេះ​ហើយ​មាន​គម្រោង​ជួប​ប្រធានាធិបតី​ជាប់​ឆ្នោត​ថ្មី​កូរ៉េ​ខាង​ត្បូង​លោក Yoon Suk Yeol និង​ជួប​ជា​មួយ​នាយក​រដ្ឋមន្ត្រី​ជប៉ុន​លោក Fumio Kishida។ ជំនួប​ពិភាក្សា​របស់​មេដឹកនាំទាំង​នេះ​នឹង​ផ្តោត​លើវិស័យ​ពាណិជ្ជកម្ម ការបង្កើនសង្វាក់​ផ្គត់ផ្គង់សាកល​ដែល​រឹងមាំ​មួយ ក្តីកង្វល់​ជុំវិញ​កម្មវិធី​អាវុធ​នុយក្លេអ៊ែរ​របស់​កូរ៉េ​ខាង​ជើង​ក៏ដូចជា​ការផ្ទុះ​ការរាលដាលនៃ​ជំងឺកូវីដ១៩​នៅ​ក្នុង​ប្រទេស​កុម្មុយនីស្ត​មួយ​នេះ​ផង​ដែរ។

ខណៈ​ពេល​ស្ថិត​នៅ​ក្នុង​ប្រទេស​ជប៉ុន លោក Biden ក៏​នឹង​ជួប​ផង​ដែរ​ជាមួយ​មេដឹកនាំ​នៃ​ប្រ ទេស​សម្ពន្ធមិត្តយុទ្ធសាស្រ្ត​ឥណ្ឌូប៉ាស៊ីហ្វិក​ដែល​មាន​ឈ្មោះ​ថា Quad ដែល​រួម​មាន៤ប្រទេស​គឺ​ប្រទេស​អូស្ត្រាលី ឥណ្ឌា ជប៉ុន​និង​អាមេរិក។

ទីប្រឹក្សា​សន្តិសុខ​សេតវិមាន​លោក Jake Sullivan និយាយថា «យើង​គិត​ថា ដំណើរ​ទស្សន កិច្ច​នេះ នឹង​បង្ហាញ​យ៉ាង​ពេញលេញ​នូវយុទ្ធសាស្ត្រក្នុង​តំបន់​ឥណ្ឌូ​ប៉ាស៊ីហ្វិក​របស់​លោក Bidenក៏​ដូច​ជា​ការបង្ហាញថា សហរដ្ឋ​អាមេរិកអាច​ដឹកនាំពិភព​សេរីជា​ថ្មី​ម្តង​ទៀត​ក្នុង​ការ ឆ្លើយតប​ទៅ​នឹង​សង្គ្រាមឈ្លាន​ពាន​របស់​រុស្ស៊ី​ក្នុង​ប្រទេស​អ៊ុយក្រែន។ ទន្ទឹម​នឹង​នេះ​ដែរ វា​បាន​បង្ហាញ​ពី​គោលដៅ​នៃភាពដឹកនាំ​របស់សហរដ្ឋអាមេរិក​ដែលមាន​ប្រសិទ្ធភាព​និង​មាន​គោលការណ៍​ក្នុង​ការចូលរួមជាមួយ​តំបន់ ដែល​បាន​កំណត់​ពីអនាគតក្នុង​សវត្សរ៍​ទី​២១​នេះ»។

សង្គ្រាម​ក្នុង​ប្រទេស​អ៊ុយក្រែន​បាន​ធ្វើ​ឱ្យ​មាន​ភាពបន្ទាន់មួយអំពី​ប្រទេស​ចិន​ក្នុង​ចំណោមសម្ពន្ធមិត្ត​សំខាន់ៗ​របស់​អាមេរិក​នៅ​តំបន់​ប៉ាស៊ីហ្វិក។ ប្រទេស​ជា​ច្រើនបានមើល​វិបត្តិ​ដែល​នឹង​អាច​កើត​មាន​មក​លើ​ខ្លួន​ដែល​ការណ៍​នេះ​មាន​សារៈសំខាន់​ក្នុង​ការបង្ហាញ​ដល់​ប្រទេស​ចិនថា ខ្លួនមិន​ត្រូវព្យាយាម​ដើម្បី​ដណ្តើម​កាន់កាប់​ទឹកដី​ដែល​មាន​ជម្លោះ​តាមរយៈ​កម្លាំង​យោធា​នោះ​ឡើយ៕

XS
SM
MD
LG