ប្រធានាធិបតីសហរដ្ឋអាមេរិក លោក Joe Biden មានគម្រោងប្រកាសនៅថ្ងៃពុធនេះស្តីពីតម្លៃប្រេងឥន្ធនៈ និងការប៉ះពាល់ផ្នែកសេដ្ឋកិច្ច ដោយសារសង្គ្រាមរបស់រុស្ស៊ីទៅលើប្រទេសអ៊ុយក្រែន ខណៈលោកកំពុងពិចារណាថា តើគួរគាំទ្រការផ្អាកពន្ធសហព័ន្ធលើប្រេងឥន្ធនៈនៅទូទាំងប្រទេស ឬយ៉ាងណានោះ។
លោក Biden បាននិយាយថា លោកនឹងធ្វើការសម្រេចចិត្តនៅមុនដំណាច់សប្តាហ៍នេះ។
ពន្ធសហព័ន្ធសម្រាប់ប្រេងឥន្ធនៈគឺប្រមាណ១៨,៤សេនក្នុងមួយហ្កាឡុង ឬប្រមាណជាង៣,៧លីត្រ។ លុយពន្ធនេះគឺសម្រាប់គម្រោងធ្វើផ្លូវ។
ប្រេងសាំងនៅក្នុងសហរដ្ឋអាមេរិកនៅពេលនេះគឺប្រមាណជា៥ដុល្លារក្នុងមួយហ្កាឡុង។ តម្លៃប្រេងឥន្ធនៈនៅជុំវិញពិភពលោកបានឡើងខ្លាំង ក្នុងរយៈពេលប៉ុន្មានខែថ្មីៗនេះ ដោយសារតម្រូវការប្រើប្រាស់កើនឡើង ផលិតកម្មមានការប្រឈម ហើយនឹងទណ្ឌកម្មប្រឆាំងនឹងរុស្ស៊ី ដែលជាអ្នកផលិតប្រេងដ៏សំខាន់។ ទាំងនេះជាកត្តាចម្បង ដែលធ្វើឱ្យប្រេងសាំងឡើងថ្លៃ។
អ្នកនាំពាក្យសេតវិមាន លោកស្រី Karine Jean-Pierre បានប្រាប់អ្នកសារព័ត៌មាននៅថ្ងៃអង្គារថា បញ្ហានេះជាអទិភាពសម្រាប់លោក Biden ហើយជម្រើសជាច្រើនទៀតកំពុងស្ថិតនៅក្នុងការពិចារណា។
លោកស្រីបន្តថា «លោកប្រធានាធិបតីនឹងធ្វើនូវអ្វីៗគ្រប់យ៉ាងដែលលោកអាចធ្វើបាន ដើម្បីសម្រាលការលំបាក និងសម្ពាធលើពលរដ្ឋអាមេរិកកាំង ទាក់ទងនឹងតម្លៃប្រេងសាំង»។
អ្នកជំទាស់ការផ្អាកពន្ធប្រេង ដែលក្នុងនោះក៏រួមមានសមាជិកសភានៃគណបក្សប្រជាធិបតេយ្យមួយចំនួនផងដែរ បានលើកឡើងថា ការផ្អាកនេះនឹងមិនអាចជួយដោះស្រាយការផ្គត់ផ្គង់ប្រេងនោះឡើយ ហើយវាធ្វើឱ្យបាត់ថវិកាសម្រាប់តម្រូវការនៃហេដ្ឋារចនាសម្ព័ន្ធផងដែរ៕
(ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន The Associated Press និង Reuters)
