ប្រធានាធិបតីសហរដ្ឋអាមេរិកលោក Joe Biden និយាយថា លោកនឹងបន្តជួបពិភាក្សាជាមួយមេដឹកនាំសភាសហរដ្ឋអាមេរិក នៅឯសេតវិមាននៅថ្ងៃអង្គារនេះ ខណៈការខ្វែងគំនិតគ្នាអំពីប្រាក់បំណុលអាមេរិក កំពុងរុញប្រទេសនេះទៅដល់ពិដានប្រាក់កម្ចី ដោយនៅមិនទាន់ឃើញមានសញ្ញាឯកភាពគ្នាណាមួយនៅឡើយទេ។ នេះបើតាមសេចក្តីរាយកាណ៍របស់ទីភ្នាក់ងារសារព័ត៌មាន AP។
កិច្ចប្រជុំនេះ ដំបូងឡើងត្រូវបានកំណត់ថានឹងត្រូវធ្វើបន្តនៅថ្ងៃសុក្រសប្តាហ៍មុន ប៉ុន្តែត្រូវបានពន្យារពេល ដោយទុកពេលឱ្យមានការជួបប្រជុំបន្តត្រឹមថ្នាក់កម្រិតបុគ្គលិក មុនពេលដែលលោក Biden និងក្រុមមេដឹកនាំសភាសហរដ្ឋអាមេរិកទាំង៤រូប អាចជួបគ្នាបន្តទៀតជាលើកទី២។
លោក Biden ដែលស្ថិតនៅក្នុងទីក្រុង Philadelphia កាលពីថ្ងៃចន្ទម្សិលមិញ ដើម្បីចូលរួមពិធីទទួលសញ្ញាបត្រចៅស្រីរបស់លោកនៅសាកលវិទ្យាល័យ Pennsylvania បានប្រាប់ក្រុមអ្នកសារព័ត៌មានថា កិច្ចប្រជុំនេះនឹងត្រូវបន្តធ្វើនៅថ្ងៃអង្គារនេះ ប៉ុន្តែលោកមិនបានបរិយាយលម្អិត ឬរំពឹងថានឹងមានការឯកភាពគ្នាណាមួយឡើយ។
លោក Biden បានត្រឡប់មកកាន់រដ្ឋធានីវ៉ាស៊ីនតោនវិញនៅល្ងាចថ្ងៃចន្ទ ហើយមានគម្រោងនឹងទៅចូលរួមកិច្ចប្រជុំកំពូលរបស់ក្រុមប្រទេស G7 នៅក្នុងប្រទេសជប៉ុននៅថ្ងៃពុធស្អែកនេះ។ អ្នកនាំពាក្យក្រុមប្រឹក្សាសន្តិសុខជាតិសហរដ្ឋអាមេរិក លោក John Kirby បាននិយាយថា រហូតមកដល់ពេលនេះលោកប្រធានាធិបតី នៅតែមានគម្រោងចាកចេញទៅកាន់ប្រទេសជប៉ុនដូចតាមការគ្រោងទុក។
លោក Biden កាលពីថ្ងៃអាទិត្យមិនបាននិយាយលម្អិតពីការចម្រើនទៅមុខនៃការពិភាក្សាគ្នាក្នុងពេលកន្លងទៅទេ ប៉ុន្តែលោកថា លោកនៅតែមានសង្ឃឹមថា កិច្ចព្រមព្រៀងមួយអាចនឹងត្រូវសម្រេចបានជាមួយក្រុមបក្សសាធារណរដ្ឋ ដើម្បីបញ្ចៀសនូវអ្វីដែលជាការមិនអាចសងបំណុលបាន ដែលមិនធ្លាប់មានពីមុនមក ហើយដែលអាចនាំទៅដល់មហន្តរាយខាងផ្នែកហិរញ្ញវត្ថុមួយ។
ក្រុមមន្ត្រីជំនួយការអាមេរិកនិយាយថា កិច្ចពិភាក្សាជុំវិញរឿងនេះ បានបន្តធ្វើពេញចុងសប្តាហ៍កន្លងទៅនេះ។ ប៉ុន្តែមិនមានសញ្ញាបន្តិចបន្តួចជាសាធារណៈឡើយថាភាគីទាំងខាងសេតវិមាននិងខាងក្រុមរដ្ឋសភាគណបក្សសាធារណរដ្ឋ បានដកថយពីជំហរដូចដែលគេបានធ្វើក្នុងជំនួបជំហានដំបូងៗនោះទេ។ លោក Biden បានអំពាវនាវដល់សមាជិកសភាឱ្យដកចេញការកម្រិតប្រាក់បំណុលដោយគ្មានលក្ខខណ្ឌ ដោយលោកព្រមានថា អំណាចខ្ចីប្រាក់របស់ជាតិ មិនគួរត្រូវយកទៅប្រើប្រាស់ ដើម្បីកាត់បន្ថយការចំណាយយ៉ាងខ្លាំង ក៏ដូចជាការទាមទារទៅតាមគោលនយោបាយអភិរក្សដទៃទៀតនោះឡើយ៕
